1 بَعْدْ إِكْدِهْ عَدَّى يَسُوعْ بُحَيرِةْ الْجَلِيلْ، وِكَمَانْ لِيهَا إِسْمْ تَانِي، بُحَيرِةْ طَبَرِيَّةْ، لِنَاحْيِةْ تَانْيَةْ، 2 وَمَشُو وَرَاهْ جَمْعْ كَتِيرْ مِنْ الْنََّاسْ عَلَشَانْ شَافُو مُعْجِزَاتْ كَتيرَةْ مِنَّهْ فِي شْفَى الْمَرْضَى. 3 وَطِلِعْ يَسُوعْ عَالْجَبَلْ وَجَعَدَ هُنَكَّ مَعْ تَلامِيذَهْ. 4 وِكَانْ عِيدْ الْفِصْحْ الِيَهُودْ جِرَيِّبْ. 5 وِلمَّا يَسُوعْ شَافْ جُمْهُورْ كَتِيرْ مِنْ الْنَّاسْ جَايْ لِيهْ، جَالْ لِفيلِبُّسْ: "مِنْ فِينْ نِشْتِرِي وَكْلْ عَلَشَانْ نَأَكِّلْ كُلْ الْنَّاسْ دَايْتِي؟". 6 وِجَالْ يَسُوعْ الْكَلامْ دَايْتِي عَلَشَانْ يِمْتِحِنْ فِيلِبُّسْ، عَلَشَان يَسُوعْ كَانْ عَارِفْ آيْهْ إللِّي هَيِسَاوِيهْ بَعْدْ إكْدِهْ. 7 وِجَالْ لَهْ فِيلِبُّسْ: "حَتَّى لَوْ اشْتَرِْيْنَا خُبْزْ بِمِيتِينْ دِينَارْ، مَا بِكَفِّي حَتَّى لَوْ وَاحِدْ أَخَدْ حِتَّةْ صِغَيَّرةْ مِنْ الْخُبْزْ!" 8 وِجَالْ لَهْ أَنْدْرَاوُسْ، أَخُو سِمْعَانْ بُطْرُسْ، وَهُوَّ وَاحِدْ مِنْ تَلامِيذَهْ: 9 "فِي إهْنِهْ وِلْدْ صَغيِرْ عَنْدَهْ خَمْسَةْ أَرْغِيفَةْ شِعِيرْ وَسَمَكْتِينْ إِصْغَارْ. وَآيْهْ دَهْ عَلَشَانْ يِكَفِّي الْجَّمْعْ الْكَتِيرْ؟" 10 وَجَالْ يَسُوعْ: "جَعِّدُو الْنَّاسْ!". وِكَانْ إهْنُكَّ عُشْبْ كَتِيرْ. وِجَعَدْ الْرِجَّالْ، وِكَانُو حَوَالِي خَمَسْ تَالافْ رَاجِلْ. 11 فَأَخَذْ يَسُوعْ الأَرْغِفَةْ الْخَامْسَةْ وَشَكَرْ، وَوَزَّعْهَا الْنَّاسْ إِللِّي جَاعْدِينْ، حَسَبْ إِحتِياجْ كُلْ وَاحِدْ، وَزَّعْ كَمَانْ مِنْ الْسَّمَكْتِينْ. 12 وِلَمَّا شِبْعُو، جَالْ يَسُوعْ لِتَلامِيذَهْ: "لِمُّو كِسَرْ الْخُبزْ إللِّي زَادَتْ عَلَشَانْ مَا يِضِيعْ شَيْ!". 13 وِجَمَّعُوهَا، وِمَالُو إتْنَعْشَرْ جُفَّةْ مِنْ كِسِرْ الْخُبْزْ إللِّي فَضَلِتْ عَنْ الآكْلِينْ خَمْسَةْ أَرْغِيفَةْ الْشِّعِيْرْ. 14 فَلَمَّا شَافْ الْنَّاسْ الْمُعْجَِزةْ إِللِّي صَنَعْهَا يَسُوعْ جَالُو: "أَكِيدْ هُوَّ دَايْتِي الْنَّبِي إللِّي جَايْ لِلْعَالَمْ". 