1 فِي الْبِدَايَة كَانْ الْكِلْمَةْ، وِالْكِلْمَةْ كَانْ عِنْدْ اللهْ. وِكَانْ الْكِلْمَةْ هُوَّ اللهْ. 2 هُوَّ فِي الْبِدَايَةْ كَانْ عِنْدْ اللهْ. 3 بِيهْ كَانْ كِلْ شَيْ، وَبغَيْرَهْ مَا كَانْ مِنْ مَوْجُودْ شَيْ. 4 كَانَتْ الْحَيَاةْ فِيِهْ. وِحَيَاَتَهْ لِلنَّاسْ نُورْ. 5 وِالْنُّورْ يِضَوِّي فِي الْعَتْمَةْ، وِالْعَتْمَةْ مَا تِجْدَرْ عَلِيْهْ. 6 ظَهَرْ إِنْسَانْ أَرْسَلَهْ اللهْ، إسْمَهْ يُوحَنَّا، 7 جِهْ ليَشْهَدْ لِلْنُّوْرْ، عَلَشَانْ يِآمِنْ الْكِلْ بِوَسْتِطَهْ. 8 مَا كَانْ هُوَّ الْنُّورْ، لَكِنْ شَاهِدْ لِلْنُّورْ. 9 الْنُّورْ الْحَجْ كَانْ إِللِّي يِنَوِّرْعَلَى كِلْ إِنْسَانْ لِلْعَالَمْ جَايْ. 10 كَانْ فِي الْعَالَمْ، وِبِيْهْ إتْكَوَّنْ الْعَالَمْ، الْعَالَمْ مَا عَرْفَهْ. 11 وَجِهْ لِبِيْتَهْ ، وِاهْلِ بِيْتَه ْمَا جِبْلُوهْ. 12 لَكِنْ كُلْ إللِّي جِبْلُوهْ، يَعْنِي إللِّي هُمَّا بِاسْمَهْ آمْنُو، مَنَحْهُمْ الْحَجْ عَلَشَانْ يِصِرُوُ أَوْلادْ اللهْ، 13 وِدُولْ مَا إتْوَلَدُو مِنْ دَمْ وَلا مِنْ إِرَادِةْ جَسَدْ، وَلَا مِنْ إِرَادَةْ بَشَرْ، لَكِنْ مِنْ اللهْ. 14 وِالْكِلْمَةْ صَارْ بَشَرْ، وِعَاشْ وَسْطِيْنَا، وِإِحْنَا شُفْنَا مَجْدَهْ، مَجْدْ ابنْ وَحِيدْ عَنْدْ الآبْ، وَهُوَّ مَلْيَانْ بالنَّعْمَةْ وِالْحَجْ. 15 شِهِدْ لَهْ يُوحَنَّا وَهَتَفْ وَجَالْ "هُوَّ دَايْتِي إِللِّي جُلْتْ عَنَّهْ: أَنَّ اللِّي جَاي بَعْدِيَّ إتْجَدَّمْنِي، لأَنَّهْ كَانْ جَبْلِيَّ". 16 وَكُلِّنَا مِنْ فِيْضَهْ نِلْنَا وِنَعْمَةْ فُوْجْ نَعْمَةْ أَخَدْنَا. 17 لأَنْ الْشَّرْيَعَةْ بِمُوسَى إِتْعَطَتْ، لَكِنْ الْنَّعْمَةْ وِالْحَجْ بِيَسُوعْ الْمَسِيحْ صَارَتْ لِينَا. 18 مَا حَداً شَافْ اللهْ ابَدَاً. وَلَكِنْ الإبْنْ الْوَحِيدْ إللِّي عَنْدْ الآبْ هُوَّ جَالْ لِينَا عَنُّهْ . وَدَايْتِي هِيَّ شِهَادَةْ يُوحَنَّا الْمَعْمَدَانْ. 19 لَمَّا بَعَتْ الْيَهُودْ الْكَهَنَةْ وِاللآوِيِّينْ يِسْألُوهْ: "أَنْتَ مِينْ؟" 20 فَاعْتَرَفْ وِمَا أَنْكَرْ، وِجَالْ وِأَجَرْ: " اَنْي مِشْ الْمَسْيحْ". 21 فَسَأَلُوه ْ: "أَنْتَ مِينْ تِبْجَى؟ إِنْتَ إِيلِيَا؟" فَجَالْ: "مِشْ آنِي". فَسَألُوهْ "أَنْتَ الْنَبِي؟" فَرَدْ "مِشْ آنٍي" 22 فَجَالُو لَهْ: "أَنْتَ مِينْ إِتْكُونْ، عَلَشَانْ إِنْرُدْ ْْالْجَوَابْ إللِّي بَعَتُونَا؟ أَنْتَ عَنْ نَفْسَكْ آهْ إِتْجُولْ؟" 23 فَجَالْ: "آنِي صُوتْ صَارِخْ فِي الْبَرِّيَة خَلُّو طَرْيجْ الْرَّبْ مُسْتَوِيَّا أَمَامْ الْرَّبْ، زَيْ مَا جَالْ الْنَّبِيْ إِشَعْيَا". 24 وِكَانْ الْمَبْعُوتِيِنْ مِنْ الْفِرِّيسِيِّينْ، 25 فَسَأَلُوهْ: "لِيهْ بِتْعَمِّدْ وِانْتَ مُشْ الْمَسِيحْ، وَلا إيْلِيَّا، وَلا الْنَّبِي إِنْتَ؟" 26 فَرَدْ يُوحَنَّا وِجَالْ: "آنِي باِلْمَايْ بِعَمِّدْ، لَكِنْ وَسْطِيكُمْ مَوْجُودْ إللِّي إِنْتُو مَا تَعْرَفُوهْ، 27 وِاللِّي بَعْدِيَّ جَايْ لَكِنَّهْ صَارْ جِدَّامِي ، وِآنِي مِشْ مُسْتَحِجْ أُفُكْ رِبَاطْ نَعْلَهْ ". 28 وِإللِّي حَصَلْ دِهْ كَانْ فِي بَيْتْ عَنْيَا، عَبَرْ الأٌرْدُنْ، فِي الْحِتَّة إللِّي كَانْ يُوحَنَّا فِيهَا بِعَمِّدْ. 29 وَفِي تَانِي يُومْ شَافْ يُوحَنَّا يَسُوعْ جَايْ لِيهْ، فَجَالْ بِصُوتْ عَالِي: "آدِي حَمَلْ اللهْ اللِّي رَاحْ يِشِيلْ خَطِيّةْ الْعَالَمْ . 30 هُوَّ دَايْتِي اللِّي جُلْتْ عَنَّهْ يِجِي رَاجِلْ بَعْدِيَّ وَصَارْ جِدَّامِي لأَنَّهْ كَانْ جَبْلِيَّهْ، 31 وِآنِي مَا كُنْتْ أَعْرِفَهْ فَجِيِتْ أَعَمِّْدْ بِالْمَايْ عَلَشَانْ يِبَانْ لإِسْرَائِيلْ". 32 يُوحَنَّا شِهِدْ وِجَالْ: "آنِي شُفْتْ الْرُّوحْ كِيفْ الْحَمَامَةْ نَازِلْ عَلِيْهْ مِنْ الْسَّمَا وِاسْتَجَرْ عَليْهْ. 33 وِآنِي مَا كُنْتْ عَارْفَهْ، لَكِنْ إِللِّي بَعَتْنِي بَالْمَايْ أَعَمِّدْ هُوَّ جَالْ لِي: "إللِّي هَاتْشُوفْ الْرُّوحْ نَازِلْ وِمُسْتَجِرْ عَلِيْهْ هُوَّ دَايْتِي إللِّي بِالرُّوحْ الْجُدُسْ يِعَمِّدْ. 34 وِآنِي شُفْتْ وِشِهِدْتْ أَنَّ هُوَّ دَايْتِي إِبْنْ اللهْ". 35 وِكَانْ فِي الْيُومْ تَانِي يَوحَنَّا وَاجِفْ هُنُكَّ وِمَعَاهْ إِتْنِيْنْ مِنْ تلامِيذَهْ، 36 فَبَصْ عَلَى يَسُوعْ وَهُوَّ مَاشِي وِجَالْ، "هُوَّ دَايْتِي حَمَلْ اللهْ". 37 فَمِشِى تِلْمِيذِيْنْ وَرَى يَسُوعْ لَمَّا سِمْعُو كَلامْ يُوحَنَّا . 