¹ Ndangkong Yesu laa ɓǝlǝp wa gurum muop fu kǝlǝng nyi lat, mən mwaan yaa nKafarnawum. ² Me wuntagam mǝlekɗyel nyi gǝ kurum wu ɗem nyi badǝn, mǝn kurum nanyi gok ba nyi mpe muut. ³ Wuntagam mǝlekɗyel nanyi kələng ɓəlǝp kaa Yesu mən lep pak daskagam Yahudawa dər muup ɗewar mə ɗang nyi ji ɗak kurum afe yi. ⁴ Jya mə kat Yesu mən mǝ ɗuak nyi mə yen, "Dagwuo nanyi mak wu ɗyin gə chin kam hǝ nnyi, ⁵ nsa ɗem gurum amu, a nyi ɗyik ləwap mmǝn." ⁶ Mən Yesu mwaan gədər muop. Mwaan mə wulduk mən wuntagam mǝlekɗyel nanyi lep mǝshaar muup dǝr Yesu ɗewar mə laa gənyi yen, "Miskagam, gə weel sak mou, nsa a mak mpe gə rə nlənə mou. ⁷ A waa nnyi a kat a mak dər wul ntagam gə mou, ɗyin gə laa ɓəlǝp dat, ɓə kurum anə gə kagam. ⁸ Nsa an a gurum wu ntagam kamshik, mǝn an gə mǝlekɗyel ntagam nǝ. Bii a laa dər nde a yen 'Mwaan' ɓə mwaan, mən a laa dər nde a yen, 'Waa gə ji,' ɓə waa ji, bii a laa dər kurum anə a yen, 'Chin bii nhə,' ɓə chin." ⁹ Yesu kələng kam mən rǝng nyi, mǝn bat yit naa gurum wukǝrgǝi wu mǝ lǝngɗok gǝdǝr muup mǝn yen, "A laa yi gəgu, ko gǝyil Izraila a kat pǝn-naduk kabi wudung mou." ¹⁰ Muop wu mə lep muop hə wak jya mǝ ruo shilǝ mǝn mǝ kat kurum nanyi kagam gwe. ¹¹ Ndangkong nanyi mən Yesu mwaan me gǝfǝr wu gǝmə yong shi Nayin, jepgǝdǝr muup gǝ gurum wukǝrgǝi mǝ mwaan gǝdǝr muup. ¹² Ji wulduk gə fukǝrang gǝfǝr nanyi mǝn naa mə mang kum me məgwuo, a nyi dat a laa mbǝt nǝgǝn muup wu a matkaa hǝ. Gurum gǝfǝr gwet muop gǝdǝr namat nanyi. ¹³ Yesu naa namat nanyi, mǝn naa chigir afe, mən laa gənyi yen, "Yi wal mou." ¹⁴ Mən mwaan gə ɓəm kǝrkwa wu nyi gǝ kum nanyi mǝn muop wu muop gǝnyi nkaa du hǝ mǝ ɗyam kit. Mǝn yen, "Laswaal, a yong gə yagal". ¹⁵ Mən dagwuo wu ɗyin a kum hǝ yagal mǝn ɓǝm laa lǝfu, mǝn Yesu pən nyi nnəgən muup. ¹⁶ Lat mən lugut yak muop dip mən mǝ pyap Naan, mǝ yen, "Me wukaafung wugagam wul gənaar mu", mǝ chin yen, "Naan naakaa mǝgurum muup." ¹⁷ Mǝn ɓəlǝp gǝkaa Yesu haan dip gǝyil Yahudiya gə gogot pee ngan gǝyil nanyi. ¹⁸ Jepgədər Yahaya mǝ laa jepe nau dər muup. ¹⁹ Lat mən Yahaya yong jepgǝdǝr muup vəl mǝn lep muop dər Miskagam mə laa gənyi mǝ yen, "A gə a dagwuo wudok kwǝt nwul hə a, mə ləngyit a dǝr nde yi?" ²⁰ Jya mə wul dər Yesu mən mə yen "A Yahaya Wukənpe lep mən yen, 'A gə a dagwuo wudok kwǝt nwul hǝ a, mǝ ləngyit dər nde yi?'" ²¹ A gəshii nanyi mən ɗak gurum gwet wudok muop a wugok gǝ biiyaa mǝn pǝn muop nfu damwam, mən wuvagam muop mə naape. ²² Yesu lap fu muop yen, "Waa gu laa bii wu gu naa mən gu kǝlǝng hǝ dər Yahaya. Wuvagam fu naape, wukəgəl fu mwaan-mwaan, təlogom mǝ kat kagam, wudugar muop fu kələngpe, mǝdiɗǝm mǝ wakwul gǝ nook, tǝguk mǝ kǝlǝng langship. ²³ Mǝgwuo wu pǝn naduk, mǝn pǝt-pal nsa jepe wu an fu chan nhǝ mou, ɓǝ wuret lang-nkaa muup." ²⁴ Jeplep Yahaya mǝ wak dat mǝn Yesu ɓǝm laa ɓǝlǝp kaa Yahaya dǝr gurum wukǝrgǝi yen, "Dok mwaan gu naa a me ngəgər yi? A ɓuu wu piip fu yogon a? ²⁵ Dok mwaan gu naa a me dat yi? A dawuo wu nyi gǝ byaat mǝlǝlong a? Muop wu gǝ mǝ ɓyang