1 Kwefika ngalelinye lilanga Jesu asafundzisa labantfu ethempelini futsi ashumayela lelivangeli kutse baphristi labakhulu netati temtsetfo teta kuye nalabadzala. 2 Bakhuluma, batsi kuye, ''Tjela tsine ngaliphi ligunya wenta letintfo leti, nome ngubani lowakunika leligunya leli.'' 3 Waphendvula watsi kubo, ''Ngitawunubuta umbuto, bese niyangitjela. 4 Kubhabhatisa kwaJohane: Bekubuya kuNkulunkulu yini nome kubuya kumuntfu?'' 5 Babonisana bodwana, batsi, ''Uma sitsi, 'Kwasezulwini,' utawutsi, 'Pho animkholwanga ngani?' 6 Kepha uma sitsi, 'kubuya kubantfu,' bonkhe labantfu batasigcoba ngematje, ngoba bayakholelwa kutsi Johane abengumphrofethi.'' 7 Ngako baphendvula kutsi bebangati kutsi kuchamukaphi. 8 Jesu watsi kubo, ''Nami ngeke nginitjele kutsi ligunya lini lengenta ngalo letintfo leti.'' 9 Watjela labantfu lomfanekiso, ''Indvodza yahlanyela insimi yemagelebisi, yayichashisa kulabantfu labalima emagelebisi, bese waya kulelinye live sikhatsi lesidze. 10 Ngesikhatsi labasibeka watfumela sisebenti kulabalimi bemagelebisi, kutsi kumele bamunike incenye yetitselo talensimi. Kepha labalimi bemagelebisi bamushaya, bese bamtfumela emuva angakaphatsi lutfo. 11 Wabese utfumela lesinye sisebenti bamushaya futsi naye, tasiphatsa kabuhlungu, bese bamtfumela emuva angakaphatsi lutfo. 12 Watfumela futsi sesitsatfu bamulimata futsi naye, bamkhiphela ngaphandle. 13 Ngako leNkhosi yalensimi yemagelebisi yatsi, 'Yini lengitakwenta? Ngitawutfumela indvodzana yami letsandzekako. Kungenteka batomhlonipha.' 14 ''Kepha uma balimi bemagelebisi bambona, tase tikhuluma todvwa, titsi, 'Lena ngulenkhosana. Asimbulaleni, khona lomcebo utawuba wetfu.' 15 Bamkhiphela ngaphandle kwalensimi bambulala. Yini lengabese iyakwenta leNkhosi yalensimi kubo? 16 Utawuta bese ubhubhisa labalimi bemagelebisi, bese unika lensimi kulabanye.'' Uma bakuva loko, batsi, ''Akungabi njalo!'' 17 Kepha Jesu wababuka, bese watsi, ''Kusho kutsini lolokubhaliwe: 'Lelitje lelaliwa bakhi seligucuke laba litje lelimcokwa lesakhiwo'? 18 Wonkhe muntfu lowela tikwalelitje lelo uyafihlika abe ticucu, bese lona leliyawuwela tikwakhe liyawusila.'' 19 Ngako letati temtsetfo nebaphristi labakhulu bafuna indlela yekumbeka tandla ngalelo hora, ngoba bebati kutsi abekhulume lomfanekiso kumelaa nabo. Kepha bebesaba labantfu. 20 Bambukisisa, batfumela timpimpi labatentisa ngatsi balungile, kutsi batfole liphutsa ngenkhulumo yakhe, kuze bamnikele kulabaphetse nasemandleni embusi. 21 Bambuta, batsi, ''Mfundzisi, siyati kutsi ukhuluma ufundzise kahle, futsi abahlohlobetelwa simo semuntfu, kepha ufundzisa liciniso ngetindlela taNkulunkulu. 22 Kuphambene nemtsetfo uma tsine sikhipha umtselo kuKhesari, nome cha? 23 Kepha Jesu wabucondza lobucili babo, bese watsi kubo, 24 ''Ngikhombiseni luhlavu lwesiliva. Lomfanekiso naleligama lokulo labani?'' Batsi, ''LaKhesari.'' 25 Watsi kubo, ''Ngako nikani Khesari letintfo letitaKhesari, futsi kuNkulunkulu letintfo letitaNkulunkulu.'' 26 Abatange bakhona kutfola liphutsa kulakusho phambi kwabantfu, kepha bamangala emphendvulweni yakhe, ngako bathula dvu. 27 Uma labanye baSadusi beta kuye, lona lobekatsi kute kuvuka ekufeni, 28 bambuta, batsi, ''Mfundzisi, Mosi wasibhalela kutsi uma umnakabo ndvodza afa, anemfati, futsi ete bantfwana, lendvodza kumele atsatse lomfati wemnakabo, bese uba nemntfwana naye entelele umnakabo. 29 Bekunabomnaka labasikhombisa bese lowekucala watsatsa umfati, wabese uyafa ete umntfwana, 30 newesibili kanjalo. 31 Lowesitsatfu wamtsatsa, futsi ngalokukanjalo newesikhombisa washiya ete bantfwana, wafa. 32 Emvakwaloko nalomfati wafa futsi. 33 Bese ke ekuvusweni, lomfati utawuba wabani? Ngoba labasikhombisa bebanaye njengemfati wabo.'' 34 Jesu watsi kubo, ''Emadvodzana alelive leli ayashada futsi anikwa emshadweni. 35 Kepha labo labatawutsatfwa njengalacebile ngaleso sikhatsi kwemukela kuvuswa ekufeni kutawuba bete kushada kute lotonikwa emshadweni. 36 Ngeke basafa phindze, ngoba bafana netingelosi, futsi bamadvodzana aNkulunkulu, ngekuba madvodzana ekuvuswa ekufeni. 37 Kepha kutsi labafile bavuswa, ngisho Mosi waveta, kulendzawo mayelana nesihlahla, lapho wabita iNkhosi loNkulunkulu waAbrahama naloNkulunkulu waIsaka naloNkulunkulu waJakobe. 38 Nyalo akasasuye loNkulunkulu walabafile, kepha walabaphilako, ngoba bonkhe bayaphila kuye.'' 39 Labanye baletati temtsetfo baphendvula, ''Mfundzisi, uphendvule kahle.'' 40 Ngoba abazane batame kumbuta lominye imibuto. 41 Jesu watsi kubo, ''Bakusho kanjani loko kutsi Khrestu indvodzana yaDavide? 42 Ngoba yena Davide lucobo lwakhe utsi eNcwadzini yeTihlabelelo, INkhosi yatsi eNkhosini yami, 'Hlala ngesekudla sami, 43 ngize ngente titsa takho sihlalo setinyawo takho.' 44 Ngako ke Davide ubita Khrestu 'Nkhosi,' ngako uyindvodzana yaDavide kanjani?'' 45 Bonkhe labantfu baselalele watsi kubafundzi bakhe, 46 ''Caphelani letati temtsetfo, labatsandza kuhamba bagcoke imijiva lemidze futsi labatsandza kubingelelwa ngalokuhlukile etindzaweni temibutswano futsi titsandza tihlalo talabakhulu emasinagogweni netindzawo tekudlela tesikhulu. 47 Futsi tidla tindlu tebafelokati, bese kubukisa bathantaza imithandazo lemidze. Emadvodza lanjena atawemukela sijeziso lesikhulu.''