1 وَلَمَّا عِلِمْ َالْرَبْ أنَّ الْفَرّيسِيّينَ سِمْعُوا إنَّهْ يِجَمِّعْ وَيُعَمِّدْ تَلامِيذْ أَكْتَرْ مِنْ يُوحَنَّا، 2 مَعْ أَنَّ يَسُوعْ مَا كَانْ هُوَّ إللِّي بِعَمِّدْ لَكِنْ تَلامِيذَهْ، 3 مِشِى مِنْ مَنْطِجَةْ الْيَهُودِيَّةْ وَرَاحْ تَانِي لِمَنْطِجَةْ الْجَليِلْ. 4 وَكَانْ لازِمْ لِيهْ يِمُرْ َعَلَى مَنْطَجَةْ الْسَّامِرَةْ، 5 فَوَصَلْ لِبَلَدْ فِي الْسَّامِرَةْ إِسْمَهَا سُوخَارْ، وَهِيَّ جَرِيْبَةْ مِنْ الأَرْضْ إِللِّي إِدَّاهَا يَعْجُوبْ لِوَلَدَهْ يُوسِفْ. 6 وِكَانَتْ إهْنُكَّ بِيْرْ يَعْجُوبْ. وِلَمَّا جَعَدْ يَسُوعْ عَنْدْ الْبِيرْ عَلشَانْ تِعِبْ مِنْ الْسَّفَرْ، وِكَانْ الْوَكْتْ سَاعَتْهَا زَيْ الْسَّاعَةْ إتْنَعْشَرْ الْضُّهْرْ. 7 وَجَاتْ ِمْرَأةْ سَامِرِيَّةْ عَلَشَانْ تَاخُدْ مَايْ مِنْ الْبِيرْ، وِجَالْ لَهْ يَسُوعْ: "إِدِّيِنِي لِأَشْرَبْ" 8 لأَنْ تَلامِيذَهْ كَانُو رَاحُو عَالْمَدِينَةْ عَلَشَانْ يِشْتِرُو وَاكْلْ. 9 فَجَالَتْ الْمَرْأَة الْسَّامِرِيَّةْ: "أَنْتَ رَاجِلْ يَهُودِي وِآنِي إِمْرَأَةْ سَامِرِيَّةْ، كِيفْ تِطْلُبْ مِنِّي أَعْطِيكْ مَايْ لِتَشْرَبْ؟" وِجَالَتْ الْمَرْأَةْ الْكَلامْ دَايْتِي عَلَشَانْ الْيَهُودْ مَا بِيعَامْلُو الْسَّامِرِيِّيِنْ. 10 فَجاَلْ لَهَا يَسُوعْ: "لَوْ كُنْتِ تَعْرَفِي عَطِيَةْ اللَهْ، وَمِينْ دَهْ إللِّي بِجُلَّكْ: إزْجِينِي، لِطَلَبْتِ إنْتِ مِنَّهْ، وِكَانْ أدَّاكِي مَايْ الْحَيَاةْ!". 12 فَجَالَتْ لَهْ الْمَرْأَةْ: " يَا سِيِدِي، مَا مَعَكْ جَرْدَلْ، وَالْبِيرْ غَوِيْطَةْ جَوِيْ، فَكَيْفْ إتْجِيبْ الْمَايْ الْحَيَّ 11 هُوَّ أَنْتَ أَعْظَمْ مِنْ أَبُونَا يَعْجُوبْ إللِّي أَدّانَا الْبِيرْ دَايْتِي، وَشِرِبْ مِنِّهَا هُوَّ وَوَلادَهْ وَبَهَايمَهْ؟" 13 وِجَالْ لَهَا يَسُوعْ: "كُلْ إللِّي يَشْرَبْ مِنْ الْمَايَّ دَايْتِي يَعْطَشْ كَمَانْ. 14 وَكُلْ مَنْ يَشْرَبْ مِنْ الْمَايْ إلَّلآنِي أدِّيْهَا مَا يَعْطَشْ بَتَاتَاً، لَكِنْ الْمَايْ إلَّلآنِي أَدِّيهْ تَصِيرْ جُوّاهْ يَنْبُوعْ مَايْ وِيَفِيضْ وِيَعْطِي حَيَاةْ أَبَدِيَّةْ". 