¹ Inzho, nubakwesu, a mutukombele aswe, kwaamba ati izwi lya Mwami lifwambaane kubeenzha alimwi lilemekwe, mbubona mbulya kashika kwenu, ² Kwaamba ati tukanununwe kuhwa ku bashi shibi alimwi u bantu babiyabi, kaambo takuli kuti boonse balikwete lushomo. ³ Pele Mwami u lashomeka, walo u lakamuzumya zumya u ku muchingilila kuhwa ku mubiyabi. ⁴ Tulikwete lushomo mu Mwami muli umwe, kwaamba ati mulakachichita alimwi mulakachilila u kuchita shintu nshitwakamulailila. ⁵ Leza naalulamike myonzo yenu ku lufwuno lwaka Leza alimwi u bulindizhi bwaka Kilisito. ⁶ Inzho tulamulailila, nubakwesu, mwizhina lya Mwami wesu Jeso Kilisito, kwaamba mutamuleka mukwesu uli woonse kukala bulyo a mana taponi kwiingayina u tunshiya nshiya ntumwakatambula kuhwa nkutubele. ⁷ Kaambo amwe lwenu nubeni mulizhi kwaamba chili kabotu kutwiiya nchitwaakuchita, kaambo katutali bakata nitwakaakuli amwe. ⁸ Twiina nitwakalya cha muntu uli woonse chakutalipila, pele twakasebezesha muunza u mashiku, kwaamba ati tutabi mukuli kuli umwe. ⁹ Twakachita bobo takuli kuti twaakwiina insana aali umwe pe, pele twakachita bobo kwaamba ati tube chitondezho kuli umwe, kwaamba ati mu twiiye uswe nchitwakaakuchita. ¹⁰ Lelyo nitwakaakuli amwe, twakaakumulailila ati, "Wezo u tazanda kusebeza teelele kulya." ¹¹ Kaambo twakateelela ati a kati kenu bamwi mbakata, tabazanda kusebeza, pele balalilanganya lwabo beni. ¹² Inzho kuli bali bolya tulabalailila u kubashinikizha mu Mwami Jeso Kilisito, kwaamba balyeelele kusebeza buliinzile u kulya chinkwa chabo beni. ¹³ Pele umwe, nubakwesu, mutabi nimuleka kuchita kabotu. ¹⁴ Alimwi naakuti umwi tachilila mazwi esu aali mu lukalata lolu, a mumuzhibe alimwi muleke kuyanana aze, kwaamba ati afwe insoni. ¹⁵ Pele mutamuchiti kuba shinkondonokwenu, pele a mumuchenjezhe u koya munyokwenu. ¹⁶ Inzho Mwami wa luumuno lwakwe mwini a mupe luumuno munzhila shoonse alimwi u mushiindi shoonse. Mwami abe amwe noonse. ¹⁷ Ume, ndi Paulu, ndakamulembela itashi lyangu ndimwini, nchi chitondezho kwibala ibala ndindakalemba. ¹⁸ Luse lwa Mwami wesu Jeso Kilisito lube amwe noonse. Ameni.