¹ A sa cavutu ko ira kece lia na lewe vuqa, ka yadi koya vei Pailato. ² A sa vakatekivu me ra beitakia, a ra sa tukunia Kitou sa raici koya koya, ni sa vukici ira vatani na lewe ni vanua, sa vakatabuya na soli vakaicavacava vei Sisa sa kaya ni Karisito na Tui ko koya. ^{3 4 5} A sa tarogi koya o Pailato, ka tukunia. O iko na nodra Tui na kai Jutia se yali? A sa vosa o koya ka tukunia vua, o sa kaya dina mai. Sa qai kaya ko Pailato vei ira na bete levu kei ira na lewe vuqa, Au sa yali raicia e dua na ka ca vua na tamata koya. E ra sa qai gumatua valevu mai, ka tukunia, sa vakayavalati ira na tamata e Jutia taucoko ko koya ena nona i vakavuvuli, sa vakatekivu mai Kalili ka yaco kina yasana koya. ⁶ Ia ni sa rogoci Kalili ko Pailato, sa tarogia, se sa kai Kalili ko koya se yali. ⁷ Ia ni sa kila sa dau tiko ko koya ena yasana sa lewa kinia ko Eroti, sa talai koya vei Eroti, ko koya vokilia sa tiko mai Jerusalemi ena gauna gona. ⁸ Ia ni sa raici Jisu ko Eroti, sa reki sara ni sa gadrevia me raicia, ni sa rogocia vua, ni sa nuitakia me raici koya ni caka e dua na cakacaka mana. ⁹ A sa levu na ka sa tarogia vua, sa yali na ka sa kaya ko koya. ¹⁰ A ra sa tu kinia na bete levu kei ira na Vunivola, a ra sa beitakia valevu sara. ¹¹ Ia ko Eroti kei ira na nona sotia, era sa vasewasewania, ka vakalialia ara sa vakaicurucurutakia ena dua nai sulu lumilumisa, ara sa tala voki yani vei Pailato. ¹² A rau sa veivinakati voki ena siga koya ko Eroti kei Pailato, ni rau veicati tu e liu. ¹³ Ia ko Pailato ni sa vasoqoni ira vata na bete levu kei ira na turaga kei ira kece lia na tamata, ¹⁴ sa kaya vei ira, Dou sa yadia mai vei au na tamata koya, me vaka e dua na vukici ira vatani na tamata, ia raicia au sa tarogia ena matamudou, ia kau sa yali raicia vua na tamata koya e dua na ca dou sa beitakia vua. ¹⁵ O Eroti voki lia, e yali, niu a talai kodou vua, raicia sa yali na ka e raicia vua o Eroti me mate kinia. ¹⁶ O koya, au na vakanakuitatakia ka serekia. ¹⁷ Ni sa dodonu me sereki vei ira e dua na tamata ena solevu koya. ¹⁸ A ra sa sosoraki vata kece lia, ka kaya, Me yadi tani vei kimamu o koya me sereki lia o Parapa. ¹⁹ O koya ka dai tu i vale ni veivesu, ni sa vatubu veivala ena koro ka ni ma laba voki lia. ²⁰ Ia ni sa via sereki Jisu o Pailato, sa vosa voki vei ira. ²¹ A ra sa kacivakia, ka kaya, vakojia lia ina kauveilatai vakojia lia ina kauveilatai. ²² A sa kaya vakatolu vei ira ko koya. A cava na ka ca sa caka o koya? Au sa yali ni raicia vua e dua na ka caka cala. Sa yali ni dodonu voki lia me mate, au sa na vakanakuita takia lia ka serekia. ²³ E ra sa qai gumatua ni tabalakia na kaci, ni ra sa kerea me vakoti lia ena kauveilatai. E ra sa rawa na lomadra. ²⁴ A sa lewa ko Pailato me yaco na nodra cikecike. ²⁵ A sa sereki koya ma bala i vale ni veivesi, ena vuku ni veisei kei na laba. Me vaka na nodra gagadre. ²⁶ Ia ni ra sa tuberia yani, a ra sa tauria e dua na kai Kirini, ko Saimoni, o koya sa qai mai vanua, a ra sa tauri koya ka ra ova vua na kauveilatai me cola ka muri Jisu. ²⁷ A ra sa lewe vuqa sara era sa muri koya, kei ira voki lia na yalewa, a ra sa tagi ka tagicakia. ²⁸ A sa vuki vei ira ko Jisu, ka kaya, o kodou na yalewa ni Jerusalemi, Dou kakua ni tagicaki au ia dou tagicaki kodou kei ira na luvemudou. ²⁹ raicia, sa voleka ni yaco na siga, ena tukuni kinia. Sa kalougata na yava kei na kete sa yali ni sucu mai kinia na gone. ³⁰ E ra na qai tukunia ki na veiulunivanua, lutuki kimamu mai kei na vei vanua cecere ubi kimamu mai. ³¹ Ia kevaka era caka ni veika koya ni sa drokadroka na kau, a cava ena caka ni sa madu.