¹ Inaquëran, Cosoiso ayontontarin, ya'ipi israirosa huënton, Siquin ninanoquë, përasarin ya'ipi israiro ancianorosa, asacatërinsopita, chini'quën hua'anosa, sontaro hua'anosa, inpita yai'pi yosëquë yanorapi. ² Cosoiso yai'pi piyapisa itarin: Iso mini Israirorosa sinioronën, yosënën, tësarin: Ira'ca shimashonëmaso, Tari itopiso huinin pitarë chachin yahuërapi, isha aquëtëran Ifrati itopiso. Huininpitaso, Abrahan, Nacor, inaquë yahuaponapochin nisha, nisha, mamanshi mosharapi. ³ Abranso, inaquëran ocoisarahuë. Ocoirahuato, yaipi iso nopa patacaso marë camairahuë niton, yai'pi patërin. Inaquëran ca nohuanton cha'chin shi'inpita na'amiatarin. ca'a nohuanton huinanhuanpachina Isaco itërin. Ina'ton capitaso shimashonëma. ⁴ Isaconta ca'a nonhuanton cato huinanhuanin. Cacopo, Isao, inapita. Isaoso, seir motopirosa parti nopa quëtarahuë. Cacoposo napoaponahuë, huininpitarëchachin, iquipito parti pa'pi. ⁵ Hua'qui quëran shimashonëmapita catahuarahuë. Inaquëran ocoicahuaso marë Moisësë, Aaron, inapita aparahuë. Chiniquën iquipitorosa aparësitato , shimashonëmapita ocoirahuë. ⁶ Nani iquipitoquë quëran pipihuachinara, ina copirnoso sontaronënpitarë chachin, imasapi. Quëhuai marëquë huarë imaquiapi. Quira torononanosaquë, cahuariososaquë, inaquëpita imasapi. ⁷ Napotohuachinara, shimashonëmapitaso catahuacaso marë nontërinaco. Napoaton inapita catahuacahuaso marë inapita pinënaquëran,pa'pi tashiro acoarahuë. ca'to huëntonosari cha'chin ahuan'canapipi. Ca'a nohuanton cha'chin, marërita imotohuachina, iquipitorosa taqui'itapi. Anaquëma iquipitorosa napotërahuëso ninama. Inapiquëran canpitaso, hua'qui inotëro parti yahuërama. ⁸ Inaquëran carinquëma, amororosa yahuëpiquë quënanquëma. Cortanii aquëtëran, yahuëpisopita'ton chinitërinëma. Chinitopirinquëmahuë, carinquëma catahuaranquëma ni'ton, nanitërama inapita minsëcaso. Inapotatoma, noparosaso ya'ipi hua'anëntërama. ⁹ Sipor huininso Paraco itopisonta, piyapinënpitarë chachin chinitërinënquëma. Canpita canainquëmaso marë, inahuaso pioro huinin paramo itopiso përarin. Huëcaton, ama huachi noya yahuëcaiso marëhuë, shahuitiquë itacaso marë përarin. ¹⁰ Inaso nipirinhuën, co caso nohuantërahuë, inapochin nitinëmaso.Co inapochin nitatënquëmarahuë ca'a nonhuanton, noya yahuëcaso marë shahuitëranquëma. Inapotatënquëma, carinquëma nicha'ëranquëma. ¹¹ Inaquëran canpitaso, cortanii aquëtëran panama. Pëntontatoma, quirico ninanoquë nicanama. Ina ninanoquëso nisha, nisha, piyapirosa yahuëpi: Amororosa, huirisiorosa, cananosa, itirosa, quiriquirosa, iporosa, quiposorosa inapita yahuëpi.Inapitaso nacon chinotopirinënquëmahuë,. Carinquëma nacon catahuaranquëma, niton inapita minsërama. ¹² Cato Amoro copernosanta, aquëtëran yahuëpisopitanta, co canpitari minsëaramahuë. Co pëchinanëma quëran minsëaramahuë. Cari yaipi apayanahuë niton, ta'ananpiarinëma. Cohuara inapitaquë, nicanyantërasënquëmahuë, ta'ananpiarinënquëma. ¹³ Ipora canpitaso, carinquëma quëtaranquëma, ninanorosaquë co sacaihuë yahuarama. Anapita sacai nipiquë yahuarama. Oparosa, asitonarosa, inapitanta co canpitariso shapiramahuë, nitërinsopita canama. Yaipi noparosa quëtaranquëma, masha yahuërinso pitarë chachin, tënin, itërin: Inaquëran ta'antarin: ¹⁴ Ya'ipi naporahuëso yonquiatoma, sinioro tëhuatoco. Ya'ipinquëma, tëhuatatoma notëquëna'chin ni'co. Ira'ca shimashonëmapita, iopiratisii yonsanquë yahuapona.Nisha, nisha, mamanshi moshapi. Inapochachin , Iquipitoquënta nipi. Inapita, aporahuatoma sinioroichin chinotoco. ¹⁵ Napoaponahuë' co sinioroichin, chinotohuatamahuë, ipora tahuëri huayonco, insosona yachinotëramaso: ¿shimashonëmapita iopiratisii, yonsanquë yahuapona, nisha, nisha mamanshi moshapiso nica? ¿Amororosa mamanshinëna, moshapiso' nica? Caso nipirinhuë quëmopinëhuëpitaro'co chachin sinioro chinotërai. ¹⁶ Napotohuachina, israirosari apanitona itapona: Co nonhuantëraihuë, inapochi mamanshi moshacahuaiso. Sinioro ayonquirincoi, ama inapochin nicacahuaiso marëhuë. ¹⁷ Iquipitorosaso, chini'nquë asacatatonacoi, aparësitopirinacoihuë, inaquëran ocoirinacoi. ¹⁸ Shimashonëhuëipitanta ocoirin. Quiya nitonëhuëiquëcha'chin, pa'pi huë'huëpiro' nininsonta na'aro ninin. Huë'naiquë nisha, nisha piyapisa, yahuëpiquë nahuëtëirai. Tahuëri, tashirë chachin apairincoi. ¹⁹ Napopirinahuë, Cosoiriso itapon: Yosëso, noyasa'chin ninin. Na'poaton apitatënquëma, co nisha, nisha, chinotamaso quëtërinquëmahuë. Co noyahuë cancantatoma oshahuanpatama, co ahuantarinquëmahuë. ²⁰ Inapita aporahuatoma, nisha nisha mamanshi moshahuatama, sinioronta ihuërëtarinquëma. Na'con catahuasapirinquëmahuë, chini'quën anai'ntarinquëma huachi itërin: ²¹ Napohuachina, israirosa'so topi: Co napoaraihuë. Sinioroi'chin quiyanta, chinotarai topi. ²² Inapiquëran Cosoi, ta'antarin: Sinioroichin chinotarai, tënama niquëhuarë, canpitaora cha'chin, naporama itërin: Quiyaoracha'chin mini naporai, topi yaipiquëran: ²³ Yai'pi mamanshi mosharamasopita, nipachin apoco. Inapita tëhuënchinso apohuatama, yai'pi cancanëmaquëran, Sinioroi'chin, natëarama huachi. Inasachin, israiro'sanpoaso chinotërëhua itërin Cosoiri. ²⁴ Sinioroso, yosënënpoa ni'ton, inasa'chin chinotarai. Naporahuaton, ina camairinpoasa'chin nisarai, to'pi, yai'pi israiro'sa. ²⁵ Naporo, tahuëri Cosoiriso, ira'ca yosërë anoyatopiso, israiro'sa shahuita'antarin. Siquimo ninanoquë, naporin. Sinai motopiquë, shahuitaton, pënëntërinso,camaitërinso, inapita shahuitërin. ²⁶ Inaquëran, yai'pi inapita yosë pënëntërinso, quiricanën nishitopisopita shahuitërin. Yai'pi inapita sha'huihuachina. Isina nararoquë, pan'ca na'pi acocaiso shahuirin. Camaitohuachina, yosë chinotacaiso marë pëi'piso, piranyan acopi. ²⁷ Inaquëran, yai'pi israiro'sa itan'tapon: Ni'co, iso napiso ana tahuëri, ayonquiarinpoa. Ipora tahuëri, Sinioro sha'huitërinpoaso natanatëhua, apanirëhuaso ayonquiarinpoa."yoscoa'rë inasachin chinotarai " tënamasonta ayonquiarinquëma. Ina na'pi nipatama ayonquiarinquëma itërin: ²⁸ Inaquëran Cosoiso, yai'pi israiro'sa, yahuëpiquë apa'antarin. ²⁹ Cosoi chimininso Inaquëran, Cosoiso chiminin. Pasa shonca pi'i, yahuëtapaso chiminin. Yosë piyapinën ninin inaso. shahuitëranquëmaso, chachin nahuinin. ³⁰ Chiminpachina, nopanënquë papitopi. Nopanënso, tinato-sëra ninanoquë, yahuërin. Inaso, ninano, iprain huënton, israirosa nopa mapiquë yahuërin. Ca'asi motopi quëran, pëtëtë parti. ³¹ Cosoi, chiminaquë huarë, israirosaso sinioroichin, chino'tapi. Ancianosa, siniorori , nosororinso, nipisopita, chiminaquëhuarë, sinioroichin chino'tapi. ³² Cosi nansëquën papitopiso. Cosi nansëquën , iquipito quëran quëpisonta, siquimo ninanoquë pa'pitopi. Ina nopaso cacopo ira'ca, siquimo Pa'pin amoro itopiso, huininpita pa'antërin. Pasa coriqui marë, pa'antërin. Ina nopaso cosi shin'pitanquën, ninin huanchi. ³³ Ina piquëran, Aaron huinin, Iriasaronta chiminin. Chiminpachina, quëmopinënpitari huinin, Huinisë itopiso, nopanënquë papitopi. Inaso nopa iprain, huënton, israirosa nopa mapiquë yahuërin. Inaquë, Cosoiri nopa quëtërin ni'ton, inaquë papitopi.