1 Ndaawang wukakǝgǝt yen, "Ɓǝlǝp muop nhǝ dip a naduk a?" 2 Istifanus yong, "Mǝ-ndaanǝ gǝ mǝjepnaa, gu lǝng komgu gu kǝlǝng an yi: Naan wupin yoon dok nyin kaa shik nIbrahim shii wudok nyi gǝyil Mesopotamya nɗǝng shee mwaan yaa nHaran; 3 mǝn laa gǝnyi yen, 'Nyit gǝyil gǝgǝ gǝ mǝmya gǝ muop mǝn gǝ mwaan npee wu gǝ a nyin ngǝ hǝ.' 4 Mǝn yagal nyit gǝyil gurum Kaldiya muop mwaan gǝ tong gǝyil Haran; a nnǝgǝn, mǝn ndaa muup muut mǝn Naan mang nyi ji gǝnyi gǝyil wu mǝ tugatɗok nnǝgǝn gǝɗet nhǝ. 5 Naan shen yil nanyi wa dǝr ɗenkwak nnyi npe byiteerkop mou. Mǝn Naan pǝsfu—shi wu Ibrahim kat lalaa duk mou hǝ—nkwǝt gǝ ji pen yil nanyi nwaa nǝmuup gǝ gurum gǝseen muup. 6 Naan laa gǝnyi nkwǝt gurum gǝseen muup par gǝ mǝ tugat gǝyil wu njong dat lee ɓǝ mǝpyan yil nanyi mǝ yak muop wak kurum gǝnyi, mǝn mǝ nchin klǝng gǝ muop nung yii ɗaa feer. 7 Mǝn Naan chin laa yen, 'Ga nogol gǝyil wu yaa muop wak kurum gǝnyi hǝ, man ɓǝ mǝ fat mǝ wap an npeen.' 8 Lat mǝn Naan shen byilaaɗen nung gapdǝp nIbrahim, mǝn Ibrahim laa Ishaku mǝn gap dǝp muup par ɓit wu pogokún; Ishaku laa Yakubu, mǝn Yakubu ɓee daas wu sarkaavǝl hǝ. 9 Naalaa dok yaa daskagam muop gǝkaa Yusufu mǝn mǝ seet gǝnyi nMasar; mǝn dok Naan gǝpe gǝme gǝnyi 10 mǝn pǝt gǝnyi nɗǝgǝn weel gǝfe. Pǝn chinɗong gǝ soon nYusufu ntagam Fir'auna, long Masar wu ɗen nyi a gwopna Masar gǝ lǝ gǝfe. 11 Lat mǝn gǝzǝm taa gǝyil Masar dip gǝ Kanan mǝn gurum mǝ nee, mǝn ndaamu mǝ kat sǝ mou. 12 Yakubu kǝlǝng gǝtap sǝ nyi nMasar mǝn lep ndaamu muop mǝ mwaan shii mwaan wupel. 13 Shi mwaan wuvǝl mǝn Yusufu nyin kaa shik nmǝjepnǝgǝn muup, mǝn Fir'auna man gurum Yusufu. 14 Yusuf lep mǝjepnǝgǝn muup wak mǝ wul gǝ ndaa muup Yakubu nau gǝ gogot mǝmya muup gǝyil Masar, muop dip dok mǝ wakruo yagurumkún-gǝfusar. 15 A nyi mǝn Yakubu sam yaa gǝyil Masar mǝn muut nnǝgǝn, nau gǝ ndaamu muup. 16 Mǝ kok muop mwaan mǝ wum nShekem ntugun wu Ibrahim dok seet shi shagal azurfa fu jep Hamor nShekem hǝ. 17 Shii byilaaɗen wudok Naan laa gǝ Ibrahim em nwul ashik wa gurum muop zak dok mǝ fyar mǝn mǝ kaam nMasar 18 Lat mǝn me mǝgwuo wu man Yusufu mou hǝ waa long. 19 Long nanyi fǝn gurum gǝmu muop mǝn chin klǝng gǝ ndaamu muop. Mǝn saa ndaamu muop mǝ shen jep muop npe tuo, yi baa mǝ nlǝng gǝ nook. 20 A gǝshi nanyi mǝ laa Musa yi; nyi dok ɗong baden ntagam Naan mǝn mǝ kǝgǝr nyi tar kún lǝ ndaa muup. 21 Shi wu mǝ ɗen nyi gǝɓang, mǝn reep Fir'auna kat nyi mǝn mang nyi kǝgǝr kabi laa muup hǝ. 22 Musa kat byiman nung soon gurum Masar, mǝn ɓoot ɓǝlǝp nau gǝ ɓǝlang baden. 