¹ Ol lain manmeri bilong Israel i wokabaut igo inap ol i kamap long ples nating bilong Moab klostu long taun Jeriko na wokim haus sel bilong ol long dispela hap. Ol i stap long narapela sait long Wara Jodan na taun Jeriko i stap long narapela sait. ² Balak pikinini man bilong Sipor i lukim olgeta samting ol Israel i mekim long ol lain Amor. ³ Ol lain manmeri bilong Israel i planti tru olsem na Moap i pret nogut tru long ol. ⁴ Long dispela taim Balak pikinini man bilong Sipor i bin stap king bilong Moap, em i tokim ol hetman bilong ol Midian olsem, "Dispela ol manmeri i pulap tru na ol inap kaikai na pinisim olgeta samting i stap long ples bilong mipela olsem ol bulmakau i kaikai olgeta gras samting." ⁵ Em i salim ol wokman bilong en i go long Balam pikinini man bilong Beor, i stap long Petor arere long wara Yupratis, long graun bilong ol manmeri bilong en. Em i singaut long em na i tok, "Lukim wanpela lain manmeri i kam long Isip na i stap hia, ol i planti tru na i karamapim olgeta hap bilong graun na nau ol i kam klostu tru long mi. ⁶ Olsem na inap yu kam na mekim tok bilong bagarapim ol dispela lain manmeri, bilong wanem ol i gat bikpela strong i winim mi. Sapos yu mekim olsem, orait mi ken pait wantaim ol na rausim ol long dispela graun. Mi save olsem husait man yu blesim em bai amamas, na husait man yu givim tok bilong bagarapim em, em bai i kisim bagarap." ⁷ Orait ol hetman bilong Moab na bilong Midian i kisim moni samting bilong baim Balam long mekim tok bilong bagarapim ol Israel. Ol i kam long Balam na tokim em long ol toktok Balak i mekim. ⁸ Balam i tokim ol, "Nau nait yupela i mas i stap bek, wanem tok God Yawe i tokim mi em bai mi tokim yupela" Orait long dispela nait ol hetman bilong Moab i stap bek wantaim Balam. ⁹ God i kamap long Balam na i tok, "Husait ol dispela man i kam long yu ?" ¹⁰ Balam i bekim tok bilong God na i tok," Balak pikinini man bilong Sipor, em king bilong Moab i salim ol dispela man i kam long mi." ¹¹ 'Lukim, ol dispela lain manmeri i kam long Isip, ol i pulapim olgeta graun bilong mi. Yu kam nau na mekim toktok bilong bagarapim ol, olsem bai mi ken pait wantaim ol na rausim ol long dispela graun.'" ¹² God i bekim tok bilong Balam olsem, "Yu noken go wantaim ol dispela man. Yu noken mekim tok bilong bagarapim ol lain Israel long wanem mi blesim ol pinis." ¹³ Orait Balam i kirap long moning taim na i tokim ol hetman bilong Balak olsem, " Yupela go bek long graun bilong yupela, God Yawe i tok nogat long mi go wantaim yupela." ¹⁴ Orait ol hetman bilong Moab i go bek long Balak na tokim em olsem,"Balam i tok nogat long kam wantaim mipela," ¹⁵ Orait Balak i salim sampela moa hetman i gat nem antap liklik long ol man i bin go paslain. ¹⁶ Ol i kam long Balam na i tok, "Balak pikinini bilong Sipor i tok, "Noken larim wanpela samting i pasim yu long kam long mi, ¹⁷ long wanem, bai mi baim yu long planti silva moni na givim biknem long yu, na bai mi mekim olgeta samting yu tokim mi long mekim. Olsem na inap yu kam na mekim toktok bilong bagarapim ol dispela lain manmeri.'" ¹⁸ Balam i bekim toktok bilong ol hetman bilong Balak olsem, "Balak i ken givim mi kindom bilong en i pulap long silva na gol, tasol mi no inap sakim tok bilong God bilong mi, God Yawe, na mekim ol samting em i tok nogat long mi mekim. ¹⁹ Orait inap yupela i stap hia long dispela nait, na bai mi harim wanem samting God Yawe bai i tokim mi." ²⁰ Long nait God i kamap long Balam na i tokim em, "Ol dispela man i kam pinis bilong kisim yu i go, yu kirap na go wantaim ol. Tasol yu mas mekim