15 وَعِرِفْ يَسُوعْ إِنَّهُمْ عَاوْزِينْ يِجُو يِخْطَفُوهْ ويِنَصِّبُوهْ مَلِكْ عَلِيْهُمْ، فَرَاحْ تَانِي إِلَى الْجَبَلْ لِوَحْدَهْ. 16 وَِلَمَّا إِجَى الْمَسَا نِزِلْ تَلامِيذَهْ لِلْبِحَيْرَةْ، 17 وِرِكْبُو جَارِبْ وِكَانُو رَايْحِينْ لِمَنْطِجَةْ كَفْرَ نَاحُومْ الْضِّفَّة الْشَّطْ الْتَّانِي مِنْ الْبِحِيْرَةْ. وِالْدِنْيةْ عَتَّمِتْ وِيَسُوعْ مَا كَان وَصَلْ لِيهُمْ بَعَدْ. 18 وِهَبَّتْ رِيحْ جَوِيَّةْ وِصَارْ الأَمْواجْ عَاليَةْ وَهَايْجَةْ كَتِيرْ. 19 وَلَمَّا مَاشُو فِي الْبِحَيْرَةْ تَلاتْ أَرْبَعَةْ أَمْيَالْ، شَافُو يَسُوعْ مَاشِي عَلَى مَايِّةْ الْبِحَيَرةْ، وِكَانْ بِجَرِّبْ عَلَى جَارِبْ بِتاعْهُمْ، فَخَافُو، 20 وَطَمَّنْهُمْ يَسُوعْ وِجَالْ لَهُمْ :" أَنَا هُوَّ لا إتْخَافُو!". 21 وِكَانُو عَايْزِيِنْ يِدَخِّلُو الْجَارِبْ، وَوَصَلُو باِلْجَارِبْ الْمَكَانْ إللِّي رَايْحِينْ لَهْ. 22 وَفِي الْيُومْ الْتَّالِي، مَا لَجُو الْجَمْعْ إللِّي بَاتُو عَلَى الْضِفَّةْ الْمُجَابْلَةْ مِنْ الْبِحَيْرَةْ إِلَّا جَارِبْ وَاحِدْ. وِكَانُو عَارْفِينْ أَنَّ يَسُوعْ مَا رِكِبْ الْجَارِبْ مَعْ إتْلامِيذَهْ (إمْبَارِحْ)، لَكِنْ اسْتَجَلَّهْ الْتَّلامِيذْ لوَاحْدِيهِمْ. 23 لَكِنْ بَعدْ الْجَوَارِبْ مِنْ طَبَرِيَّة، رَسَتْ بِالْجُرْبْ الْمَكَانْ إِللِّي أَكَلُو فِيهْ الْخُبْزْ بَعْدْ أَنْ شَكَرَ الْرَبْ يَسُوعْ عَلِيْهْ. 24 فَلَمَّا عَرَفْ الْنَّاسْ أَنَّ يَسُوعْ مَا كَانْ إهْنُكَّ مَعْ إِتْلامِيذَهْ، 25 وَرَاحُو لِمَنْطِجَةْ كَفْرَ نَاحُومْ يِدَوِّرُو عَلَى يَسُوعْ. وِلَمَّا لاجُوُهْ عَلَى جَانِبْ الْتَّانِي مِنْ الْبِحِيْرَةْ، جَالُو لَهْ: "يَا مُعَلِّمْ، مِيتَا وَصَلْتْ لِهْنِهْ؟" 26 وِجَاوَبْهُمْ يَسُوعْ: "الْحَجْ الْحَجْ أَجُولْ لَكُمْ: أَنْتُمْ مَا بِتْدَوْرُو عَليِّ عَلَشَانْ شِفْتُو الْمُعْجِزَاتْ، لَكِنْ بِتْدَوْرُو عَليِّ عَلَشَلنْ أَكَلْتُمْ الْخُبْزْ وَشِبِعْتُمْ. 