23 Fyer waarǝ kabi yii yagurumvǝl mǝn naa kat ɗong ɗyin mwaan ji naa mǝjepnǝgǝn nyi, wu a jepe Izraila hǝ. 24 Musa mwaan mǝn kat dagwuo Masar fu nogol dagwuo Izrail mǝn chit dagwuo Masar nanyi tǝ: 25 shi naa gǝfe ɓǝ kat mǝjepnǝgǝn nyi gǝ man nkwǝt a Naan nyi fu fat gǝmuop, mǝn mǝ mankang mou. 26 Ɓit ɗaar ɓang mǝn bǝn pǝt mǝn kat gurugm Izraila muop fu jagar; chin dǝr ɗǝ myap gǝkang muop yi; yong, 'Gu man gun a mǝjepnǝgǝn suk mou a; a me saa gun fu jagar dǝr suk yi?' 27 Mǝn nde wu nyi fu nogol wunye hǝ tugun nyi tak gǝ eskogom mǝn yong, 'A wuɗa ɗen gǝ a wu kamshik gǝ wusheep kaamu yi?' 28 Gǝ a npe tǝ an kat wu den gǝ tǝ dagwuo Masar hǝ a?' 29 Musa kǝlǝng kam mǝn yak lan; mwaan gǝ waa mǝjong gǝyil Midiana, mǝn ɓee jep vǝl nnǝgǝn. 30 Ndangkong yii yagurumvǝl mǝn me mǝwong nyin kaa shik nnyi ngǝgǝr Pang Sinai, gǝnaar wus. 31 Musa naa wus nanyi kam mǝn rǝng nyi, mǝn mwaan dukduk npe naa yi kǝr, mǝn kǝlǝng ɗǝgǝl Naan fu yong, 32 "An a Naan ndaa gǝ muop, a Naan Ibrahim, gǝ Ishaku, gǝ Yakubu.' Musa yagal lugut mǝn baa naa zak mou. 33 Naan laa gǝnyi yong, 'Tagat kogop shi kwak gǝ, nsa pee wu gǝ ɗarɗok nnǝgǝn hǝ a wusǝsaar. 34 A naa tǝgǝrchiin gurum anǝ wu muop nMasar hǝ; a kǝlǝng wal amuop, mǝn a sam ɗewar a pǝt yi gǝmuop; waa gǝji, ga lep gǝ gǝ mwaan nMasar.' 35 Musa wudok mǝ nyang nyi mǝ yong, 'A wuɗa ɗen gǝ a wu kamgǝɓǝlǝp gǝ wusheep yi?'—Naan lep a nyi a wu kamgǝɓǝlǝp gǝ wu pǝt gǝ gurum. Naan lep nyi shi wu mǝwong laa gǝnyi ngǝgǝr hǝ. 36 Musa pǝt gǝ muop nnǝgǝn Masar, ndangkong chan ɗyeer gǝ byinyin nMasar gǝ Chip Buu, gǝ wudung chan ngǝgǝr yii yagurumvǝl hǝ 37 A nyi Musa nanyi laa gǝ gurum Izraila yong, 'Naan par gǝ ep me wulaa-ɓǝlǝpnaan ngun gǝnaar mǝjepnung, me wulaa-ɓǝlǝpnaan kabi an hǝ.' 38 Wudung hǝ a dagwuo wudok gǝnaar gǝwur mǝwong wu laa bǝlǝp ngǝgǝr gǝkaa Pang Sinai hǝ. Wudung hǝ a dagwuo wudok gǝpe gǝme gǝ ndaamu muop hǝ; a nyi a dagwuo wu lap ɓǝlǝp wu kagam npe shen mǝn yi. 39 Wudung hǝ a dagwuo wu ndaamu mǝ nyang ɗem ɓǝlǝp afe hǝ; mǝ tugun nyi tak gǝ eskogop, mǝn en muop waa lap nMasar. 