¹ Uno we akwitiha ukuti uYesu wu Chilisiti we apafilwe ukufuma kwa Mulungu, nuno we amukunzite uTata we amukunzite nawe mwana we apafilwe mu wuyo. ² Umu mwe tuzimanyile ukuti tuvakunzite avana ava Mungu: twe iswe tumukunzite uMulungu nu kuzyivwila inkomelezyo zyakwe. ³ She ulu lwe lukundo ulwa Mulungu" ukuti tuzisunjilile inkomelezyo zyakwe. Zyope nazye nkomelezyo zyakwe teng'wamu. ⁴ She wonti wula we apafilwe ukufuma kwa Mulungu we akuyipota insi. Uvu vwe vupoti vwe vuposite insi, nalwe lwitiho lwitu. ⁵ Wu nanu we angazipota insi? Wewula we akwitiha ukuti uYesu mwana uwa Mulungu. ⁶ Uno wewula we ayinzile kwidala lya minzi namavanda: uYesu Chilisiti. Atahinza kuminzi geka, nkandi nakuminzi namavanda. Umupepo we wuyo we akusimishizya , mwe pe umupepo we wanalyoli. ⁷ She valipo vatatu veva kusimishizya: ⁸ Umupepo, naminzi, na mavanda. vanava vatatu ve vahana mulwivwano. ⁹ Nanti tukuposhela ulusimishizyo ulwa vantu, pe ulusimishizyo ulwa Mulungu lupiti nkani. She ulu lwe lusimishizyo ulwa Mulungu lwe alusimishizizye kuzya mwana wakwe. ¹⁰ Uno we akumwitiha we ali nulusimishizyo muli wuyo weka. Nuno we atakumwitiha uMulungu we akumuviha uMulungu ukuti ali nilenga, mwe pe atalwitisile ulusimishizyo lwe uMulungu afumizye kuzya mwana wakwe. ¹¹ Ulyene ulusimishizyo lwe luno: uvulanzi uvwa shima, nu vulanzi uvu vuli mu mwana wakwe. ¹² Uno we ali nu mwana we ali nu vulanzi. Pe nuno we atali nu mwana uwa Mulungu we atali nu vulanzi. ¹³ Pe nkuvasimbila imwe zinizi kwe kuti muhazimanye ukuti muli nu vulanzi uvwa shima- kulimwe mwe mukulyitiha izina ilya mwana uwa Mulungu. ¹⁴ Havili, ulu lwe lusuvilo lwe tuli nalo pilongolela lyakwe, ukuti lwe inga tukuvala shimo ukuyana nu kwanza kwakwe, pe uwene akutwivwa iswe. ¹⁵ Havili, inga tukumanya ukuti akitwivwa iswe- zyonti zye tukumulava- pe tumanyile ukuti tuli navyo vyonti vye tumulavile wuyo. ¹⁶ Inga wumo akumwenya uwamwavo akutala amalandu ge gatakumuletela imfwa, ahondeye apute, nu Mulungu alimupa uvulanzi. nkuholania navala ve imbivi zyavo zitakuvaletela imfwa. Vulipo uvutala malandu vwe vukuleta imfwa; ine ntakuyanga aziputilaje izyo. ¹⁷ Vonti uvusita vugolosu vutala malandu, nkandi pali uvutala malandu vumo vwe vutakuleta imfwa. ¹⁸ Tuzimanyile ukuti uno wonti we apafilwe ukufuma kwa Mulungu we atakutala amalandu. Nkandi un o we ahapapwa ukufuma kwa Mulungu we akumusuvila, we nu muvivi wula atangamuvulazya. ¹⁹ Tuzimanyile ukuti iswe tufumile kwa Mulungu, tuzimanyile havili ukuti insi yonti yigonile mumaha aga muvivi wula. ²⁰ Nkandi tumanyile ukuti umwana uwa Mulungu ayinzile nukuti atupe uvumanyisyanyi ukuti tumumanye wuyo we wanalyoli. Havili, tuli muli wuyo we wanalyoli, mu mwanawakwe uYesu Chilisiti. Wunanu we wu Mulungu uw nalyoli na wuvulanzi uvwa shima. ²¹ Mwe vana, yepushi mwemwe mweka ku viholanio.