¹ Yunda, ngamba ua Yesu Kilistu yikeye lalo munayina ua Tiango, ku lyava vovathanene, muli Kalunga Tata mu chivovo, na mu ku takametha kua Yesu Kilistu: ² Ngodhi na chivovo na ngodhi yililanethe ku lyeni. ³ Vaka chidhango change, muye munjapangele muoshe muku mithonena kutuala ku vuovoke vuetu, nja mithonenene ku tuala muku mimamuna linga muluile muakama ku tcelela kuye ku vana mikundikila lumo kuvantu voshe vaka kuyela vaKalunga. ⁴ Muomu vantu vamo vana lipuitha ngocho muvushueke hakati keni. Vantu ava vova tumbuile laya kuchipangulo echi kukakulu laya. Vakevo vantu vaka kushahula Kalunga veku tengulula kutcetela kua Kalunga ketu mukupuitha vyuma vya kuvihya, na kuli vaye vavyana Muene uetu na Kalunga, Yesu Kilistu. ⁵ Njiyongola ku mivuluitha vyuma evi nambe mua vidhi laya ngocho Kalunga uovuele vantu va Yisaleli kutunda kuchifuti cha Yingito, vuno kulutue lalo uava tcihile vaye kuva tcelelele . ⁶ Na tungelo, lalo vaye kuva takamethele mpoko ya mihela yavo, vuno vaye vedhile ku muhela uavo uaku kala uachili-Kalunga nava kutiya mumalyenge amyaka yoshe, mumithithi ya kuintci noho ha litangua lyakama lya kupangula. ⁷ Ngue Sandoma na Ngomola lalo na Vimbongi vyahateleko valikundikile ku Vukuidhi namu kushuama vipanga vyavo. Vana vahaka ngue chimuetho chava vaka yanda na chihitho chatuhya ku myaka yoshe. ⁸ Muye vene mungila yiye vene, nava vaka kulota vinjodhi lalo vaviyitha mivila yavo. Vayengula vaka vukama, vashilula vaka vungulu. ⁹ Vuno nambe kangelo uakama Mikayele, Muye mua lidhungile na Chitodhi na ku linyeka muvila ua Mosesa, Kashukile kutuhula lijui lyakumupangula. ¹⁰ Vuno ua mulekele nguendi, "Muene aku payethe!" Vuno vantu ava vekushaula vyoshe nevi kuva dhivuka na kuvuithitha; nevi vivadhivuka vya kuchithemua chavo ngue tuthitu kuvakele na vulanguluke, vikevyo viye vika vatcihya. ¹¹ Luvinda luavo! Muomu vanende mungila ya Kayini na kulihaka mumutupu ua Mbalame na kushevuka kuendi kua nganyo. Vana tci muva tcihile Kola muva mute ngulukilile. ¹² Vantu ava vanapu vushonde ha viuano vyeni vya chiyongola, valya hamo neni nashuama yahi vakevo vaka kutakametha valilitha yavo vavenya. Vana kala mashelua akuyeneka mema apekumuka na mpundhi; viti vya ku chukumuka, viti vya ku yeneka vushuka vua kutca luvali, yakutukula na midhi. ¹³ Vana kala mankimba amu mema Kalunga, atutumuka lifulu lya shuama yavo vavenya, vintangantanga vya kuendangana ngocho, Vaye vana vuayethela kukala mumithithi ya kudhivala vui ku myaka yoshe. ¹⁴ Enoke, uye ua puile ua mu chitanu na vavali kutunda kuli Andama, ua mbuluile vupolofeto vuavo, uakuanyene nguendi, "Taleni! Muene akenja na makulukadhi na makulukadhi avoshe vaka kuyela. ¹⁵ Akenja mu kuteta kupangula hali voshe. Akenja mukuhitha voshe vaka kushaula Kalunga kuvipanga vyavo vyoshe viva pangele mungila ya kushaula Kalunga, mumajui oshe akuvihya aveku kuanya vaka milonga mukuluitha Kalunga." ¹⁶ Vantu ava vaka kupangela, vaka ku linyenyeta, vaka ku shuamangeya mashungu avo akuviha. Tunua tuavo tue kuli kametha muku tambakana, vathingimika mivila ya vakuavo linga vauanene ho vimo. ¹⁷ Vuno eni, vaka chidhango change, vulukeni majui aye avahandekele laya Vapostolo va Muene Yesu Kilistu. ¹⁸ Vamu kuanyene nguavo, "Ku ntcimbu ya ku manethela ku ka kala vaka ku pangula vaka ku shuamangeya mashungu avo a kashaundu.'' ¹⁹ Vantu ava vakakuneha katepetho, vakevo vaka hantci vakevo ku va kele na mpundhi. ²⁰ Vuno eni vakachidhango change, litungeni eni vavenya mukutcelela kueni kuakuyela, lalo lombeni mu Mpundhi Yakuyela. ²¹ Kaleni muchidhango cha Kalunga, naku tatelela ngodhi ya Muene uetu Yesu Kilistu uye akaneha kuovoka kua myaka yoshe. ²² Kaleni na ngodhi na vaye vali na vimpata. ²³ Ovoleni vakueni na ku vashitula muchoto; kuli vamo vovuile ngodhi na lyova, dhindeni vidhala viva na jualetha na vuthitu. ²⁴ Vuno kuli uye atha ku mupangela keti mupunduke na ku panga mu kemane kumesho endi avungulu na mulonga uahi na ku yolela kua kama, ²⁵ kuli kalunga umo lika muovole uetu hali Yesu Kilistu Muene uetu, ku kale vungulu, na vukama, na ku tumina, na ndhili, kutunda ku myaka ya kuka kulu ketu, na lelo lino, na ku myaka na myaka kuye kulenga. Amen.