¹ Elyo abakalamba bonse abafita, na Yohanani umwana mwaume wakwa Karea, Yezamiah umwana mwaume wakwa Hoshaiah, na bantu bonse abanono na bakalamba baishile kuli Yeremia kasesema. ² Basosele kuli ena abati, "Leka iwe utupapatileko ifwe. Tupepeleko ifwe kuli Yawe Lesa obe pali abo bantu abashalapo pantu ifwe tushele abanono mu mpendwa nga fintu iwe umwene. ³ Ipusha Yawe Lesa obe ukutweba ifwe inshita iyo tufwile ukuyamo elyo nefyo tufwile ukucita." ⁴ Elyo Yeremia kasesema asosele kuli bena ati, 'ine nimyumfwa. Moneni, ine ndi no kupepa kuli Yawe Lesa wenu nga fintu mwipwishe. Ifyo jfyonse Yawe ali no kwasuka, ine ndi no kumweba. Ine nshakafise nelyo cimo ukufuma kuli imwe." ⁵ Basosele kuli Yeremia abati, "lekeni Yawe abe nte yacine kabili iya cishinka pali ifwe, nga cakuti ifwe tatucitile ifintu fyonse ifyo Yawe Lesa obe atwebele ifwe ukucita. ⁶ Nelyo fingaba ifisuma nangu ifyabipa tuli no kunakila kwiwishi lya kwa Yawe Lesa wesu, kuli uyo tulekutumako, pakuti cibe icisuma kuli ifwe ilyo twanakila ishiwi lyakwa Yawe Lesa wesu." ⁷ Pakupwa kwa nshiku ikumi limo icebo cakwa Yawe caishile kuli Yeremia. ⁸ Kanshi Yeremia aitile kuli Yohananiya umwana mwaume wakwa Karea elyo na bonse abakalamba bafita pamo na ena, na ku bantu bonse abanono ukufika ku bakalamba. ⁹ Elyo asosele kuli bena ati, "ifo efyo Yawe Lesa wakwa Israeli -kuli uyo imwe mwatumineko ine ukuti ine mipapatileko kuli ena-asosa ati , ¹⁰ 'nga imwe mwabwelelamo no kwikala muli ici calo, elyo ine ndi nokumikula imwe nokukana mititukisha panshi; ine nkamilimba noku kana minukula, pantu ine ndi nokubwesha ubonaushi bulya ine naletele pali imwe. ¹¹ Mwitina imfumu ya ku Babiloni, uyo imwe muletina. Mwila mutina ena-nine kYawe nasosa-pakuti ine ndi na imwe mu ku mipususha elyo no ku mipokolola ukufua mu minwe yakwe. ¹² Pantu ine nkapela uluse imwe. Ine ndi no kumfwa ubulanda pali imwe, na ine nkamibwesesha ku calo cenu. ¹³ Lelo nalimo imwe mwasosa ati, "Tatwakekale muli ici calo"-nga tamwaumfwe kwishiwi lyandi ishiwi lya kwa Yawe Lesa wenu. ¹⁴ Nalimo kuti imwe mwasosa ati, "Awe tuli no kuya ku calo ca Egupti uko tushakamone inkondo iili yonse, uko tushakomfwe iciunda ce penga kabili ifwe tatwakomfwe insala ya fyakulya. Tuli no kwikala kulya." ¹⁵ Nomba umfweni kuli ici cebo cakwa Yawe imwe mwebashalapo ba kwa Yuda. Yawe wamilalo, Lesa wakwa Israeli, asosa ifi, nga cakutila imwe icinbe mwasala ukufuma no kuya ku Egupto, ukuya no kwikala kulya, ¹⁶ Elyo ulupanga ulo imwe muletima luli no kumisanga imwe kulya mu calo ca Egupto. Icipowe cinbtu imwe mulelangulukapo cili no kumisanga imbe mu Egupto, elyo muli no kufwila kulya. ¹⁷ Kanshi fili no kucitika pakuti abantu bonse abo abalefwaya ukuya ku Egupto ukuya ikala kulya bali no kufwa ku lupanga, icipowe, nelyo ifinkukuma. Takwakabe nelyo uwakupusuka uwa muli bena, takwakabe nelyo uwa kufyuka ku bonaushi ubo ine nkaleta pali bena. ¹⁸ Pantu Yawe wa milalo, Lesa wakwa Israeli, asosa ifi; cili no kuba fye nga filya ubukali bwandi elyo ne cipyu candi caposelwe pa bekashi abali mu Yerusalemu, munshila imo ine icipyu candi cili nokuba pali imwe nga cakutila mwaya ku Egupto. Imwe muli nokuba abakutipwila no musebanya icakuipununako pakulalanda ifitipu, elyo ifintu fimo ifyabula umucinshi, elyo imwe tamwaka bwekeshepo ukumona ino ncende nakabili."' ¹⁹ Elyo Yeremia asosele ati, "Yawe nalanda palwa imwe-mwebashalapo ba kwa Yuda. Mwiya ku Egupto! Imwe ilyo namwishiba ukuti Inge naba inte pali imwe ilelo. ²⁰ Pantu imwe namuibepa mwebene ilyo imwe mwafumine kuli Yawe Lesa wenu no kusosa ati, 'pepeni kuli yawe Lesa wesu palwa ifwe ifilifyonse ifyo Yawe Lesa wesu akasosa utwebe ifwe, naifwe tuli no kucisenda.' ²¹ Pantu ine ndemweba imwe ilelo, lelo imwe tamulefwaya ukumfwa kwishiwi lyakwa Yawe Lesa wenu nelyo ukucita icili cconse palwa ico ena atumine ine kuli imwe. ²² Kanshi nomba, imwe mufwile ukucishiba ukutila ati imwe muli no kufwa ku lupanga, icipowe, elyo na kucikuko mu ncende iyo imwe mwasala ukuya ikalamo."