¹ U Simoni uPeteli, umuzya nu positili wa Yesu Chilisiti, kuvala ve vaposheleye ulwitiho ulwa pamwanya inza lwelula lwe twaposheleye, ulwituho muvugolosu uvwa Mulungu witu nu muposhi uYesu Chilisiti. ² Uvwila numutende vyonjele ishipimo mu vumanyisanyi vwa Mulungu nu Yesu uMwene witu. ³ Kumaha gakwe aga vulungu, izi zyonti zya vulanzi nu vunyila Mulungu vatupiye iswe kujendela muvumanyinsanyi vwa wene we ahatwita iswe kujendela muvwila vwakwe nu kwinza. ⁴ Ukujendela mwizwi ahatupa iswe imfingwi impiti izya pamwanya nkani, ukuti muve mwe vakugavana mu vulungu uvupeliwa, lwe mulushimbiye ulunanjiho lwa munsi lwe lukufumila kushinyonywa shavutalamalandu. ⁵ Pashifukwa shinishi, muyikungulaje pakuvomba pakonjelezya uvwinza ku lwitiho lwinyu, na kuvwinza mwonjelezye uvumanyinsanyi, ⁶ kuvumanyinsanyi mwonjelezye ukuyilema, nu kuyiema mwonjelezye uvujimvu, ku vujimvu mwonjelezye uvunyila Mulungu, ⁷ Pa vunyila Mulungu mwonjelezye ukukunda avamwinyu, nu kukunda avamwinyu mwonjelezye ishikunzi. ⁸ Inga zyonti zinizi zili mwimwe nu kukula mwimwe, zilivefya imwe ku vugumba pamu kuvusita kupa insanga muvumanyinsanyi vwa Mwene witu Yesu Chilisiti. ⁹ Loli uno we zikumusovela zinizi ali kupipi nkani ukuva wuntonko, lwe aluvilwe ukuti vahamuzelufya kumbivi zyakwe izya hali. ¹⁰ Pelelo, vamwitu, yikungule ukuti ulwitiho lwinyu lusayo lwinyu lwa nalyoli, she inga mukuvomba zinizi, mutalipunula nalumo. ¹¹ Mwidala linili mulitulwa nkani imwe uvwinjililo vwa kushinamwene sha mwene witu nu muposhi uYesu Chilisiti. ¹² Pelelo ine ndiva ne wakuvakumbusya imwe zinizi, na she muzimanyile, na she mugomile muvwa nalyoli vwe muli navwo. ¹³ Ine nkusiva ukuti shinza kuline, lwe nchili ndi mwihema linili, kuvasonjele imwre mwidala lya kuvakumbusya. ¹⁴ She manyile ukuti shinishi kwe nefyaje ihema lyane, mulandu uMwene witu uYesu Chilisiti avumbuye zinizi kuline. ¹⁵ ndiviha amaha gonti ukweny ukuti lwe ndiyepaga muhave mwe vakukumbuha zinizi. ¹⁶ She tutalandasite uvyila vwe vakwiliha muvushevu pe twagomvile ukuti nimwe mumanye amaha nu kwinza kwa Mwene witu uYesu Chilisiti, loi twali twe bvahome ukuzisimishizya imbombo zyakwe. ¹⁷ She aposheleye ulushindiho nu vushindamu kwa Mulungu uTata lwe izwi lihinza kukwakwe muvushindamu vwa pamwanya, likuti, ''Uno we mwana wane ukundwa, we nkuseshela mu wuyo.'' ¹⁸ Iswe sweneswe tuhivwa izwi kufuma kumwanya lwe twali nawo pigamba ifinjile. ¹⁹ She twamile namazwi gavukuvwi lye lilusizye ukusimpa, inza she mungavomba ahinza lwe mukutejelezya ngati nyale yikwiha kumo kushisi ukufiha kuvushelo vwisiku ninzota zya kunzanchi zikulama mu moyo ginyu. ²⁰ Pamwanya pa vyonti, muzyaganiaje ukuti kutali amasimbo ga vukuvwi gakwinza kufuma ukwilula izyakwe wuyo umwenesho. ²¹ She kutali uvukuvwi navumo vwe vukwinza nukwanza kwa muntu, loli avantu vakuyanga ukufuma kwa Mulungu lwe vali numupepo umufinjile.