1 طَيِّبْ، يَا إِخْوَاتِي وِحَبَايْبِي وِالْمِشْتَاجْ لِيهُمْ، يَا فَرَحِي وِتَاجِي، إِتْكُونُو ثَابْتِينْ إِكْدِهْ فِي الْرَّبْ يَا حَبَايْبِي. 2 أَجُولْ لأَفُودِيَةْ، وِأَجُولْ كَمَانْ لِسَنْتِيخِي، أَنْ يِِكُونْ لِيهُمْ، فِي الْرَّبْ، فِكِرْ وَاحِدْ. 3 تَمَامْ، أَطْلُبْ مِنَّكْ أَنْتَ كَمَانْ، أَيُّهَا الْصَّدِيجْ الْمُخْلِصْ، إِنَّكْ أَنْتَ إِتْسَاعِدْهُمْ، عَلَشَانْ هُمَّ كَافَحُو مَعَايْ فِي خِدْمِةْ الإِِنْجِيلْ، وِكَمَانْ وِأَكْلِيمَنْدُسْ وِإللِّي سَاعَدُونِي، الْمَكْتُوبْ أَسَامِيهُمْ فِي كِتَابْ الْحَيَاةْ. 4 إِفْرَحُو فِي الْرَّبْ عَلَى طُولْ، وِأَجُولْ كَمَانْ: إِفْرَحُو. 5 عَلَشَانْ يِكُونْ طُولْ بَالْكُمْ ظَاهِرْعِنْدْ الْنَّاسْ كِلَّاتْهُمْ. إِنَّ الْرَّبْ جِرَيِّبْ. مَا 6 تِجْلَجُو مِنْ أَيْ شَيْ، لَكِنْ فِي كِلْ شَيْ إِتْكُونْ طِلْباتْكُمْ مَعْرُوفَةْ عِنْدْ اللهْ، بِالْصَّلَةْ وِالدُّعَا مَعْ الْشُّكْرْ. 7 وِسَلامْ اللهْ، إِللِّي فُوجْ إِدْرَاجْ الْعُجُولْ، يِحْفَظْ جُلُبْكُمْ وِأَفْكَارْكُمْ فِي الْمَسِيحْ يَسُوعْ. 8 وِفِي خُلاصَةْ الأَمْرْ، يَا إِخْوَتِي: كِلْ إِللِّي هُوَّ حَجْ، وِكِلْ إللِّي هُوَّ شَرِيفْ، وِكِلْ إِللِّي هُوَّ عَادِلْ، وِكِلْ إِللِّي هُوَّ طَاهِ، وِكِلْ إِللِّي هُوَّ مُسْتَحِجْ، وِكِلْ إِللِّي هُوَّ سُمْعَتُهْ كُوَيْسَةْ، وِكِلْ إِللِّي فِيهْ فَضِيلَةْ وِعَادَةْ كُوَيْسَةْ الْسُّمْعَةْ، خَلِّي أَفْكَارْكُمْ مَشْغُولَةْ بِالإِمُورْ دَايْتِي. 9 وِاعْمِلُو بِاللِّي تَعَلَّمْتُو وِاسْتَلَمْتَو وِاسْمِعْتُو مِنِّي وِشِفْتُو فِيَّ. وِإِلَهْ الْسَّلامْ يِكُونْ مَعَاكُمْ. 10 وِبَعْدَاً آنِي فِرِحْتْ فِي الْرَّبْ فَرَحْ كَتِيرْ جَوِي عَلَشَانْ أَنْتُمْ جَدَّدْتُو إِهْتِمَامْكُمْ بِيَّ مَرَّةْ كَمَانْ. وِمَعْ إنَّهْ كَانْ لِيْكُمْ زَيْ الإِهْتِمَامْ دَايْتِي، وِإِنْ الْفُرْصَةْ مَا جَاتْلِيكُمْ جَبْلْ إكْدِهْ. 