¹ Kutunda ku mukuluntu kuli mukentu ua ku hangula na vana vendi, vaye va nja yongola mu vuchili_ keti hamo yange lika, na voshe vaye vana dhivuka vungulu_ ² muomu lya vungulu ovu vua kala mulyetu novu vua kala netu myaka na myaka. ³ Ngodhi, na chivovo cha Kalunga Tata na Yesu Kilistu, Mona na Yishe, mu vungulu na chidhango chi ka kala netu. ⁴ Njili na kuyolela kua kama ngechiye ange njina na uana vana vove vamo venda mu vungulu, ngue mu tua tambula lishiko eli kuli Tata yetu. ⁵ Ngocho nji na ku kandelela shukulukambu, ove muna mukentu_keti ngue mu nji na ku thonena lishiko lya liha, vuno uye u tuovua kutunda ku ku livanga_ linga tu li yongole umo na mukuavo. ⁶ Echi chikecho chidhango, chiye chi tunapande kuenda ku shuama ku mashiko endi. Ngue munovu kutunda ku ku livanga, ngachiye muende muli likelyo. ⁷ Muomu vaka ku tanganetha va vengi vana li shandanganena mu chifuti, keho kuva yongola kutava ngachiye Yesu Kilistu uedhile na muvila ua ntcitu. Ou yikeye muka kutanganetha yikeye antekilistu. ⁸ Litakametheni yeni vavenya, linga keti mu dhimbalethe viye vimua pangela, vuno linga mu tambule fueto ya kushula. ⁹ Uye uoshe a tualelela ho keho ka kala mu vilongetha vya Kilistu ka kele na Kalunga. Vuno uye umo a kala mu vilongetha, yikeye ali na Yishe na Mona voshe. ¹⁰ Nga umo a kenja kulyeni vuno ka mi longetha vilongetha evi, keti mu ka mu tambule mu vinjivo vyeni nambe ku mu hinduitha kuahi. ¹¹ Muomu ku nkala uoshe uye a mu hinduitha yikeye a li haka mu vipanga vya kuvihya. ¹² Njili na vya vingi vya ku mi thona kulyeni, vuno ange kunji yongola ku thona ha mukanda na tindya. Vuno, nji na tcelela kuinja nja ku kuanye neni mesho na mesho, linga yolela yetu yi hete mo. ¹³ Na vana va munanoko ua mukentu uye yuva hangula vana mi hinduitha ho yeni.