¹ Ici ecebo cakwa Yawe icaishile kuli Yeremiya kasesema ukulingana ne nko. ² Palwa Egupto, "ici cali pa mulalo wakwa Farao Neko, imfumu ya Egupto iyo iyali pa kakemishi ku mumana wa Yufrate. Uyu ewali umulalo uo imfumu ya Babiloni Nebuchadinesa yacimfishe mu mwaka walenga shine uwakwa Yehoyakimu umwana mwaume wakwa Yosia, imfumu yaku Yuda. ³ Pekanyeni inkwela ishinono ne shikalamba, kabili kabiyeni ku kulwa. ⁴ Pekanyeni bakabalwe benu muninepo, tantameni, fwalileni utumpompo twenu. Buuleni amafumo yenu ayafwa, fwaleni na malaya yenu aya fyela. ⁵ BBushe finshi ifyo na mona pano? Abena Egupto balya balafulumuka kulwa mwenso. Abashilika babo naba bacimfiwa. Icintiinya cili mpanga yonse, batonkwele ulubilo ulwine lwine, na kunuma tekwakuceba iyoo- ifi efya sosa Yawe. ⁶ Abalubilo nabafilwa ukwakufulumukila, abashilika nabafilwa ukumona umwakupusukila ku mumana wa Yufrate lubali lwa ku kapinda ka ku kuso, eko baletalansunkila no kuwa eko ba lewila. ⁷ Bushe nani ulya aletulumana ngo mumana wa Nailo, ulya aletumbana ngo mumana uuleposa ilyeshi? ⁸ Ala ni Egupto auletumbana ngo mumana uuleposa ilyeshi. Abena Egupto bali baletila abati ifwe twalaima tukumane icalo conse. Tulofye imisumba na bant bene abekalamo. ⁹ Imeni mwe bakabalwe akuyeni mwe maceleta, Lekeni abashilika bambe ukuya, abena Kushi na bena Puti, abaume aba kanshiwa baye ne nkwela, na Ludi abaume abakanshiwa mukuposa amata. ¹⁰ Ubo bushiku bukaba bushiku bwa cilandushi ubwakwa shikulu Yawe umwine wa fita ailelandula abalwani bakwe. Ulupanga lwakwe lwa laipaya apo lulefwaila, no kulenga umulopa upwe ku kusuma, pantu Yawe Lesa umwine wafita, aleleka ilambo, lubali lwa ku kapinda ka kukuso aka calo ka ku mumana wa Yufrate. ¹¹ We nacisunbgu wamu Egupto ima kabiye ku Gileadi, eko kafwaye umuti wakukundapa. Waliicusha ukubomfya imiti iingi nganshi, lelo tapaba muti uwingamuposha iwe nakalya. ¹² Abantu ba nko shonse nabomfwa ifyo imwe musebene, ne calo ciswilefe imisowa yenu, pantu umushilika aletalasukila ku mushilika mubiye na bonse babili emiwile." ¹³ Ili eshiwi Yawe aebele kasesema Yeremia ilyo Nebukadinesa imfumu yaku Babiloni aishile kukulwisha icalo ca Egupto: ¹⁴ "Umeni imbila mu mishi ya mu Egupto bilikisheni mu Migidoli na mu Memfisi na mu Tapanesi mutile, imeni muipekanye, pantu ulupanda luleshinguluka monse monse kukonaula bonse.' ¹⁵ Bushe cinshi ababulamba benu bawilile panshi? Tabakeminine, pa mulandu wa ine, ne Yawe, nimbawisha panshi. ¹⁶ Abashilika benu batalansuka no kuwa na bawa, elyo baleebana abati, 'imeni natuleya tubwelele ku calo cesu ku bantu besu, uleke tupusukeko ku lupanga lwa balwani.' ¹⁷ Farao imfumu yamu Egupto mwinikeni ishina ilipya ilya kuti, 'uwa congo icingi uupanga inshinta iyalinga.' ¹⁸ Napalifye ine umumi-efyasosa imfumu uwitwa ishina Yawe umwine wafita- nga filya fine ulupili lwa Tabo lwa sansukisha pali shonse, kabili ngafilya fine ulupili lwa Kameli lwasansuka mu lulamba lwa bemba, efyo na umo uwakumusansa imwe akesa. ¹⁹ Imwe mwe bena Egupto, longeleni calimo ifipe ifyakuya nafyo muli bunkole. Pantu Memfisi alasanguka icibolya, alaonaika takwakabe na wakwikalamo.' ²⁰ Egupto aba ngo musepela wa ngombe uukota uwaina lelo utushembele tulemwishila ukufuma ku kapinda ka kukuso. ²¹ Ne fita fya malipilo ifyo abena Egupto balemba incito baba nge fipontu fya ngombe ifyaina, awe nabo bene nolupwa, nababwelelamo ulubilo. Nabo bene nabafilwa ukushanshako, pantu nabubafikila ubushiku bwa finkunka, naibafikila inshita yakukandilwapo. ²² Abena Egupto pakufulumuka balesankanya nge nsoka, panbtu naba fulisha abalwani babi ababeshilile. Abalwani balebasansa na masembe, kwati bantu balesansa inkuni. ²³ Abalwani baletemaula umutengo wa Egupto, nangu wafumbisha-efyasosa Yawe. Bali imintapendwa nabacila na pali makanta ku bwingi. ²⁴ Umwana mwanakashi wa Egupti nasebana, nacimba ku bantu abafumine ku kapinda kakukuso." ²⁵ Yawe umwine wa fita, Lesa wakwa Israeli kabili aletila ati, "mwalamona ifyo ine nalakanda Amoni, umulungu wa mu musumba wa Tabesi, nalakandila kumo kwine na Farao ne calo ca Egupti, ne milungu ilya ine iyabamo, kumo kwine ne ntungulushi ishabamo. Nalakanda Farao imfumu ya mu gupti, pamo na bambi bene bonse abashinta imitima muli Farao. ²⁶ Ine ndeposa ku bafwaya ukubepaya kuli Nebukadinesa imfumu yaku Babiloni na kuli bacilolo bakwe. Lelo kwena kuntanshi abantu bakekala nakabili mu Egupto nge nshiku shakale-nine Yawe na sosa. ²⁷ Imwe mwe bana ba mubomfi wandi Yakobo, ala imwe mwilatunsha na mutima, imwe mwe bena Israeli ala imwe mwilatiina iyoo. Pantu ine nkamufumyako kuli ico calo cakutali nkapususha abana benu ku calo uko baikala bunkole. Mwe ba mwana Yakobo mukabwela, mukese ikala umutelelwe, takwakabe nowakumitinya nakalya. ²⁸ Mwilatunsha mitima, imwe mwe bana ba mubomfi wandi yakobo, pantu ine nkaba nenu-efyasosa Yawe-ine nkalofya umupwilapo abantu ba nko shonse abo namuposeleko, nomba imwe nshakamulofye umupwilapo iyoo. Nkalamusalapula, lelo mu mulinganya, nshakulamulekafye iyoo ukwabula ukumukanda."