1 وِفَكِّرْ الْمُؤمِنِينْ أَنْ يِكُونُو خَاضِعِينْ لِلْحُكَّامْ وِالْسُّلْطَاتْ، وِيِطِيعُو الْجَانُونْ، وِيِكُونُو جَاهْزِينْ لِكِلْ عَمَلْ صَالِحْ، 2 وِمَا يِتْكَلَّمُو بِكَلامْ رَدِيْ عَلَى حَدْ، وِمَا يِكُونُو مِخَاصْمِينْ، لَكِنْ لُطَفَا يِعَمْلُو الْكِلْ بِوَدَاعَةْ تَامَّةْ. 3 عَلَشَانْ إِحْنَا كَمَانْ كُنَّا جَبْلْ إِكْدِهْ جُهَّالْ، غِيْرْ مُطِيعِينْ، تَايْهِينْ فِي الْبُطْلْ، عَبِيدْ يِخْدِمُو الْشَّهَوَاتْ وِاللَّذَّاتْ المِخْتِلْفَةْ، عَايْشِينْ فِي الْخُبْثْ وِالْحَسَدْ، مَكْرُوهِينْ، وِكَارِهِينْ بَعْضِينَا لِبَعْضْ. 4 وِلَكِنْ، لَمَّا ظَهَرْ لُطْفْ مِخَلِّصْنَا اللهْ، وِمَحَبِّتَهْ لِلْنَّاسْ، 5 خَلَّصْنَا، مِشْ عَلَى أَسَاسْ أَعْمَالْ صَالْحَةْ عَمَلْنِها إِحْنَا، لَكِنْ حَسَبْ رَحْمِتَهْ، وِدَايْتِي حَصَلْ بِاَنَّهْ غَسَلْنَا بِالْكَامِلْ غُسْلْ الْخَلِيِجَةْ الْجَدِيدَةْ وِالتَجْدِيدْ إِللِّي بِيَعْمِلَهْ الْرُّوحْ الْجُدُسْ، 6 إِللِّي سَكَبَهْ عَلِيْنَا بِوَفْرَةْ بِيَسُوعْ الْمَسِيحْ مُخَلِّصْنَا. 7 حَتَّى إِذَا أَخَدْنَا الْبَرَاءَةْ بِنَعْمَتَهْ، نِصِيرْ وَرَثَةْ، حَسَبْ لِرَجَانَا بِالْحَيَاةْ الأَبَدِيَّةْ. 8 وِالْجُوْلْ دَايْتِي حَجِيجِي! وِآنِي بَارَيدْ أَنَّكْ تِجَرِّرْ الأَمُورْ دَايْتِي جَرَارْ حَاسِمْ، عَلَشَانْ يِهْتَمْ إِللِّي آمَنُو بِاللهْ بِانَّهُمْ يِجْتِهْدُو فِي الأَعْمَالْ الْصَّالْحَةْ. وِالأَمُورْ دَايْتِي مَلِيحَةْ وِنَافْعَةْ لِلْنَّاسْ. 9 أَمَّا الْمَسَائِلْ الْغَبِيَّةْ، وِسَلاسِلْ الْنَّسَبْ، وِالْمُخَاصَمَاتْ، وِالْخِنَاجَاتْ حَوَالِيْنْ الْشَّرِيعَةْ إِتْجَنَّبْهَا، عَلَشَانْ هِيَّ غِيْرْ نَافْعَةْ، وِبَاطْلَةْ. 10 وِصَاحِبْ الْهَرْطَجَةْ إِجْطَعْ عِلاجْتَكْ بِيهْ بَعْدْ مَا إِتْحَزْرُو مَرَّةْ وِإِتْنَانْ، 11 وِإِعْرِفْ أَنَّ إللِّي زَيْ دَايْتِي مِنْحِرِفْ يِمْشِي فِي الْخَطِيَّةْ وِحَكَمْ عَلَى نَفْسَهْ بِنَفْسَهْ! 12 وِلَمَّا أَبْعَتْ لِيكْ أَرْتِمَاسْ أَوْ تِيخِيكُسْ، إِجْتِهِدْ أَنَّكْ تِجِينِي لِمَدِينِةْ نِيكُوبُولِيسْ، عَلَشَانْ آنِي جَرَّرْتْ أَجْضِي الْشَّتْوِيَّةْ هِنَاكْ. 13 إِجْتِهِدْ أَنَّكْ تِطْلِجْ زِينَاسْ الْمُحَامي وِأَبُلُّوسْ لَمَّا تَعْطِيهُمْ كِلْ جَاجَةْ يِحْتَاجْ لِلْسَفَر، عَلَشَانْ مَا يِكُونُو مِحْتَاجِينْ لِشَيْ. 14 وِيِتْعَلَّمْ الْنَّاس إِللِّي يِخِصُّونَا كَمَانْ أَنْ يَعْمِلُو أَعْمَالْ مَلِيحَةْ، عَلَشَانْ يِسِدُّو الإِحْتِيَاجَاتْ الْضَّرُورِيَّةْ، عَلَشَانْ مَا يِكُونُو مِنْ غِيْرْ ثَمَرْ. 15 كِلْ إِللِّي مَعَايْ يِسَلِّمُو عَليْكْ. سَلِّمْ عَلَى إِللي يِحِبُّونَا فِي الإِيْمَانْ. وِالْنَعْمَةْ إِتْكُونْ مَعَاكُمْ كِلَّاتْكُمْ!