1 God Yaweh i toktok long Moses na tok olsem, 2 "Toktok long ol manmeri bilong Israel na kisim ol stik bilong wokabaut long ol. Wanwan wokabaut stik long wanwan tumbuna lain na bungim 12-pela olgeta. Raitim nem bilong wanwan long stik bilong ol yet. 3 Yu mas raitim nem bilong Aron long wokabaut stik bilong ol lain Livai. I mas igat nem bilong wanpela bikman long tumbuna lain bilong ol yet wanwan. 4 Na yu mas putim ol dispela wokabaut stik insait long haus sel bilong bung long frant bilong bokis kontrak, em long hap mi save kam na bungim yu. 5 Husait man mi makim, bai sampela samting i kamap long wokabaut stik bilong em. Lif na flaua bai kamap long dispela wokabaut stik. Na bai mi rausim komplen bilong ol manmeri bilong Israel, long ol i mas stop long ol samting ol i wok long tok bek long yu." 6 Olsem na Moses i toktok long ol Israel. Na olgeta bikman bilong wanwan tumbuna lain i kam givim em wokabaut stik bilong ol, na namba bilong ol wokabaut stik i 12 olgeta. Wokabaut stik bilong Aron tu i stap wantaim ol dispela wokabaut stik. 7 Na Moses i putim ol dispela wokabaut stik insait long haus sel bilong bung long frant bilong God Yaweh klostu long bokis kontrak. 8 Long narapela dei, Moses igo insait long haus sel bilong bokis kontrak na em i kirap nogut olsem wokabaut stik bilong Aron long lain tumbuna bilong Livai i putim lif na flaua. Em kamapim ol nupela han bilong diwai na em kamapim flaua na em karim almon i mau na redi pinis. 9 Moses i kisim ol dispela wokabaut stik long frant long pes bilong God Yaweh kam autsait long ol lain manmeri bilong Israel na wanwan man i kisim wokabaut stik bilong ol yet. 10 God Yaweh i tokim Moses olsem, "Putim wokabaut stik bilong Aron long frant bilong bokis kontrak. Mekim olsem mak bilong kamapim asua long ol manmeri husait i laik pait bek, olsem na bai yupela i lusim pasin bilong komplen tumas long mi. Sapos nogat, bai yupela i dai. 11 Na Moses i bihainim strongpela tok bilong God Yaweh olsem em i bin tokim em. 12 Ol lain manmeri bilong Israel i toktok long Moses olsem, "Bai yumi olgeta i dai long hia. Bai yumi olgeta i bagarap tru! 13 Olgeta lain husait i kam antap o husait i kam klostu long haus sel bilong God Yaweh bai i dai. Ating bai yumi olgeta i bagarap a?"