1 مِن بُولُسْ، الْمَحْبُوسْ عَلَشَانْ الْمَسِيحْ يَسُوعْ، وَمِنْ تِيمُوثَاوُسْ خِيْنَا، لِفِلِيمُونْ الْمَحْبُوبْ إِللِّي شَغَّالْ مَعَانَا فِي عَمَل اللهْ، 2 وِالأَبْفِيَّةْ خايِّتْنَا، وِأََرْخِيبَّوسْ صَدِيجْناَ فِي الْخِدْمَةْ، وَلِلْكَنِيسَةْ إِللِّي فِي دَارَكْ. 3 لِيكُمْ نَعْمَةْ وِسَلامْ مِنْ اللهْ أبُونَا وِالْرَبْ يَسُوعْ الْمَسِيحْ! 4 آنِي أَشْكُرْ إِلَهِي، وِعَلَى طُولْ فَاكْرَكْ فِي صَلَوَاتِي، 5 وِسِمِعِتْ أَنَّ عَنْدَكْ مَحَبَّةْ وِأَمَانَةْ مِنْ جِهَةْ الْرَّبْ يَسُوعْ وَمِنْ جِهَةْ كِلْ الْجِدِّيسِينْ، 6 وِآنِي عَاوِزْ إِشْتِراكَكْ مَعَانَا فِي الإِِيمَانْ بِطَرِيجَةْ عَمَلِيَّةْ، وِتَعْرِفْ بِالْتَّمَامْ إِللِّي جُوَّانَا مِنْ كِلْ خَيْرْ عَلَشَانْ الْمَسِيحْ. 7 وِكَانْ لِي أَيُّهَا الأَخْ، فَرَحْ كَتِيرْ وِتَشْجِيعْ، بِسَبَبْ مَحَبِّتَكْ، عَلَشَانْ مَشَاعِرْالْجِدِّيسِينْ إنْتَعَشَتْ بِفَضْلَكْ! 8 عَلَشَانْ إكْدِهْ، آنِي لِيَّ الْحَجْ فِي الْمَسِيحْ عَلَشَانْ أأمُرَكْ بِالْوَاجِبْ إِللِّي مَفرُوضْ عَلِيْكْ، 9 مَعْ إِكْدِهْ، تَجْدِيراً لِلْمَحَبَّةْ، إِخْتَرْتْ أَسْتَأْزَنَكْ، عَلَشَانْ آنِي بُولُسْ الْعَجُوزْ وِالْمَحْبُوسْ دِلْوَكِيتِي عَلَشَانْ الْمَسِيحْ يَسُوعْ. 10 أَسْتَأَزِنْ مِنَّكْ لأَجْلْ وِلْدِيْ إِللِّي وَلَدْتَهْ وِآنِي مِجَيَّدْ بِالْسَلاسِلْ، أُونِسِيمُوسْ، 11 إللِّي كَانْ جَبْلْ إِكْدِهْ مِشْ نَافِعْ لِشَيْ، دِلْوَكِيتِي نَافِعْ لِيكْ وَلِيَّ. 12 آنِي بِرَجَّعُولَكْ، أََجْبَلَهْ كَأنُّو حِتَّةْ مِنْ جَلْبِي! 13 وِكُنْتْ عَاوِزْ أَخَلِّيهْ عَنْدِي، عَلَشَانْ يِخْدِمْنِي بَدَلْ مِنَّكْ فِي جُيُودْ الإِِنْجِيلْ. 14 لَكِنِّي مِشْ عَايِزْ أَعْمِلْ شَيْ ِمنْ غَيْرْ رَأْيَكْ، عَلَشَانْ الْجَمِيلْ بِتَاعَكْ مُشْ عَنْ غُصْبانِيِّةْ لَكِنْ إتْكُونْ رَاضِي. 15 عَلَشَانْ إكْدِهْ هُوَّ بَعَّدْ إِشْوَيَّ: عَلَشَانْ يِكُونْ مَعَكْ عَلَى طُولْ، 16 مِشْ زَيْ الْعَبْدْ بَعْدْ إكْدِهْ، لَكِنْ أَحْسَنْ مِنْ عَبْدْ، كأنَّهْ أََخْ مَحْبُوبْ، لِيَّ مَخْصُوصْ، وِهَيِكُونْ كَدّيْشْ لِيكْ، فِي الْجَسَدْ وَفِي الْرَّبْ مَعْ بَعَدْ؟ 17 وِإِنْ كُنْتْ تِحْسِبْنِي شَرِيكْ لَكْ، إِجْبَلُهْ كَأَنِّي أَنَا. 18 وِإنْ كَانْ عَمَلْ غَلَطْ فِي شِيْ، أَوْ كَانْ مَدْيُونْ لِيكْ بِشيْ، إِحْسِبْ دَايْتِي مَدْيُونيَّ عَلِيَّ. 19 وِآنِي بُولُسْ كَتَبْتْ دَايْتِي بِخَطْ يَدِّي: آنِي أَسَدِّدْ الْدِّينْ وِمَا بِفَكَّرَكْ إنَّكْ مّدْيُونْ بِنَفْسَكْ كَمَانْ. 20 نَعَمْ أَيُّهَا الأَخْ، أَتْمَنَّ مِنَّكْ أَنْ إتْفِيدْنِي، فِي الْرَّبْ، بِالْمَعْرُوفْ دَايْتِي: أَنْعِشْ عَوَطْفِي فِي الْمَسِيحْ 21 عَلَشَانْ آنِي مِتَأَكِّدْ إنَّكْ هَتْطِّيعْنِي، كَتَبْتْ لِيكْ الْرِّسَالَةْ دَايْتِي، عَلَشَانْ آنِي عَارِفْ هَتَعْمِلْ أَكْتَرْ مِنْ إللِّي طَلَبْتُهْ مِنَّكْ. 22 وَفِي حَاجَةْ كَمَانْ، جَهِّزْ لِيَّ مَكَانْ عِنْدَكْ لِلإجَامَةْ، عَلَشَانْ بِإسْتِجَابَتْ صَلَوَاتْكُمْ هَكُونْ مَعْكُمْ. 23 يِسَلِّمْ عَلِيْكْ أَبَفْرَاسْ، رَفيِجِي فِي سِجْنِي فِي الْمَسِيحْ يَسُوعْ، 24 وِكَمَانْ مُرْجُسْ، وِأَرِسْتَرْخُسْ، وِدِيمَاسْ، وِلُوجَا إِللِّي شَغَّالِينْ مَعِي. 25 وِنَعْمَةْ رَبِّنَا يَسُوعْ الْمَسِيحْ إِتْكُونْ مَعْ رُوحْكُمْ!