¹ Tiyofilus, bang-byiran wudok a yil pel hǝ laa ɓǝlǝp dip kǝ bii wu Yesu ɓəm chin gə shee hǝ, ² waa gǝrə gəshi wu mǝ mang nyi waalap gǝtǝng gǝnyi, ndangkong wu Mərip Wuret laa ɓǝlǝp gǝ fumuup dər jeplep afe wu nyi kok hə. ³ Ndangkong tǝgǝrchiin afe mən nyin kəshik nmuop nkagam, chan jepe gwet ndung nyin kam nanyi. Nyin kǝshik nmuop ɓit yagurum-vǝl, nyi fu laa ɓǝlǝp gǝkaa yil-long Naan. ⁴ Dok shi wu muop wu katshak hǝ, mən ɓyang ɓǝlǝp pən nmuop yen nua gǝ nyit Urishalima mou, ɗe nua kang byilaaɗen nung Ndaa wudok mǝ yen, "Dok gu kələng funə ⁵ nkwət Yahaya kənpe shi am, ɗe nǝmuk, lee dat, ɓǝ gə mǝ kən gun a gə Mərip Wuret nɗəgən." ⁶ Dok mə təl kəshak mən mə mang fumuup mǝ yong, "Miskagam gǝ ɗuan yil-long a gǝdet hǝ gə pən Izraila a?" ⁷ Mən laa gǝ muop yen, "Gun guu man ɓit gǝ shii wu a ndaa gǝ kamshik gǝnyi hǝ mou. ⁸ Par guu kat tugurkagam par wu Mǝrip Wuret gǝ sam kaagu hǝ, man ɓǝ gu wak mǝtwamshik kaanǝ nUrishalima gə Yahudiya, gə Samaria gə gogot gəyil muop dip.'' ⁹ Miskagam Yesu laa ɓəlǝp nhǝ dip lat, mən mə mang nyi kaa gətəng gǝnyi, mə lǝng yitdu gǝ mǝ naa nyi yi nkaaɗel, mən ligin ogot gǝkǝn muup. ¹⁰ Shi wu mə kutni fu naa nyi nkaaɗel mǝn, brat dat, mən me kat daas vǝl ɗyamɗok shiɓət muop gə byaat pya. ¹¹ Mən mə yen, "Gun gurum Galili, a nah gu ɗyamɗok gu naape yi gətəng eh? Yesu wu mang nyi mə kaa gəbǝtəng gǝnyi dər yit gu nhə, par gə chin nwawul a kabi wu gu naa nyi waa lap gəbətəng hə." ¹² Lat mən mə sam gə Pang Paạt wak yaa nUrishalima, wu ni dukduk dat hǝ, a kabi shiimwaan mel gǝme hǝ dat. ¹³ Sam mǝ ruo mən mə kaa yaa mǝləng, pee wudok mə tugatɗok nnəgən hǝ. Dok a Bitrus, Yahaya, Yakubu, Andarawas, Filib, Toma, Bartilomi, Matiu, Yakubu laa Alfa, Simon Wurǝgǝt, gə Yahuza laa Yakubu. ¹⁴ Dok mǝ kangkaa shak gǝme, nɗǝgǝn ɗangnaan, nau gə surəp, gǝ Mariya nəgən Yesu, gə məjepnəgən muup. ¹⁵ Nɗəgən ɓit muop nanyi mən Bitrus yagalɗar gənaar məjepnəgən muup daas, dok muop gəbi ɗaa gǝme gǝ yagurum-vəl, mən yen, ¹⁶ "Məjepnaa, bang-byiran dok yong gǝ kəgət a lengwaar, bii wudok Mərip Wuret laa nfu Dauda gǝkaa Yahuza wudok langtagam muop wu mə yaa Yesu hǝ. ¹⁷ Nsa dok nyi gənaar mu mən kat kopgǝshii ɓəlang nhǝ." ¹⁸ (Gədes hə dagwuo nhə seet mar shi shagal wu kat shi ɓətbis hǝ, mən pal gǝ kaa, mən ɓǝt tee, mǝn pənɓət kon gətal. ¹⁹ Muop wu nUrishalima mə kələng, mən mə yong gǝlaap nanyi shi ɗəgəl ləmuop mǝ yen, "Akeldama," wawu "Gǝlaap Təgəm.") ²⁰ "Nsa nya wuyiyil gwe ndəgən Bang-byiran See, 'Ɗagat gǝlaap afe tak yi baan, məgwuo wa gəme gǝ tong nnəgən mou;' 'Ɗagat məgwuo teerkop muup yi.' ²¹ A waa nnyi, gǝ mǝ kat mǝgwuo yi a lengwaar gǝnaar daas muop wudok mǝ lǝngɗok gǝdǝrmu shi wu Miskagam Yesu mwaanɗok nɗǝgǝn mu, ²² she shi kənpe nung Yahaya mwaan gə rǝ shi wu mǝ mang shi ɓətmu, a nyi gǝ kwǝt a twamshik gǝpe gǝme gǝmǝn gǝkaa yagal afe ntugun." ²³ Mən mə tagat daas vəl, Yusufu wu səm muup a Barsabba hǝ, gə mǝ yong nyi nau shi Yustus, gə Machas. ²⁴ Mə ɗangnaan mə yen, "Miskaga, gə a wu man bǝzung dip, gǝnaar muop wu vǝl nhǝ, nyin me wu gǝ mang a nyi ²⁵ npe teerkop yi nɗəgən ɓǝlang gǝ lep wudung Yahuza nyit ɗǝ mwaan gǝ muup yi hǝ." ²⁶ Mə ɗǝk zek mən taa nkaa Machas, mən mǝ kun nyi lǝ nɗəgən jeplep wu sarkaagəme hǝ.