¹ Ekucaleni bekunaLivi, Livi abenaNkulunkulu, Livi abenguNkulunkulu. ² Lona abekhona ekucaleni abenaNkulunkulu. ³ Tonkhe tintfo tentiwa ngaye, ngaphandle kwakhe kute nalunye lutfo lolwentiwa lolwake lwentiwa. ⁴ Kuye bekunekuphila, lokuphila bekukukhanya kwebantfu. ⁵ Lokukhanya kwakhanya ebumnyameni, nebumnyama abuzange bukhone kubehlula. ⁶ Bekunendvodza lebeyitfunywe ivela kuNkulunkulu, libito layo bekunguJohane. ⁷ Weta njengafakazi atofakazela ngalokukhanya, kutsi bonkhe bangakholwa ngaye. ⁸ Johane bekangasiko lokukhanya, kepha weta kutsi atofakazela ngalokukhanya. ⁹ Lokukhanya lokuliciniso, lokunika kukhanya kubobonkhe bantfu, bekuta emhlabeni. ¹⁰ Bekakhona emhlabeni, nemhlaba wentiwa ngaye, nemhlaba awuzange umati yena, ¹¹ Weta kubakubo, labakubo abazange bamemukele. ¹² Kepha labanyenti labamemukela, labakholwa egameni lakhe, wabanika lilungelo lekutsi babe bantfwana baNkulunkulu. ¹³ Laba abazange batalwe ngengati, noma ngentsandvo yenyama, noma ngentsandvo yemuntfu, kepha ngeyaNkulunkulu. ¹⁴ Livi waba yinyama waphila emkhatsini wetfu. Sayibona inkhatimulo yakhe, lenkhatimulo lebe iyamunye yena loweta abuya kuBabe, agcwele umusa neliciniso. ¹⁵ Johane wafakaza ngaye wase ukhala kakhulu, atsi, ''Nguye lona lengakhuluma ngaye ngitsi, 'Loyo lota emuva kwami mkhulu kunami, yena abekhona ngingakabi khona.'' ¹⁶ Ngoba kusukela ekuphelelisweni kwakhe semukeliswa umusa etikwemusa. ¹⁷ Ngoba umtsetfo waniketwa ngaMose. Umusa neliciniso kweta ngaJesu Khristu. ¹⁸ Kute namunye lowake wabona Nkulunkulu; yena yedvwa Nkulunkulu,lona loseluhlangotsini lwaBabe, lowente Nkulunkulu watiwa. ¹⁹ Lobu bufakazi baJohane na- emaJuda atfumela baphristi nemaLevi kuye basuka eJerusalema kumbuta, ;''Ungubani wena?'' ²⁰ Wavuma - akazange aphike, kepha wavuma- ''angisuye khristu.'' ²¹ Base bayambuta yena, ''Uyini kani wena? Awusuye Elija?'' Watsi, ''Angisuye'' Batsi, ''Awusuye umphrofethi?'' Waphendvula, ''Cha.'' ²² Base batsi kuye, ''Ungubani wena, kuze kutsi sibanike imphendvulo laba labasitfumile? Utsini ngawe?'' ²³ Watsi, ''Ngiliphimbo, lelikhala ehlane; 'Yentani indlela yeNkhosi icondze; njengoba umphrofethi Isaya asho.'' ²⁴ Nyalo labanye kulabaFarisi labebatfunyiwe, ²⁵ base bayambuta batsi kuye, ''Yini ubhabhatise uma ungasiye Khristu noma Elija noma umphrofethi?'' ²⁶ Johane wabaphendvula, watsi, Ngibhabhatisa ngemanti. Kepha emkhatsini wenu kume lomunye leningamati. ²⁷ Nguloyo lota emuva kwami, le- imichilo yetincabule takhe ngingakafaneli kutitfukulula.'' ²⁸ Letitintfo tentiwa eBhethaniya ngale ngesheya kweJordane, lapho Johane abe bhabhatisa khona. ²⁹ Ngelilanga lelilandzelako Johane