27 لا تِجْرُو وَرَا الْطَّعَامْ الْفَانِي ، لَكِنْ وَرَا الْطَّعَامْ الْبَاجِي لِلْحَيَاةْ الأَبَدِيَّةْ، إِللِّي يُعْطِيكُمْ إِيَّاهْ ابْنْ الإِنْسَانْ، عَلَشَانْ الْطَّعَامْ دَايْتِي وَضَعَ اللهْ الآبْ خِتْمَهْ عَلِيْهْ". 28 فَسَألوُهْ: "كِيِفْ نَعْمَلْ الأَعْمَالْ إللِّي يِرِيدَهْ اللهْ؟" 29 جَاوَبْهُمْ يَسُوعْ: "الْعَمَلْ إللِّي يِرِيدَهْ اللهْ هُوَّ أَنْ تُؤمِنُو بَاللِّي بَعَتَهْ". 30 فَسَألُوهْ: "آيْهْ الْمُعْجِزَةْ إللِّي بِتْبَرْهِنْ بِهَا كَلامَكْ تَنْشُوفْهَا وَنْآمِنْ بِيكْ؟ آيْهْ تِجْدَرْ تَعْمِلْ؟ 31 أَبَاءْنَا أَكَلُو الْمَنْ فِي الْبَرِّيَةْ زَيْ مَا هُوَّ مَكْتُوبْ فِي الْكِتَابْ: إِدَّاهُمْ خُبْزْ مِنْ الْسَّمَا عَلَشَانْ يَاكْلُو!" 32 فَجَالْ لَهُمْ يَسُوعْ: "الْحَجْ الْحَجْ أَجُولْ لَكُمْ: أَنَّ مُوسَى مَا عَطَاكُمْ خُبْزْ مِنْ الْسَّمَا، 33 لَكِنْ أَبُويِّ هُوَّ إللِّي يُعْطِيكُمْ خُبْزْ الآنْ خُبْزْ الْسَّمَا الْحَجِيجِي وَخُبْزْ اللهْ هُوَّ الْنَّازِلْ مِنْ الْسَّمَا إللِّي بِيَعْطِي حَيَاةْ لِلْعَالَمْ". 34 جَالُو لَهْ: "يَا سَيِّدْ، إدِّينَا مِنْ خُبْزْ دَايْتِي كُلْ الْوَكْتْ لِينَا". 35 وِجَالْ لَهُمْ يَسُوعْ: "آنِي هُوَّ خُبْزْ الْحَيَاةْ. إللِّي يِجِينِي لا يَِجُوعْ، وَاللِّي يُؤمِنْ بِي لَا يَعْطَشْ أَبَدَاً. 36 لَكِنْ جُلْتُلْكُمْ أَنَّكُمْ شِفْتُونِي وِمَا آمَنتُمْ ، 37 وَلَكِنْ كُلْ مَا يَعْطِيهِ الآبْ لِي هَيِجِينِي، وَاللِّي جِينِي مَا بَارمِيِهْ بَرَّةْ . 38 آنِي مَا نِزِلْتْ مِنْ الْسَّمَا، عَلَشَانْ أَعْمِلْ إِرادْتِي، لَكِنْ عَلَشَانْ أَعْملْ إِرَادة إللِّي بَعَتْنِي. 39 وَإِرَادْتَهْ هِيَّ مَا أَخَلِّي حَدَاً مِنْ إللِّي أَعْطَانِي يِهْلَكْ لَكِنْ أَجِيمُهْ فِي الْيُومْ الآخِيرْ ، 40 نَعَمْ! مَشِيئَةْ أَبُويِّ هِيَّ أَن كُلْ مَنْ يِشُوفْ الابْنْ وَيِآمِنْ بِيهْ إتْكُونْ لَهْ الْحَيَاةْ الأَبَدِيَّةْ، وِآنِي أَجِيمُهْ فِي الْيُومْ الأَخِيِرْ". 41 وَبَدَا الْيَهُودْ يِتْذَمَّرُو عَلِيْهْ لأَنَّهُ جَالْ: "آنِي هُوَّ الْخُبْزْ إللِّي نِزِلْ مِنْ الْسَّمَا". 