wanem samting mi tokim yu long mekim." ²¹ Long moning taim Balam i kirap na stretim donki bilong en na i go wantaim ol hetman bilong Moab. ²² Tasol dispela wokabaut bilong en i kirapim belhat long God Yawe. Balam i go long donki bilong em, na ensel bilong God i sanap namel long rot olsem birua bilong bagarapim Balam. Tupela wokman bilong Balam tu i go wantaim em. ²³ Donki bilong Balam i lukim ensel bilong God Yawe i sanap long rot wantaim bainat long han bilong en. Orait donki i lusim rot na i go insait long wanpela gaden wain. Balam i paitim em long stik bilong putim em i kam bek long rot. ²⁴ Ensel bilong God Yawe i sanap long rot namel long sampela gaden wain, em i sanap long hap we tupela ston banis i stap long han kais na hansut i pasim na mekim rot i go liklik long en. ²⁵ Taim donki i lukim ensel bilong God Yawe gen, em i go pas long ston banis na i pasim lek bilong Balam long ston banis, na Balam i paitim donki bilong em long stik gen. ²⁶ Orait ensel bilong God Yawe i go moa na sanap long narapela hap we rot i go liklik tru na i nogat hap bilong tanim i stap long en. ²⁷ Taim donki i lukim ensel bilong God Yawe, em i sindaun i go daun tru aninit long lek bilong Balam. Balam i belhat na kisim stik na paitim em. ²⁸ Orait God Yawe i opim maus bilong dispela donki na em i tok long Balam, "Mi mekim wanem samting tru bilong mekim yu belhat na yu paitim mi tripela taim long stik?" ²⁹ Balam i bekim tok bilong donki olsem, "Mi paitim yu, long wanem yu mekim longlong pasin long mi. Sapos mi bin holim bainat long han, nau mi inap kilim yu pinis." ³⁰ Donki i bekim tok bilong Balam olsem, "Ating mi no dispela donki yu save sindaun na wokabaut long en olgeta taim long laip bilong yu i kam inap tete? O mi save mekim dispela kain pasin long yu tu bipo a?" Balam i tok ,"Nogat." ³¹ Bihain God Yawe i opim ai bilong Balam na em i lukim ensel bilong God Yawe i sanap long rot wantaim bainat long han bilong en. Orait Balam i daunim het na putim pes i go daun tru long graun na i stap. ³² Orait ensel bilong God Yawe i tokim em, "Bilong wanem yu paitim donki bilong yu tripela taim? Mi kam long yu olsem birua bilong bagarapim yu, long wanem pasin bilong yu ino stret long ai bilong mi. ³³ Donki i lukim mi na tanim i go arere tripela taim, sapos donki ino bin tanim i go arere, mi inap kilim yu pinis na larim donki i go." ³⁴ Balam i tokim ensel bilong God Yawe olsem, "Mi mekim sin pinis. Mi no bin save olsem yu sanap long rot long pasim mi. Olsem na sapos dispela samting i no stret long ai bilong yu, mi bai tanim na go bek gen." ³⁵ Tasol ensel bilong God i tokim Balam, "Yu ken i go wantaim ol dispela man, tasol yu mas mekim tok we mi tokim yu long toktok. "Orait Balam i kirap na i go wantaim ol bikman bilong Balak. ³⁶ Taim Balak i harim olsem Balam i kam, em i go long wanpela taun bilong Moap i stap arere long wara Anon, em graun mak bilong Moap. ³⁷ Balak i tokim Balam, "Mi salim ol man bilong kisim yu, bilong wanem na yu no laik kam long mi? Yu ting mi no inap long givim biknem long yu, a?" ³⁸ Balam i bekim tok bilong Balak, "Mi kam pinis long yu , tasol mi no inap toktok long laik bilong mi yet. God Yawe bai i givim mi olgeta toktok long mekim." ³⁹ Orait Balak i kisim Balam na tupela i go kamap long Kiriat Husot. ⁴⁰ Orait Balak i kilim bulmakau na mekim ofa na em i givim sampela mit long Balam na ol hetman i stap wantaim em. ⁴¹ Na long moning taim Balak i kisim Balam i go antap long mauten bilong giaman god Bal. Long dispela hap em inap lukim liklik hap lain tasol bilong Israel i stap long kem bilong ol.