wabona Jesu eta kuye wase utsi, ''Bukani, naliliwundlu laNkulunkulu lelisusa sono selive! ³⁰ Nguyelona lengikhulume ngaye, Lona lota emuva kwami ungetulu kwami, bekasolo angembili kwami.' ³¹ Bengingamati, kodvwa kuze kutsi embulwe ku-Israyeli kutsi ngeta ngibhabhatisa ngemanti. ³² Johane wafakaza, watsi, ''Ngabona Umoya wehla njengelituba lichamuka ezulwini,wase uhlala etikwakhe. ³³ Bengingamboni,kepha loyo longitfumile kutsi ngibhabhatize ngemanti watsi kimi, 'Lapho uyawubona Umoya wehla uhlala kuye, nguye loyo lobhabhatisa ngaMoya Longcwele.' ³⁴ Mine ngibonile kabili ngase ngifakaza kutsi lena yiNdvodzana yaNkulunkulu. ³⁵ Phindze,ngelilanga lelilandzelako, njengoba Johane bekeme nebafundzi bakhe lababili, ³⁶ babona Jesu atihambela, Johane watsi, ''Buka, Liwundlu laNkulunkulu!'' ³⁷ Bafundzi bakhe lababili bamuva asho loku base balandzela Jesu. ³⁸ Wase Jesu uyagucuka wababona bamlandzela watsi kubo, ''Nifunani?'' Baphendvula, ''Rabi'' (lokuhunyushwe kutsi ''Mfundzisi''). ''uhlalaphi?'' ³⁹ Watsi kubo, buyani nitobona.'' Base beta babona lapho ahlala khona; bahlala naye lelolanga, bese kuli-awa lelishumi. ⁴⁰ Munye kulababili loweva Johane akhuluma wase ulandzela Jesu bekungu Andreya, umnakabo Simoni Phetro. ⁴¹ Wacale watfola umnakabo lokunguSimoni watsi kuye, ''Simtfolile Mesiya'' ( lokuhunyushwe kutsi; Khristu). ⁴² Wamletsa kuJesu, waseJesu uyambuka watsi, '''Wena unguSimoni indvodzana yaJohane.Uyawubitwa ngekutsi nguKhefasi'' (kuhunyushwe kutsi Phetro). ⁴³ Ngelilanga lelinye,ngesikhatsi Jesu afuna kuhamba kuya eGalile, watfola filiphu wase utsi kuye, ''Ngilandzele.'' ⁴⁴ Nyalo Filiphu wase Bethsayida, lidolobha lakubo Andreya naPhetro. ⁴⁵ Filiphu watfola Nathaniyeli watsi kuye,'' Lona lowabhala ngaye Mose emtsetfweni, nebaphrofethi, simtfolile; Jesu indvodzana yaJosefa,lobuya eNazaretha.'' ⁴⁶ Nathaniyeli watsi kuye, ''Kukhona yini lokuhle lokungaphuma eNazaretha?'' Filiphu watsi kuye, ''Wota utowubona.'' ⁴⁷ Jesu wabona Nathaniyeli etakuye wakhuluma ngaye watsi, '' bona, um-Israyeli wangemphela, kute bucili kuye!'' ⁴⁸ Nathaniyeli watsi kuye, Wati kanjani ngami?'' Jesu waphendvula watsi kuye, '' Phambi kwekutsi Filiphu akubite, ngesikhatsi ungephansi kwesihlahla semkhiwa, ngakubona.'' ⁴⁹ Nathaniyeli waphendvula, ''Rabi, uyindvodzana yaNkulunkulu! Uyinkhosi yakaIsrayeli! ⁵⁰ Jesu waphendvula watsi kuye, ''Ngoba ngitsite kuwe, 'Ngikubone ngephansi kwesihlahla semkhiwa; uyakholwa yini? Utawubona tintfo letinhle kuna loku.'' ⁵¹ Wase utsi, ''Ngicinisile, ngicinisile, ngitsi kuwe,utawubona emazulu avulekile, tingilozi taNkulunkulu tenyuka tehla etikwe Ndvodzana yeMuntfu.