byaat gǝ shagal, wu gǝ mǝ tugat-tugat long hǝ, bii muop a nlǝ long. ²⁶ Ɗe dok mwaan gu naa a me dat yi? A me wukaafung a? A kam, an fu laa gǝgun, a wu maa wukaafung. ²⁷ A nyi wudung mə yil kaa muup mǝ yen, 'Gǝ naa, gǝ a lep lalep anə nyaa war ngə, a nyi gə myap war agə ntagam gə.' ²⁸ A laa gəgun, nɗəgən gurum wu surəp ɓee hǝ dip, məgwuo a wu maa Yahaya mou. Nau gə kam, gurum wukǝkat dip nɗǝgǝn yil-long Naan a wu maa nyi." ²⁹ (Shiwu gurum dip mə kələng kam, nau gə mǝlap gəndung muop, mən mǝ manglang mǝ yen Naan a wukǝr, nsa dok a Yahaya kǝn muop. ³⁰ Farisiyawa muop gə kogorong byitǝt Yahudawa mǝ nyang bii wu Naan chin mmuop, nsa dok mǝ ɗem Yahaya kǝn muop mou.) ³¹ "Ɗe a kok gurum yii yigil nhǝ kang a gə me? Muop a gǝbi me eh? ³² Muop a gǝbi jep wu fu ɗəgəl gə lǝtuk, wu mǝ tugatɗok gǝ mǝ yong shak mǝ yen 'Mə taa yai ngun, mən gu marap gya mou. Mə lǝ see muut mǝn gu wal mou.' ³³ Nsa Yahaya Wukǝnpe wul, nyang səsǝ, nyang sua am-laatǝng, mǝn gu yong 'Nyi gǝ damwam nshik.' ³⁴ Laa Gurum wul nyi fu sə, nyi fu sua, mən gu yong, 'Gu naa dagwuo wu bǝɓlak, wu gǝl shi muǝs, a shaar mǝpyan lap gǝndung gǝ mǝ chan wubias.' ³⁵ Nau kam, bii mǝ man soon a shi ɓǝlang." ³⁶ Me dagwuo Farisiyawa dwam Yesu dǝr ji sǝsǝ yi lǝ muup. Yesu mwaan lǝ dagwuo nanyi mǝn tong mpe səsə yi. ³⁷ Lat mǝn me namat wu chan wubis nyi nnǝgǝn gǝfǝr nanyi. Kələng nkwǝt Yesu nyi fu sǝ lə dagwuo Farisiyawa mən mang tuu muǝr wu gǝ tagas wuret mwaan gǝnyi. ³⁸ Mwaan ji ɗar ngǝnook Yesu dukduk gə kwak muup, nyi fu wal mǝn namua gǝfe lok kwak Yesu, mǝn fwas shi swoopkaa dǝ, mǝn ogom kwak Yesu mǝn mǝm shi muǝr wu gǝ tagas nanyi. ³⁹ Dagwuo Farisiyawa wu yong Yesu hə naa kam mən ɗye n-en muup yen, "Ɗyin dagwuo nhə a wukaafung, ɓǝ ɗyin gǝ man nkwǝt namat wu fu ɓwam nyi nhǝ a wu chan wubis." ⁴⁰ Yesu lap fu muup yen "Siman, a tangkop a laa məbi gə gə." Mǝn lap yen, "Laa dat, Wusheepee!" ⁴¹ Yesu laa yen, "Me məgwuo wu bii gǝ pǝn kaat nyi gǝ gurum vəl wu muop gǝ kaat gǝfe hǝ. Nde nyi gǝ kaat dinari ɗaa paat, nde nyi gǝ kaat dinari yagurumvəl gǝfu sar. ⁴² Me muop ɓoot mpe kwat mou mǝn takɓak mmuop dip vǝl. A wuɗa gǝnaar muop gǝ ɗem dagwuo nhǝ mmaa wunye yi?" ⁴³ Siman lap yen "A naa ɓə a kat a nyi wu mə takɓak nnyi a wuyoon hǝ." Yesu laa gǝnyi yen, "Gə laa n-yit." ⁴⁴ Yesu bat yit dǝr namat nanyi mən laa gə Siman yen, "Gə naa namat nhə. A rə lə gə. Gə pən am vangkwak n-an mou, ɗe a nyi lok kwak nǝ shi namua mǝn fwas shi swoopkaa dǝ. ⁴⁵ Gə ogom an mou, ɗe a nyi, gǝsem wu a rə npeen nyit ogom kwak nə mou. ⁴⁶ Gə mǝm kaa nǝ shi muǝr mou, ɗe a nyi mǝm kwak nə shi muǝr wu gǝ tagas. ⁴⁷ A waa nsa kam hǝ, a laa yi gǝgǝ, Naan kon wubis gǝfe wu gwet hǝ—nsa nyin ɗempe gwet. Mǝgwuo wu mǝ kon wubis afe til, gǝ nyin ɗempe a til." ⁴⁸ Lat mən laa gə namat nanyi yen, "Mə takɓak shi wubis a yi." ⁴⁹ Muop wu mə tugatɗok gǝpe gəme gənyi mə ɓəm ɓəlǝp dər shak mǝ yen, "Nyi a wuɗang gə takɓak yi shi wubis eh?" ⁵⁰ Mən Yesu laa gə namat nanyi yen, "Pən-naduk ayi angkaa yi. Mwaan dat chagap."