11 وِمَا بَجْصُدْ إنِّي كُنْتْ مِحْتَاجْ، عَلَشَانْ آنِي إِتْعَلَّمْتْ أَنْ أكُونْ مِجْتِنِعْ فِي كِلْ حَالْ. وِأَعْرِفْ كِيْفْ عِيشْ وِآنِي فِي إِحْتِيَاجْ، 12 وِأَعْرِفْ كِيْفْ عِيشْ وِآنِي عَنْدِي وَفْرَة كَتيرَةْ. وِآنِي فِي كِلْ شَيْ، وِفِي كِلْ أَحْوَالِي، مِتْدَرِّبْ عَلَى الْشِّبْعْ وِعَلَى الْجُوعْ، وِعَلَى الْعِيْشَةْ فِي الْوَسَعْ وِعَلَى الْعِيْشَةْ فِي الإِِحْتِيَاجْ. 13 وِآنِي بَاجْدَرْ عَلَى كِلْ شَيْ فِي الْمَسِيحْ إللِّي بِجَوِّنِي. 14 أَنْتُو عَمَلْتُمْ مَلِيحْ لَمَّا إِشْتَرَكْتُمْ عَلَشَانْ تِنْهُو ضِيجْتِي. 15 وِتَعْرِفُو كَمَانْ، يَا مُؤْمِنِينْ فِيلِبِّي، لَمَّا بَدأَتْ أَخْدِمْ الإِِنْجِيلْ، طِلِعْتْ مِنْ مِجَاطَعِةْ مَجْدُونِيَّةْ، وَلَا كَنِيسَةْ وِجْفِتْ مَعاَي فِي أَمُورْ الْعَطَا وِالأَخْذْ إللِّى انْتُمْ بَسْ. 16 حَتَّى وِآنِي فِي مَدِينِةْ تَسَالُونِيكِي، بَعَدْتُو لِيَّ كِلْ إِحْتِيَاجِي، مُشْ مَرَّةْ وَاحْدَةْ لَكِنْ أَكْتَرْ مِنْ إِكْدِهْ. 17 وِالْوَاجِعْ أَنِّي مِشْ بَاسْعَى لِلْعَطَايَا، لَكِنْ بَاسْعَى لِلْفَايْدَةْ إِللِّي إبْتِكْتَرْ لِحِسَابْكُمْ. 18 وِآنِي عَنْدِي دِلْوَكِيتِي كِلْ إِللِّي آنِي مِحْتَاجَةْ وِبِزِيَادَةْ. إللِّي آنِي أَخَدْتُهْ مِنْ أَبَفْرُودِيتُسْ الْحَاجاَتْ إللِّي انْتُو بَعَدتُوهاَ لِيَّ، زَيْ الْعُطْرْ إِللِّي رِيِحْتُهْ حِلْوَةْ، ذَبِيحَةْ يِجْبَلْهَا اللهْ وِيِفْرَحْ بِيهَا. 19 وِإلَهِي هَايِسَدِّدْ إحْتِيَجَاتْكُمْ كِلِّاتْهَا بِالْتَّمَامْ، حَسَبْ غِنَاهْ فِي الْمَجْدْ، فِي الْمَسِيحْ يَسُوعْ. 20 وَلإلَهِينَا وِأَبُونَا، الْمَجْدْ لِدَهْرْ الْدُّهُورْ. آمِينْ. 21 إِبْعَتُو سَلامْ لِكِلْ جِدِّيسْ فِي الْمَسِيحْ يَسُوعْ. 22 الإِِخْوَةْ إِللِّي مَعَايْ يِسَلِّمُو عَلِيْكُمْ. وِيِسَلِّمْ عَلِيْكُمْ كِلْ الْجِدِّيسِينْ، وِإِللِّي كَمَانْ بِيِخْدِمُو فِي بَيْتْ الْمَلِكْ. 23 وِإتْكُونْ نِعْمِةْ رَبِّنَا يَسُوعْ الْمَسِيحْ مَعْ رُوحْكُمْ .آمِينْ.