¹ ''Kepha caphelani ningakwenti kulunga kwenu embikwebantfu ngenhloso yekutsi nibonwe ngubo, nitawubabete umvuzo kuYihlo losezulwini. ² Ngako ke nawupha lutfo kumuntfu loswele, ungamemeteli, njengobe kwenta betentisi emasinagogeni nasetitaladini, khona batewudvunyiswa bantfu. Ngicinisile ngitsi kini, sebawumukele umvuzo wabo. ³ Kepha nawupha sipho, sandla sakho sangesencele asingakwati lesikwentako sangesekudla, ⁴ kute sipho sakho sibesekusitsekeni. Bese uYihlo lobona ekusitsekeni utakuvuza. ⁵ ''Manithandazako, ningalingisi bentisi, ngobe batsandza kuthandaza bemile amasinagogeni, nasemajikeni etitaladi, kute batewubonwa bantfu. Nngicinisile ngitsi kini, sebavele bamutfolile umvuzo wabo. ⁶ Kepha wena nawuthandaza, ngena endlini yakho uvale umnyango, uthandaze kuYihlo losekusitsekeni, khona uYihlo lobona ekusitsekeni utawukunika umvuzo. ⁷ ''Kodvwa manithandazako, ningalibali kukhuluma emagama lamanengi langasho lutfo, njengebetive labacabanga kutsi batawuvakala ngekukhuluma kwabo lokunyenti. ⁸ Ngako ke, ningabalingisi, ngobe Nkulunkulu uYihlo ukwati kucala lenikudzingako nine ningakakuceli. ⁹ Manithandazako nibotsi: ''Babe wetfu losezulwini, alingweliswe libito lakho. ¹⁰ Umbuso wakho awute. Intsandvo yakho ayentiwe emhlabeni, njengase zulwini. ¹¹ Siphe lamuhla sinkhwa setfu njengasemihleni okhe. ¹² Sitsetselele tono teftu, njengobe natsi sibatsetselela labasonako. ¹³ Ungasingenisi ekulingweni, kodvwa usisindzise kulokubi. ¹⁴ Ngobe nangabe niyabatsetselela bantfu tono tabo, neYihlo losezulwini uyawunitsetselela. ¹⁵ Kodvwa naningabatsetseleli bantfu tono tabo, neYihlo angeke anitsetselele tono tenu. ¹⁶ '''Futsi ke nanizila kudla, ningabunyukumalisi buso benu njengebatentisi, ngobe bona banyukumalisa buso babo, kuze batekubonakalisa kubantfu kuzila kwabo. Ngicinisile, ngitsi kini, sebamemukele umvuso wabo. ¹⁷ Kepha wena nawuzia, gcobisa inhloko yakho ugeze nebuso bakho, ¹⁸ kuze bantfu bangakuboni kutsi uzilile kodvwa ubonwe nguYihlo losekusitsekeni; neYihlo lobona ekusitsekeniutakuninika umvuzo." ¹⁹ "Ningatibekeli umcebo wenu lapha emhlabeni, ngobe umvunya utawudla, nemasela angagcekeza awube. ²⁰ Lokungenani tibekeleni umcebo wenu ezulwini, lapho kungekho khona umvunya, nekutfomba lokuwudlako, nemasela angeke agcekeze awube. ²¹ Phela lapho kukhona umcebo wakho khona, nenhlitiyo yakho itawuba khona. ²² Liso lisibane semtimba. Ngako ke, nangabe liso lakho liphilile, nemtimba wakho utawugwaliswa ngekukhanya. ²³ Kodvwa nangabe liso lakho lingaphili, nemtimba wakho uyawukuba sebumnyameni. Ngako ke nagabe kukhanya lokukuwe kubumnyama, bukhulu ke bumnyama lobukuwe. ²⁴ Kute umuntfu longakhonta emakhosi lamabili, ngobe uyawutondza lenye, atsandze lenye, uyakwetsembeka kulenye adzelele lenye. Ungeke ukhonte Nkulunkulu nemcebo. ²⁵ Ngako ngitsi kini, ningakhatsateki ngetimphilo tenu kutsi nitakudlani ninatseni, nangemitimba yenu kutsi nitakwembatsani. Imphilo ayiyinkhulu yini kunekudla, nemtimba kunekwekwembatsa? ²⁶ Bukani tinyoni temoya kutsi atihlanyeli, ativuni, atibeki lutfo etilulwini, kodvwa uYihlo losezulwini uyatondla. Anincono kakhulu yini nine kunato? ²⁷ Kukhona yini emkhatsini wenu longatengetela umzuzwana ebudzeni bemphilo yakhe ngekutihlupha kwakhe? ²⁸ Nitihluphelani ngetimphahla? Bukani timbali temhlaba kutsi tikhula njani, atikhandleki, futsi atitfungi. ²⁹ Kodvwa ngitsi kini, naSolomoni ebukhatikhatini bakhe bonkhe abengeke afane ngisho nayinye yato ngekwembatsa. ³⁰ Nangabe Nkulunkulu abembatsisa tjani besiganga, lobuphilao lamuhla, kusasa bushe, akuyenimbatsisa kakhulu yini nine leninekukholwa lokuncane? ³¹ Ngako ke ningakhatsateki ngekutsi, ''sitawudlani?" nome "sitawunatsani?" nome "sitawembatsani?'' ³² Ngobe nebetive bafuna tona leto tintfo, kantsi uYihlo losezulwini uyati kutsi niyatidzinga tonkhe letintfo. ³³ Kodvwa funani kucala umbuso waNkulunkulu kanye nekulunga kwakhe, khona tonkhe leto tintfo titawengetelwa kini. ³⁴ Ngako ke ningakhatsateki ngelikusasa lenu, ngobe likusasa liyakutikhatsalela lona. Inhlupheko yelilanga yenele yona.