15 فَجَالِتْ لَهْ الْمَرْأَةْ: "يَا سِيدِي إِدِّينِي الْماَيَّ دَايْتِي عَلَشَانْ مَا أَعْطَشْ تَانِي وَأَجِي إِمْلا مَايَّ مِنْ إهْنَهْ ". 16 فَجَالْ لَهَا يَسُوعْ: "رُوحِي نَادْمِي عَلَى جُوزِكْ وِتَعَالِي لِهْنَهْ تَانِي". 17 فَجَالَتْ الْمَرْأَةْ: "مَالِيشْ جُوزْ!" فَجَالْ لَهَا يَسُوعْ: "جُلْتِ الْصَّوَابْ مَا لِيكِ جُوزْ، 18 عَلَشَانْ كَانْ خَمْسْ أَجْوَازْ لِيكِ ، وِالْرَاجِلْ إللِّي أَنْتِ عَايْشَهْ مَعَاهْ مَنُّو جُوزِكْ. كَلامِكْ مَظْبُوطْ حَجِيجِي". 19 جَالَتْ لَهْ الْمَرْأَة" "يَا سَِيِّدِي، أَنَا شَايْفَةْ إنَّكْ أَنْتَ نَبِي. 20 أَجْدَادْنَا عَبَدُو فِي الْجَبَلْ دَايْتِي، وَانْتُمْ الْيَهُودْ بِتْجُوُلُو لازِمْ الْنَّاسْ تَعْبُدْ رَبَّنَا فِي أُورُشَلِيمْ". 21 فَجَالْ لَهَا يَسُوعْ: "يَا امْرَأَةْ، صَدِّجِينِي رَاحْ يِجِي الْوَكْتْ وَتُعْبُدُو الآبْ مِشْ عَالْجَبَلْ دَايْتِي وَلا فِي أُورُشَلِيمْ. 22 إِنْتُمْ السَّامِرِييِّنْ إِبْتِعْبِدُو إللِّي مَا تَعْرَفُوهْ، وَاحْنَا الْيَهُودْ إِبْنَعْرِفْ مِينْ إللِّي إبْنِعْبُدُهْ، عَلَشَانْ الْخَلاصْ بِيِجِي مِنْ عَنْدْ الْيَهُودْ. 23 وَلَكِنْ هَيِجِي وَكْتْ، وَجِهْ، لَمَّا يَعْبُدْ الْعَابِدِينْ الْحَجِيجِييِّنْ الآبْ بِالْرُوحْ وَبِالْحَجْ. عَلَشَانْ الآبْ عَاوِزْ الْعَابِدِينْ زَيْ دُولْ. 24 اللهْ رُوحْ، عَلَشَانْ إكْدِهْ لابُدْ الْعَابِديْنْ يَعْبِدُوهْ بِالْرُّوحْ وَبِالْحَجْ". 25 فَجَالَتْ لَهْ الْمَرْأةْ: "آنِي أَعْرِفْ أَنَّ الْمَسِيَّا، أَيْ الْمَسِيحْ، جَايْ، وِلَمَّا يِجِي هَيِجُلْنَا كُلْ شَيْ". 26 فَجَالْ لَهَا يَسُوعْ: "آنِي هُوَّ الْمَسِيَّا إللِّي بِكَلِّمِكْ". 27 وَجِهْ تَلامِيذَهْ فِي الْدَجِيجَةْ دَايْتِي، وِإِتْعَجَّبُو كَتِيرْ جَوِيْ لأَنَّهُمْ شَافُوهْ بِيِتْكَلَّمْ مَعْ إِمْرَأَة، وَمَا حَدَاً مِنْ التَّلاِمِيذْ سَأَلْ لَهْ : "آيهْ إللِّي عَايْزَهْ؟ "أَوْ "بِيِتْكَلِّمْهَا لِيهْ؟" 28 فَالْمَرْأَة سَابِتْ جَارِّتْهَا عَنْدْ الْبِيرْ وَرِجْعِتْ عَلَى بَلَدْهَا، وِجَالَتْ لِلْنَاسْ: 29 "تَعَالُو شُوفُو رَاجِلْ جَالْ لِي عَلَى كُلْ إللِّي عَمَلْتْ فِي عَيشْتِي. يِمْكِنْ يِكُونْ هُوَّ الْمَسِيحْ؟". 30 فَسَابُو الْضَّيْعَةْ وَجُمْ لِيَسُوعْ. 31 وَفِي الْوَكْتْ دَايْتِي كَانْ الْتَّلامِيَذَهْ بِيجُولُولَهْ: "يَا مُعَلِّم، كُلْ" 32 فَجَالْ لَهُمْ يَسُوعْ: "عِنْدِي وَكْلْ أَنْتُو مَا تَعْرِفُوهْ". 33 وَرَاحْ تلامِيذَهْ يِتْسَاءَلُو بَيْنَاتْهُمْ: "يِكُونْ حَدَاً جَابْلَهُ وَكْلْ؟" 34 وِجَالْ لَهُمْ يَسُوعْ: "الْوَكْلْ بِتَاعِي أَعْمِلْ إِرَادَةْ إللِّي أَرْسَلْنِي وِتَمِّمْ إِرَادْتَهْ. 35 لَمَّا تِيجُو تِزْرَعُو مِشْ أَنْتُمْ بِتْجُولُو: هَيِجِي حِصَادْ بَعَدْ أَرْبَعْ شُهُورْ! وِآنِي أَجُولُّوكُمْ: "فَتِّحُوعِيُونْكُمْ وَشُوفُو الْغِيطَانْ، دِلوَكِيتِي جِهْزِتْ لِلْحَصَادْ. 36 وَالْحَاصِدِ يَاخُدْ أُجْرِتَهْ، وَيَجْمَعْ مَحْصُولْ لِلْحَيَاةْ الأَبَدِيَّةْ، وِإكْدِهْ يِفْرَحْ الْزَّارِعْ وِالْحَاصِدْ كِلَّآتْهُمْ. 37 عَلَشَانْ يُصْدُجْ الْمَثَلْ إللِّي بِجُولْ: وَاحَدْ يِزْرَعْ، وِالتَّانِي يُحْصُدْ. 38 وِآنِي بَعَدْتْكُمْ عَلَشَانْ تُحْصُدُو مَحْصُولْ إللِّي مَا تَعَبْتُو فِيهْ، وَنَاسْ تَانْي تِعْبِو فِيهْ، وَأَنْتُمْ أَسْتَفَدْتُمْ مِنْ شُغْلُهُمْ". 39 فَآمَنْ بِيهْ إكْتَارْ مِنْ الْسَّامِرِيِّينْ مِنْ الْبَلَدْ دَيْتِي بِسَبَبْ كَلامْ الْمَرْأةْ الْسَّامِرِيَّة إللِّي كَانِتْ بِتْجُولْ وَبْتِشْهَدْ إنَّهْ: "جَالْ لِي كُلْ شَيْ عَمَلْتَهْ فِي عَيْشْتِي". 40 لَمَّا إجَى ليِهْ الْسَّامِرِيِّينْ، جَالو لَهْ خَلِّيكْ عَنْدِينَا، فَجَعَدْ إهْنُوكَّ يُوْمَيْنْ، 42 وِآمَنْ بِيهْ إِكْتَارْ جِدَّاً مِنْشَانْ كَلامَهْ، 41 وِجَالُو لِلْمَرْأَةْ الْسَّامِرِيَّة: "إِحْنَا مَا بِنْآمِنْ بِيهْ عَلَشَانْ كَلامِكْ، وِإحْنَا بِنْآمِنْ عَلَشَانْ سِمِعْناهْ بِوِدَنَّاهْ، وِإِحْنَا عَارْفِينْ أَنَّ الْرَّاجِلْ دَايْتِي مُخَلِّصْ الْعَالمْ بِالْحَجِيجَةْ" . 