¹ Mukuluntu ua mbunga kuli Ngayu, uye unja yongola mu vungulu. ² Ua chidhango, njilomba ngachiye vyoshe vyende na chivovo chikale nove na ku kala na vukangule, ngue muvila uove una vedhuka. ³ Muomu ange njika yolela muye munana enja na ku kala mbangi ua vungulu, ngue yove uenda mu vungulu. ⁴ Njili na kuyolela kuakama kulyevi, mukuvua viye vana vange venda mu vungulu. ⁵ Muka chidhango change, yove ua tcelela ntcimbu yoshe yiye yu ka pangela vya vingulu va munanoko nambe vangendhi ⁶ vaye vali na vumbangi vua chili vua chidhango chove kumesho a mbunga ya chikungulukilo. U panga muachili kuva tuma vakevo ha vungendhi vuavo mu ngila ya kufuila kumesho a Kalunga, ⁷ muomu mu lidhina va katukila, kuva tambuile na vimo vyahi ku va ka Vifuti. ⁸ Ngocho vene tuna tambula ngue evi linga tu li vandakane na vaka vipanga vakuetu muomu lya vingulu. ⁹ Nja thonene chuma chimo ku chi kungulukilo, vuno Ndiotelefe, uye ua yongola ku kala ua kama mukati kavo, ke kutu tambula. ¹⁰ Ngocho nga njikenja, nji ka thinganyeka ku vipanga viye vya pangele, ku tu vangeya vishaki na majui a kuvihya. Keti ku vya puilemo na viye, keti nguavo a ka vyana lika ku tambula va munayina vendi vavenya, vuno a ka vindika lalo voshe vaye va thetela ku va tambula keho ava sheka mu chikungulukilo. ¹¹ Muka chidhango change, keti u temuinine vya kuvihya vuno temuinina vya vingulu. Uye apanga vya vingulu yi keye ua Kalunga; apanga vya kuvihya ka muene Kalunga. ¹² Ndemetelyo ua uanene vumbangi vua vungulu ku nkala umo na vuchili vuacho vavenya. Netu lalo tuli na vumbangi vuendi, keho muna dhivuka ngechiye vumbangi vuetu vukevuo vua vuchili. ¹³ Nja kele na vyuma vya vingi vya kuthona kulyove, vuno kunji yongola ku ku thonena vyo na tindya. ¹⁴ Vuno nji na tcelela ku kumona mualolo, keho nja ku kuanye nove mesho na mesho. ¹⁵ Linga chivovo chikale hamo lika nove. va muthamba vana ku hinduitha ho. Hinduitha ho va vuthamba vetu kuye ku lidhina ku lidhina.