¹ Emafarisi naletinye tati lebetibuya eJerusalem tahlala kunye naye. ² Babona kutsi labanye balabafundzi bebadla sinkhwa ngetandla letingcolile tingakagezwa. ³ EmaFarisi nawo onkhe ema Juda akadli ngaphandle kwekutsi bageze tandla tabo, ngobe babambelele emihambweni nemasiko alabadzala. ⁴ Uma emaFarisi abuya endzaweni yekutsengisela abadli ngaphandle kwekutsi batigeze, bagcine nemikhuba labayitfola yekutsi bagezela tinkomishi, emabhodo netindishi telitfosi kanye nabosofa labadlela kibo. ⁵ EmaFarisi naletinye tati tambuta Jesu tatsi, "kungani kutsi balandzeli bakho bangahambi ngemasiko alabadzala, badle sinkhwa ngetandla letingcolile?" ⁶ Waphendvula watsi "Isaya waprofetha kahle ngani bentisi, njengoba kubhaliwe, labantfu laba bangikhonta ngetindzebe kepha tinhlitiyo tabo tikhashane nami. ⁷ Bangidvumisa ngelite, babaphocelela etinfundzisweni tebantfu njenge miyalo yabo. ⁸ Nilahle imiyalo ya Nkulunkulu najaka kubamba emasiko enu. ⁹ Waphindze watsi kubo,''Nilahle imiyalo yaNkulunkulu kukhona nitogcina emasiko enu! ¹⁰ Mose watsi kini '' Hlonipha uyihlo nenyoko , futsi lokhuluma lokubi ngeyihlo nenyoko utawubhubha.' ¹¹ Kodva nitsi, '' Uma umutfu atsi kuyise noma unina, lonkhe lusito lenilitfole kimi yiKhobanikepha (lokusho kutsi sekunikwe Nkulunkulu), ¹² loyo akavumeleki kutsi asite uyise nenina ngaleso sento. ¹³ Nenta livi laNkulunkulu lite, ngenca ngemasiko leniwachubako futsi kunyenti lenikwentako lokufana naloku." ¹⁴ Waphindze wabita sonkhe sicuku watsi kubo, ''Lalelani nine nonkhe nicondze naku. ¹⁵ Kute lokungaphandle kwemuntfu lokungahle kumngcolise uma kungena emtimbeni wakhe, kepha lokumngcolisako umuntfu ngulokuphuma emlonyeni wakhe. ¹⁶ Lonendlebe akeve lengikushoko. ¹⁷ Jesu wasishiya lesicuku wangena endlini, bafundzi bakhe bambuta ngalomfanekiso. ¹⁸ Jesu waphendvula watsi ''Kantsi nani anikangiva? Anati yini kutsi kute lokungena ngemlomo lokungamulimata umuntfu, ¹⁹ ngobe kudla akuyi enhlitiyweni, kodvwa kuya esiswini nakhona kwengce kuye endlini lencane?" Ngaloko Jesu bekatsi konkhe kudla kuhlantekile. ²⁰ Watsi ''Lokuphuma emlonyeni wemuntfu ngiko lokumngcolisako. ²¹ Ngobe enhlitiyweni yemuntfu kuphuma imicabango lemibi, bugwadla, kuba, kubulala, ²² kuphinga, nekukhanuka, nekukhohlakala nekuyengana, nemanyala nemona, neligcabho, nekunyundza, nebulima. ²³ Bonkhe lobubi buchamuka ngekhatsi ngiko lokungcolisa umuntfu." ²⁴ Jesu wasuka lapho waya endzaweni yase Thaya nase Sidoni. Wase uya endlini lapho bekangafuni kubonwa ngumuntfu kodvwa abe angeke afihlakale. ²⁵ Umfati lobekane ndvodzakati lebeyiphetfwe madimoni weta watilahla etinyaweni takhe. ²⁶ Lomfati abengumuGrikhi, angumSirofenikhe ngekutalwa. Wancusa Jesu kutsi akhiphe lelidimoni endvodzakatini yakhe. ²⁷ Waphendvula watsi, ''Akucale kondliwe bantfwana bendlu, ngobe akukalungi kutsi kutsatfwe sinkhwa sebantfwana kuniwe tinja''. ²⁸ Kodvwa lomfati waphendvula watsi, "Yebo nkhosi kodvwa nato tinja phansi kwelitafula tiyatitfola timvutfuluka letiwa kulabantfwana." ²⁹ Wamphendvula watsi, ''Ngenca yaloku lokushilo ungahamba lidimoni seliphumile kundvodzakati yakho''. ³⁰ Wajika lomfati wabuyela ekhaya wakhandza indvodzakati yakhe ingcebeleke embhedzeni nelidimoni selihambile. ³¹ Wase uyasuka esiveni sase Thire waya eSidoni, wadzabula sifundza sase Dekhapholisi acondze elwandle laseGalile. ³² Bamuletsela umuntfu lobekangeva etindlebeni anebulikhuni bekukhuluma, bamuncusa kutsi ambeke tandla. ³³ Bamukhweshisa lomuntfu kulesicuku bamuyisa endzaweni lelisitsa, wabeka imino yakhe etindlebeni takhe, wakhafuna watsintsa lulwimi lakhe. ³⁴ Wase ubuka etulu emazulwini, wabubula watsi, "Efatha" lokusho kutsi "kuvuleka!" ³⁵ Tindlebe takhe tavuleka, nelilwimi lakhe lachacheka wase ucala kukhuluma kahle. ³⁶ Jesu wabayala kutsi bangatjeli muntfu ngalokwentekile, kepha bekungatsi uyababanga, batsi mabesuka lapho bayisakata live lonkhe. ³⁷ Bamangala kakhulu batsi ''Lomuntfu utenta kahle letintfo. Wenta labangeva beve nalabangakhulumi bakhulume''.