43 وِبَعْدْ الْيُوْمِيْنْ إللِّي جَعَّدْ فِي سُوخَارْ، مَشَى يَسُوعْ مِنْ مَنْطِجَةْ السَّامِرَةْ وَرَاحْ مَنْطِجَةْ الْجَلِيلْ، 44 مَعْ إِنَّهْ هُوَّ بِنَفْسَهْ جَالْ: "مَافِيشْ نَبِي كَرَامْتُهْ جَلِيلَهْ إلَّا فِي بَيْتَهْ وِبَيْنْ جَرَيْبَهْ". 45 وِكَانْ أَهْلْ الْجَلِيلْ رَاحُو لِمَدينَةْ أُورُشَلِيمْ، وِشَافُو كُلْ مَا عَمَلْ يَسُوعْ فِي عِيدْ الْفُصْحْ، عَلَشَانْ إِكْدِهْ رَحَّبُو بِيهْ لَمَّا جِهْ لِلْجَلِيلْ. 46 وِمَرَّةْ تَانْيَةْ رَاحْ يَسُوعْ لِمَنْطَجَةْ جَانَا بِالْجَليِلْ، لَمَّا حَوَّلْ الْمَايْ لِلْنَبِيدْ، وِكَانْ فِي مَنْطِجَةْ كَفْرَنَاحُومْ رَاجِلْ مِنْ خُدَّامْ الْمَلِكْ، وِكَانْ وَلَدَهْ عَيَّانْ. 47 وِلَمَّا سِمِعْ الْرَّجِلْ دَايْتِي أَنَّ يَسُوعْ إِجَى مِنْ الْيَهُودِيَّةْ لِلْجَلِيلِْ، إِجَى لِيَسُوعْ يِتْرَجَّاهْ أَنَّ يِرُوحْ لِكَفْرَنَاحُومْ وَيِشْفِي وَلَدَهْ إِللِّي جَرَّبْ يِمُوتْ. 48 وِجَالْ لَهْ يَسُوعْ: "أَنْتُو مَا بِتْآمْنُو إلِاَّ إتْشُفُو بُرهَانْ الْمُعْجِزَاتْ وِالْعَجَايِبْ!". 49 فَجَالْ الْرَّاجِلْ دَايْتِي لِيَسُوعْ: "يَا سِيدِي، تَعَالْ جَبْلْ مَا يِمُوتْ وَلَدِي!". 50 فَجَالْ لَهْ يَسُوعْ: "رَوَّحْ لِبَيْتَكْ! وَلَدَكْ حَيّْ!" فَآمَنْ الْرَّاجِلْ بِكَلامْ يَسُوعْ، فَمَشَى. 51 وَهُوَّ مَرَوَّحْ بَيْتَهْ جَابْلُهْ خَدَمَهْ وِجَالُو لَهْ وَلَدَكْ شَفَى، 52 فَسَأَلْهُمْ أَيْمْتَا شِفِى، فَجَالُو لَهْ "رَاحِتْ الْحُمَّى مِنُّو إِمْبَارِحْ الْسَّاعَةْ وَاحْدَهْ بَعْدْ الْضُّهْرْ". 53 فَعَلِمَ أَبُو الْوَلَدْ أَنَّ دَا الْوَكْتْ إللِّي جَالْ فِيهَا يَسُوعْ: "وَلَدَكْ شِفِي" فَآمَنْ الْرَاجِلْ وَكُلْ عَايْلِتَهْ. 54 وِكَانَتْ دَايْتِي الْمُعْجِزَةْ الْتَّانْيَةْ إللِّي عَامَلْهَا يَسُوعْ بَعَدْ مَا إِجَى مِنْ الْيَهُودِيَّةْ إلَى الْجَلِيلْ.