¹ Bitrus gə Yahaya muop fu ɓələp gə gurum, mən ndaawang gə long mǝkangkaa lǝwab wuyoon gǝ Sadukiyawa jya mə ruo kǝ muop. ² Dog ɓǝlǝb ɓyag muob badǝn nsa Bitrus muob gə Yahaya fu shee gurum mən muob fu shakɓǝlǝb yagal gǝnaar mǝdiɗǝm nɗǝgǝn sǝm Yesu. ³ Mə yag muob zwam nlǝɓal dər ɓitɓang nsa a kansegən. ⁴ Gurum gwed wu mə kələng lep nanyi mə pǝn naduk; mǝn daas wakruo kabi kampaat wu mə pǝn naduk hǝ. ⁵ Ɗaar ɓitɓang mən mkangkaa gurum, gǝ mənan gə mǝbyiyil mǝ tǝl shak nUrishalima. ⁶ Annas ndaawang wukakǝgǝt nyi nnəgən, gə Kayafa, gǝ Yahaya gə Iskandari gǝ mǝmya ndaawang wukakǝgǝt dip. ⁷ Mə ɗǝk Bitrus muob gə Yahaya gənaardu mən mə nang fumuop mə yen, "Gun chin bii nhǝ a gǝ kamgǝɓǝlǝb, gǝ sǝm wuɗa?" ⁸ Lat mən Bitrus wu Mǝrib Wured rǝ nshig muub hǝ, laa dǝr muop yen, "Gun məkangkaa gurum, gə daskagam, ⁹ ɗyin gu fu nang ɗəgǝl mu chinyi bii wured wu mə chin ndagwuo wugog nhǝ— gu shee a shi me dagwuo nhǝ kat kagam yi? ¹⁰ Ɗagat gun gə gurum Izraila dip gu man yi, gǝtab a nɗəgən səm Yesu Kristi nung Nazaret, wu gu kwag kə shepɓeel, wu Naan ep nyi gənaar mədiɗəm—a waa nsa nyi dagwuo nhǝ ɗarɗog yi ntagam gu a wu kagam. ¹¹ Yesu Kristi a nyi a pang wu gun wuɗyak lə gu nyang nhə, mǝn a nyi ba waa pang kugur. ¹² Me mǝgwuo wakwǝt gǝ angkaa zak mou, nsa me mǝ sǝm wakwət gəyil gǝnaar gurum wu gǝ mǝ fat gǝ angkaamu mou." ¹³ Shi wu mǝ naa tugurkagam Bitrus muob gǝ Yahaya mǝ bǝn chin naa kad muob a wupyan byiman mou, mən rəng muob nsa mǝ man nkwǝt Bitrus muob gə Yahaya dog muop gəpe gəme gə Yesu. ¹⁴ Muob gǝ bii laa zag mou nsa mǝ naa wu mə ɗag nyi hǝ ɗarɗog shiǝɓǝd muob. ¹⁵ Ndangkong wu mə sat njepleb nanyi mə fat nyit gəwur daskagam mən mə tankaa dər shak. ¹⁶ Mə yen "Ɗe gǝ mǝ chin a me gə gurum muop nhǝ yi? Nsa gurum Urishalima dip mə man ɗyeer wu taa nhə; mən gəwar chii mou. ¹⁷ Ya gǝ mǝ nyit muop nhaanpe gǝnyi nmaa ndung mou; mǝ dǝlkom muop nkwǝt nua gǝ chin nlaa ɓələp shizak gǝ səm nanyi mou." ¹⁸ Mə yong Bitrus muop gə Yahaya mən mə ɓyang ɓələp shen muop mǝ yen nua gǝ laa ɓələp, ɗə nua sheepee yi nɗəgən səm Yesu mou. ¹⁹ Mǝn Bitrus gə Yahaya mə lap yen, "Ɓǝ gu naa dat, kwǝt gu kat ɗong ntagam Naan ɗǝ mǝ kələng ɗəgəl gu ɗe mǝ nyang nəmuup oh. ²⁰ Mǝn de gǝ ɓoot npe ogot fumu gǝkaa bii wu mǝ naa mən mə kələng hə mou." ²¹ Mə dəlkom Bitrus muop gə Yahaya lat mən mə nyit muop wak. Mǝ kat pǝraa npe mǝ nogol muop yi mou, nsa gurum dip fu pyap Naan gə bii mə taa hǝ. ²² Gurum wu ɗyeer ɗak gok nanyi kat nyi hə dok yii muup maa yagurumvəl. ²³ Ndangkong wu mə nyit muop Bitrus muop gə Yahaya mə mwaan dər gurum amuop mən mə yakdang bii wu ndaawang wunan gə daskagam mə la dər muop nhə. ²⁴ Mə kələng kam mən mə mang ɗəgəl muop gǝme dǝr Naan mə yen, "Miskagam a gə gǝ chin gəbətəng gə gəyil gə chip, nau gə bii wu nɗəgən muop. ²⁵ A gə gǝ laa ɓələp shi Mǝrip Wuret nfu frang agǝ Dauda gǝ yen, 'A me saa dok dəfil mang gəyil Məjong muop yi, mǝn gurum muop mə ɗyee jepe wubaan yi?' ²⁶ Gǝ yen, dakagam gəyil mə kangkəshak, mǝn wukangkaape mǝ tǝlkaa shak mǝn mǝ nyang Miskagam, mən nyang Kristi afe.' ²⁷ A kam wagap, Hiridus gə Buntus Bilatus gə Mǝjong gə gurum Izraila mə kangkəshak gəfər nhə mə nyangyit frang agə Yesu wusəsaar, wu gə məm hǝ. ²⁸ Mə kangkəshak npe mə chin bii wudok took gə mang nkwət gə taa hə. ²⁹ Gəɗes hə, Miskagam, naa ɓətchan gəmuop mən gə pən tugurkagam nfrang agǝ muop npe mə laa ɓələp agǝ yi. ³⁰ Lang sargə ɗepin gə ɗakpe yi, mən pən byinyin gə ɗyeer nɗǝgǝn səm frang agə Yesu wusǝsaar." ³¹ Mǝ ɗangnaan lat mǝn pee wudok muop nnǝgn hǝ sugun, mǝn muop dip mǝ kat Mǝrip Wuret mən mə laa ɓələp Naan gə tugurkagam. ³² Kaa gurum nɓǝl wu mǝ pǝn naduk hǝ, fu muop gǝme. Mǝgwuo ɓamlang shi byilong gǝfe yong a nǝmiin dat mou, jepe gǝmuop nau a nung gǝshak. ³³ Jeplep nanyi mǝ shakɓǝlǝp twamshik gǝdu gǝ kamgǝɓǝlǝp gǝkaa yagal ntugun Miskgam Yesu, mǝn muop dip mǝ kat chinɗong. ³⁴ Məbi dok won nməgwuo gənaar muop mou, nsa muop wu gǝ mar gǝ lǝ mǝ sarap gənyi mǝn mǝ jya gǝ shagal nanyi ³⁵ jya mə ɗək ntagam jeplep, mən mə gap shagal nanyi shi weel wu gurum gǝnyi. ³⁶ Yusufu, nung seen Lawi, gurum Sipirus, wu jeplep dok gǝ mǝ yong shi Barsabas (wawu, Laa wu Duantugurpe), ³⁷ seet gə mar afe mǝn ji gǝ shagal nanyi ntagam jeplep.