38 وِإتْدَوَّرْ يَسوُعْ وِشَافْهُمْ تابْعِينَهْ فَجَالْ لَهُمْ: "آهْ إللِّي عَايْزينَهْ؟" فَجَالُو لَهْ: "رَبِّي، يَعْنِي يَا مُعَلِّمْ، أَنْتَ سَاكِنْ فِينْ؟" 39 فَجَالْ لَهُمْ: "تَعَالُو وِشُوفُو". فَرَاحُو وَشَافُو سَاكِنْ فِيْنْ، وِجَعَدُو عِنْدَهْ الْيُومْ دَايْتِي، وِكَانَتْ تَجْرِيْبَاً الْسَّاعَةْ أَرْبَعْ بَعْدْ الْضُّهْرْ. 40 وِكَانْ أَنْدْرَاوُسْ أَخُو سِمْعَانْ بُطْرُسْ وَاحِدْ مِنْ الْتِّلْمِيذِيْنْ إللِّي مَشُو وَرَا يَسُوعْ بَعْدْ مَا سِمْعُو كَلامْ يُوحَنَّا، 41 وِلَمَّا لَجَى أَخُوهْ سِمْعَانْ جَالْ لَهْ: "لَجِيْنَا الْمَسِيَّا" يَعْنِي الْمَسِيحْ. 42 وِجَالُو لِيَسُوعْ. فَبَصْ يَسُوعْ لَهْ وِجَالْ لَهْ: "إِنْتَ سِْمعَانْ إبْنْ يُونَا، وَرَاحْ سَمِّيكْ: صَفَا" اللِّي مَعْنَاهْ صَخْرَاً. 43 وَفِي الْيُومْ إللِّي بَعْدْ إكْدِهْ أَرَادْ يَسُوعْ يِرُوحْ مَنْطِجَةْ الْجَلِيلْ، فَلِجِي فِيلِبُّسْ، فَجَالْ لَهْ: "إتْبَعْنِي"، 44 وِكَانْ فِيلِبُّسْ مِنْ بَيْتْ صَيْدَا، بَلَدْ إِنْدْرَاوُسْ وِبُطْرُسْ. 45 فِيلِبُّسْ لِجِي نَثَنَائِيلْ، وِجَال لَهْ: "لَجِينَا إللِّي كَتَبْ عَنَّهْ مُوسَى فِي الْشَّرِيعَةْ ، وَفِي كُتُبْ الأَنْبِيَا يَسُوعْ إِبنْ يُوسُفْ إللِّي مِنْ الْنَّاصْرَة". 46 فَنَثَناَئِيلْ جَالْ لَهْ: "هُوَّ مِنْ النَّاصْرَة يِجِي شَيْ صَالِحْ؟" فَجَالْ لَهْ فِيلِبُّسْ: "تَعَى وِشُوفْ" 47 وِشَافْ يَسُوعْ نَثَنَائيِلْ جَايْ عَلِيهْ فَجَالْ عَنَّهْ: "بَالْحَجْ دَايْتِي إسْرَائِيلِي مَافِيشْ غِشْ فِيهْ". 48 وِسَأَلَهْ نَثَنَائِيِلْ: "مِنْ وَيْنْ تَعْرِفْنِي؟" أَجَابَهْ يَسُوعْ: "جَبْلْ مَا فِيلِبُّسْ يِنْدَهْلَكْ شُفْتَكْ وِأَنْتَ تَحْتَ شَجَرَةْ الْتِّيِنْ". 49 فَصَرَخْ نَثَنَائِيلْ وِجَالْ: "يَا مُعَلِّمْ أَنْتَ إِبْنْ اللهْ! أَنْتَ مَلِكْ إِسْرَائِيلْ" 50 فجَالْ لَهْ يَسُوعْ: " أَنْتَ آمَنْتْ عَلَشَانْ جُلْتْ لَكْ أَنِّ شُفْتَكْ تَحْتَ شَجَرَةْ الْتِّيِنْ؟ عَتْشُوفْ أَعْظَمْ مِنْ دَايْتِي!" 51 وِجَالْ لَهْ: "الْحَجْ الْحَجْ أَجُولْ لَكُمْ عَتْشُوفُو الْسَمَا مَفْتُوحَةْ وِمَلايْكَةْ اللهْ طَالْعِيِنْ وِنَازْلِيِنْ عًلَى إِبْنْ الإِنْسَانْ".