¹ Nine-ke tinjinga lalelani emavi ami, khalani nililele tinhlupheko letitawunehlela. ² Lengcebo yenu seyiyabola netingubo yenu setidliwa ngumvunya. ³ Igolide nesiliva yenu seyiyatfomba, nalokutfomba kwayo kutawunilahla kudle nemitimba yenu njengemlilo. Nisacokelela ingcebo nakulamalanga ekugcina. ⁴ Ase nibuke la, emaholo etisebenti letavuna emasimu enu leniwagodlile ayanimangalela anilahle ngelicala; nekukhala kwebavuni sekungenile nasetindlebeni teNkhosi seBawothi. ⁵ La emhlabeni niphile ngekutanasa nangekutijabulisa, nakhuluphalisa netinhlitiyo tenu ngelilanga lekuhlatjwa. ⁶ Nimlahlile nambulala umuntfu lolungile; kantsi akamelani nani. ⁷ Ngako-ke, bazalwane, beketelani kuze kufike iNkhosi. Ase nibuke umlimi logadze sitselo semhlaba loligugu; usibeketelela size sitfole imvula yekucala neyekugcina. ⁸ Nani-ke beketelani. Cinisani yinhlitiyo tenu ngobe kubuya kweNkhosi sekusondzele. ⁹ Baalwane, ningasolani, khona ningetuhlulelwa; nangu umgwebi aseme emnyango. ¹⁰ Bazalwane, thathani sibonelo sekuhlupheka nekubeketela kwebaphrofethi labakhuluma egameni leNkhosi. ¹¹ Khumbulani phela kutsi ngulabo labaciniselako lesitsi babusisiwe. Nake neva ngekukhutsatwa kwaJobe, niyati-ke kutsi inKhosi yenta siphetfo sini kuye; ngobe inKhosi inebubele nesihawu lesikhulu. ¹² Kepha, bazalwane bai, etikwako konkhe ningafungi, nome ngelizulu, nomengemhlaba, nome ngangusiphi sifungo; kodvwa nanivuma nibotsi: ''yebo'' nome-ke nitsi: ''cha'' nangabe niyala, kuze ningangeni ekwehlulelweni. ¹³ Ukhona yini lohluphekako emkhatsini wenu? Akatsandaze. Ukhona yini lojabulile? Akadvumise ngekuhlabela. ¹⁴ Ukhona yini logulako emkhatsini wenu? Akabite babonisi belibandla, bamtsandazele ngekugcobisa ngemafutsa egameni leNkhosi. ¹⁵ Umtsandazo wekukholwa uyawuphilisa logulako, iNkhosi imvuse, nome entile tono uyawutsetselelwa tono. ¹⁶ Ngako-ke vunani tono tenu kulomunye nalomunye, nithandazelane, kuze nitawuphiliswa. Kuncusa kwemuntfu lolungile kunemandla kakhulu. ¹⁷ Elija labengumuntfu afana natsi, wakhuleka ngekuncusa kutsi lingani, langete lana emhlabeni iminyaka lemitsatfu kanye netinyanga letisitfupha. ¹⁸ waphindze watsandaza, lase liyana futsi litulu, nemhlaba waphindze watsela titselo tawo. ¹⁹ Bazalwane bami, nangabe lomunye emkhatsisini wenu adukele ecinisweni, bese lomunye uyambuyisa, ²⁰ yatini kutsi lowo lobuyise soni ekwedukeni kwaso, uyawusindzisa umphefumulo waso ekufeni, asibekele tono letinye.