40 Gǝshi nanyi mǝn mǝ laa gǝ Haruna mǝ yong 'Chin naan wu gǝ mǝ lǝngtagam mu nmǝn. Nung Musa wu langtagam mu pǝt gǝmǝn nɗǝgǝn Masar hǝ, mǝ man bii wu chin nyi mou.' 41 Dok lat mǝn mǝ ɗyik laa nǝng mǝn mǝ jya gǝ byitok ntagam naatoon mǝn took muop pya gǝ bii wu sar muop chin hǝ. 42 Mǝn Naan bat muop ɗe gǝ mǝ wap a ɗagar wu gǝbǝtǝng, kabi wudok gwe nɗǝgǝn bang-byiran mǝlaa-ɓǝlǝpnaan mǝ yen, 'Lǝ Izraila, dok gu kwap long-kang mǝn gu pǝn byitok n-an shi yii wu yagurumvǝl hǝ a? 43 Dok gu ɗem peechinkǝn sǝ wuwaar nung Molek gǝ ɗagar Refan wudung nyi a naan hǝ, gǝ riin wu gu chin mǝn gu wap muop: gǝ a kok gun a ɗel shi Babilon a mwaan njong gǝgun.' 44 Ndaamu dok muop gǝ peechinkǝn sǝ wuwaar nnung twamshik ngǝgǝr, kabi wu Naan pǝnfu shi laa lǝfu gǝ Musa nkwǝt nyi chin dabi nanyi kabi wu naa hǝ. 45 A nyi a kyang-kyang wu ndaamu muop mǝ mang mwaan gǝyil gǝnyi nanyi gǝpe gǝme gǝ Joshuwa. Gǝyit ndaamu muop mǝn mǝ ɗuan yil wudok Naan chen gurum nnǝgǝn mǝn pǝn mǝ ndaamu hǝ. Kyang-kyang nanyi ɗe nnǝgǝn waarǝ gǝshi Dauda, 46 mǝn kat chinɗong ntagam Naan, mǝn nang nkwǝt ɗong ɗyin ji kat pǝtong npe Naan Yakubu. 47 Mǝn dok a Sulemanu ɗyik lǝ npe Naan. 48 Mǝn nau gǝ kam, Wukakǝgǝt gǝ tong nlǝ wu gurum ɗyik shisar mou, kabi ndung wulaa-ɓǝlǝpnaan laa yen, 49 'Gǝbǝtǝng a pǝtong-long gǝnyi, mǝn gǝyil a pǝtǝp-kwak nǝ. Ɗe gǝ ɗyik a lǝ me n-an yi? a Miskagam laa, ɗe pee nyak gǝnyi a ne? 50 A sar nǝ chan jepe hǝ nau mou a?' 51 Gun a gurum wu ɓakpe gǝ bǝzung gu gǝ kom gu mǝ kutnyi a dagum, bii gu nyang Mǝrip Wuret; gun fu chan jepe kabi wu ndaagu muop mǝ chan hǝ. 52 A wuɗa gǝnaar mǝlaa-ɓǝlǝpnaan wu ndaagu dok mǝ twang mou yi? Mǝ tuo mǝlaa-ɓǝlǝpnaan wudok mǝ dwam wul Gurum Wukǝr hǝ; gǝɗet nhǝ, a gun a wu seet gǝnyi, a gun a wu tǝ nyi, 53 a gun dok gu lap byitǝt wu mewong mǝ ɗen hǝ, mǝn gu kang mou." 54 Gǝwur daskagam mǝ kǝlǝng kam, mǝn ɓyak muop, mǝn mǝ arap fudu gǝkaa Istifanus. 55 Mǝn nyi wu gǝ Mǝrip Wuret hǝ, epkaa naa gǝbǝtǝng, gǝ yoon Naan; mǝn naa Yesu ɗarɗok gǝsar wumis nnung Naan. 56 Istifanus yong, "A naa gǝbǝtǝng ep, mǝn Laa Gurum ɗarɗok gǝsar wumis nnung Naan." 57 Laa kam mǝn gurum gǝwur daskagam muop nanyi mǝ dugar kom du, mǝn mǝ ap ɗǝgǝl du, mǝn mǝ ruo kaa muup. 58 Mǝ del nyi fat gǝnyi ngǝnook gǝfǝr mǝn mǝ zwam nyi shi pang, mǝn muop wu mǝ twamshik kaa ɓǝlǝp nanyi mǝ ɗǝk byaat gǝmuop ntagam me laa swal wu sǝm muup a Shawulu hǝ. 59 Shi wu muop fu zwam nyi hǝ, mǝn Istifanus fu yong Miskagam yen, "Miskagam Yesu, lap mǝrip nǝ." 60 Ya bǝdugum mǝn ep ɗǝgǝl muup ɓal-ɓal mǝn yong, "Miskagam, gǝ yaa wubis nhǝ kaa muop mou." Laa dat kam, mǝn taa nsaam.