42 وِجَالُو: "مِشْ هُوَّ دَهْ يَسُوعْ ابْنْ يُوسِفْ، إللِّي نَعْرِفْ أَبُوهْ وَأُمُّهْ، كِيِفْ يِجُولْ: آنِي نِزِلْتْ مِنْ الْسَّمَا؟" 43 وِجَاوَبْهُمْ يَسُوعْ: "كِفَايَةْ تَذمُّرْ بَيْناَتْكُمْ! 44 مَا يِجْدَرْ حَدَاً يِجِي لِي إلاَّ إِذَا جَزَبَهْ الآبْ إللِّي أََرْسَلَنِي وِآنِي أَجِيمُهْ فِي الْيُومْ الأَخِيرْ. 45 وِإِجَى فِي كُتُبْ الأَنْبِيَا : هَيِتْعَلَّمْ الْجَمِيعْ مِنْ اللهْ. وَكُلْ مِينْ يِسْمَعْ الآبْ وَيِتْعَلَّمْ مِنَّهْ يِجِي إِلَيَّ . 46 وَمِشْ مَعْنَى إكْدِهْ إِنَّ حَدَاً شَافْ الآبْ: وَمَا حَدَاً شَافْ الآبْ إلَّا إللِّي كَانْ مَعْ اللهْ. وَهُوَّ وَحْدَهْ شَافْ الآبْ . 47 الْحَجْ الْحَجْ أَجُولْ لَكُمْ: كُلْ مَنْ يِآمِنْ بِي لِيهْ الْحَيَاةْ الأَبَدِيَّةْ. 48 آنِي هُوَّ خُبْزْ الْحَيَاةْ. 49 أَكَلُو أَبَائكُمْ الْمَنْ فِي الْبَرِّيَّةْ، وِبَعْدْ مَا خَلَّصُو عُمْرُهُمْ مَاتُو، 50 وَلَكِنْ إهْنِهْ الْخُبْزْ إللِّي نِزِلْ مِنْ الْسَّمَا عَلَشَانْ يَاكُلْ مِنَّهْ الإِنْسَانْ وَمَا يِمُوتْ . 51 آنِي هُوَّ الْخُبْزْ الْحَيّْ إللِّي نَزَلْ مِنْ الْسَّمَا. كُلْ مَنْ يَاكُلْ الْخُبْزْ دَايْتِي يَعِيشْ لِلأَبَدْ. وَالْخُبْزْ اللِّي أَجَدِّمُوهْ آنِي، هُوَّ جَسَدِي، أَضَحِّي بِيهْ عَلَشَانْ يَحْيَا الْعَالَمْ". 52 وِالْكَلامْ دَايْتِي عَمَلْ جِدَالْ جَوِي بَينْ الْيَهُودْ، وَبَدُو يِتْسَاءَلُو: "كِيفْ يِجْدَرْ دَايْتِي يَعْطِينَا جِسْمُهْ عَلَشَانْ نَاكْلَهْ؟" 53 فَجَالْ لَهُمْ يَسُوعْ: "الْحَجْ الْحَجْ أَجُولْ لَكُمْ: لَوْ مَا أَكَلْتُمْ جَسَدْ ابْنْ الإِنْسَانْ وَشِرِبْتُمْ دَمَّهْ مَا يِكُونْ فِي حَيَاةْ جُوَّاكُمْ. 54 مينْ يَاكُلْ جَسَدِي وَيِشرَبْ دَمِّي، لِيهْ حَيَاةْ أََبَدِيَّةْ، وِآنِي أَجِيمُهْ فِي الْيُومْ الأَخِيرْ، 55 عَلَشَانْ جَسَدِي هُوَّ الْطَّعَامْ الْحَجِيجِي، وَدَمِّي هُوَّ الْشُّرْبْ الْحَجِيجِي. 56 كُلْ مَنْ يَاكُلْ جَسَدِي وَيَشْرَبْ دَمِّي، يِثْبَتْ فِيَّ وِآنِي فِيهْ. 