¹ Pawula, umphostoli waKhristu Jesu ngekwentsandvo yaNkulunkulu, naThimothi umnaketfu, kulo liBandla laNkulunkulu leliseKhorinte, nakubo bonke bantfu baNkulunkulu labangcwele labasesifundzeni saseAkhaya. ² Shangatsi umusa ungaba kini nekuthula lokuvela kuNkulunkulu longuBabe wetfu neNkhosi Jesu Khristu. ³ Shangatsi Nkulunkulu neYise weNkhosi Jesu Khristu angadvunyiswa. UnguYise webubele naNkulunkulu wendvudvuto yonkhe. ⁴ Nkulunkulu usidvudvuta kuto tonkhe tinhlupheko tetfu, kute natsi sitewudvudvuta labo labahlupheka nanoma ngani. Sidvudvuta labanye ngayo leyo ndvudvuto Nkulunkulu layisebentisile kusidvudvuta ngayo. ⁵ Ngako njengobe tinhlupheko tivama ngenca yetfu, ngalokunjalo nekudvudvuteka kwetfu kuyavama ngaye Khristu. ⁶ Kodvwa uma sicindzetelwa, kukwekudvudvuteka nekusindziswa kwenu; futsi uma sidvudvutwa, kukwendvudvuto yenu. Indvudvuto yenu isebenta ngemphumelelo nanihlanganyela ngekubeketela kuto tona leto tinhlupheko lesikuto natsi. ⁷ Litsemba letfu macondzana nani alinyakatiswa, ngobe siyati kutsi njengobe nihlanganyela etinhluphekweni , niyahlanganyela futsi nasekudvudvutekeni kwetfu. ⁸ Kanjalo asitsandzi kutsi singanatisi, bazalwane, ngetinhlupheko lesabanato eAsiya. Sacindzeteleka kakhulu nangalokungetulu kwemandla etfu kangangekutsi sase siphelelwe ngisho nalitsemba lekuphila. ⁹ Ngempela, sase sincunyelwe kutsi sife. Kodvwa loko kwakukwekusenta kutsi singalibeki litsemba letfu kitsi, kodvwa esikhundleni saloko silibeke kuNkulunkulu, lovusa labafile. ¹⁰ Wasikhulula kuleyo ngoti yekufa, nanyalo utasikhulula. Kuye sibake litsemba kutsi uyawusikhulula. ¹¹ Utawukwenta loko njengobe nani niselekelela ngemithandazo. kutawukutsi ke labanyenti basibongele lomusa lesiniketwe wona ngenca yemithandazo yalabanyenti. ¹² Siyatigabatisa ngaloku: Nembeza wetfu uyafakaza kutsi emhlabeni sitiphetse ngebungcwele nangekwesaba Simakadze ngekwetsembeka, singaketsembi kuhlakanipha kwetfu kwemvelo kodvwa umusa waNkulunkulu. ¹³ Asikanibhaleli intfo leningete nakhona kuyifundza nekuyicondza, futsi ngetsemba kutsi nitayicondza ngalokugcwele ¹⁴ njengobe natsi nisicondzile kancane, kuze nitibonge ngatsi ngelilanga leNkhosi, njengobe natsi siyotibonga ngani. ¹⁵ Ngobe ngangicinisekile ngalokutsi, ngangifuna kuta kini kucala, kuze nitakwemukela inzuzo yekuvakashelwa kabili. ¹⁶ Ngangitilungiselela kunivakashela nangiya eMasedoniya. Ngaphindze ngafuna kunivakashela nasengisuka eMasedoniya, ukuze ningiphekeletele endleleni yami kuya eJudiya. ¹⁷ Ngesikhatsi ngicabanga ngalendlela, ngabe ngangingabata yini? Ngabe ngihlela tintfo ngekwelizinga lebantfu, khona ngitawutsi "yebo, yebo" ngiphindze ngitsi "cha, cha" ngasikhatsi sinye? ¹⁸ Kodvwa njengoba Nkulunkulu etsembekile, asibasho kanye kanyei bo "yebo" na "cha". ¹⁹ Ngobe iNdvodzana yaNkulunkulu, Jesu Khristu, le Silvanu, Thimothi nami sammemetela kini, akasiye "yebo" na "cha. " Esikhundleni saloko, ungu "yebo " njalo. ²⁰ Ngobe tonkhe tetsembiso taNkulunkulu tingu "yebo " kuYe. Ngako ke ngaYe sitsi "Amen" kube ludvumo kuNkulunkulu. ²¹ Nyalo ke nguNkulunkulu losicinisekisa kuKhristu kanye nani, futsi wasigcoba, ²² wabeka luphawu lwakhe kitsi wasipha futsi naMoya etinhlitiyweni tetfu njengesibambiso saloko lokuseta. ²³ Kunaloko, Nkulunkulu ungufakazi wami kutsi sizatfu lesenta ngingeti eKhorinte kwakukutsi nginiphephise. ²⁴ Akusiko kutsi setama kulawula kukholwa kwenu kutsi kube njani. Kunaloko, sisebentisana nani kute nitfokote, njengobe nimile ekukholweni.