57 وَكِيِفْ مَا آنِي أَحْيَا بَالآبْ الْحَيْ إللِّي بَعًتْنِي، وِكَمَانْ كُلْ مَنْ يَاكِلْنِي يَحْيَا بِي. 58 دَايْتِي هُوَّ الْخُبْزْ إللِّي نِزِلْ مِنْ الْسَّمَا، وِكَمَانْ هُوَّ مِشْ الْمَنْ إللِّي أَكَلُو أبَائكُمْ وَبَعَدْ الْعُمْرْ مَا خِلِصْ مَاتُو. وَكُلْ مَنْ يَاكُلْ الْخُبْزْ دَايْتِي يَحْيَا إِلَى الأَبَدْ". 59 وِجَالْ يَسُوعْ الإِمُورْ دَايْتِي فِي الْمَجْمَعْ وَكَانْ يِعَلِّمْ فِي كَفْرَنَاحُومْ. 60 فَلَمَّا سِمْعُو إِكْتَارْ مِنْ إِتْلامِيذَهْ جَالُو: "الْتَعْلِيمْ دَايْتِي صَعَبْ! مِيِنْ يِجْدَرْ يَعْمِلْ بِالْكَلامْ دَايْتِي؟" 61 فَعِلِمْ يَسُوعْ بِدَاخْلَهْ أَنَّ إتْلامِيذَهْ بِيتْذَمَّرُو وَسَأَلْهُمْ: "الْكَلامْ دَايْتِي يِخَلِّكُمْ تِشِكُّو فِي نُفُوسْكُمْ ؟ 62 كِيفْ تَعْمِلُو لَوْ شِفْتُو ابْنْ الإِِنْسَانْ صَاعَدْ زَيْ مَا كَانْ مِنْ جَبْلْ؟ 63 الْرُّوحْ هُوَّ إللِّي يَعْطِي الْحَيَاةْ، أَمَّا الْجَسَدْ مَا بِفِيدْ شَيْ. الْكَلامْ إللِّي كَلَّمْتَكُمْ بِيهْ هُوَّ رُوُحْ وَحَيَاةْ. 64 وَلَكِنْ بَعَضْ مِنْكُم لا يِآمِنْ!" وِجَالْ يَسُوعْ كُلْ دَايْتِي عَلَشَانْ هُوَّ عِرِفْ مِنْ البِدَايَةْ مِيِنْ إللِّي مَا أَمَانُو بِيهْ، وَمِيِنْ إللِّي هَيِخُونَهْ. 65 وَكَمَّلْ يَسُوعْ كَلامَهْ وَجَالْ: "عَلَشَانْ إكْدِهْ جُلْتْ لِيكُمْ: لا يَجْدَرْ حَدَاً يِجِي لِيَّ إللِّي أَعْطَاهْ الآبْ لِي". 66 مِنْ وَكْتْ دَايْتِي إِكْتَارْ سَابُوهْ مِنْ أَتْبَاعَهْ ، وَمَا عَادُو يَتْبَعُوهْ! 67 وِجَالْ يَسُوعْ لِلأَتْنَعْشَرْ تِلْمِيِذْ : "عَاوْزِينْ أَنْتُو كَمَانْ تِمْشُو وَتِتْرِكُونِي ذَيِّهِمْ؟" 68 وَجَاوْبَهْ سِمْعَانْ بُطْرُسْ: "لِمِينْ إِنْرُوُحْ يَا رَبْ وَعَنْدَكْ كَلامْ الْحَيَاةْ اللأَبَدِيَّةْ. 69 إِحْنَا آمَنَّا وِعَرِفْنا إِنَّكْ جُدَّوُسْ اللهْ!" 70 فَجَالْ يَسُوعْ: "مِشْ انْتُمْ اللأَتْنَعْشَرْ إللِّي آنِي أَخْتَرْتَكَمْ، وَمَعْ ذَلِكَ وَاحِدْ مِنْكُمْ إِشْطَانْ؟" 71 وَكَانْ يِجْصُدْ يَهُوُذَا وَلَدْ سِمْعَانْ الأَسْخَرْيُوطِيّْ، لأَنَّ وَكَانْ وَاحِدْ مِنْ أَتْنَعْشَرْ تَلْمِيذْ!