¹ Ishi she umuntu akwanzikwa kutwenya iswe, ngati twe vavomvi va Chilisiti nuvusunzi vwa vwanalyoli vwa Mulungu uvwa kukwilu. ² Ilelo she shikwanzikwa muvusunzi shakuti vakuvoneha ukuva vatungamu. ³ muvusunzi shakuti vakuvoneha ukuva vatungamu. Nkandi kwimwe shintu ishisi nkani ukuti ningava pavulonzi nimwe pamu ukulongwa navantu. She nine ntakuyilonga nene neka. ⁴ Ine ntayimanyile inongwa nayimo ye vagomvile ukumbushila ine, nkandi isho shitakung'wanamula ukuti ine manyikilwe ukuva ne mugolosu. Woka we akundaga ine wu Mwene. ⁵ Pelelo mutahatambulaje uvulonzi vwa shimo pe ahavalilo hashili, pe uMwene ashili kwinza. Alivileta apazele ivintu vye vivwamile ivwa kushisi nu kuvumbula imbombo ya moyo. Pe wonti aliposhela intimo zyakwe kufuma kwa Mulungu. ⁶ Ishi vamwitu, nkaviha imfundo zinizi kwine neka nu Apolo pa shifukwa shinyu, ukuti ukufuma kukwitu imwe mumanyile ishing'anamulo she shikuti, ''mutahajende mushile zye zisimvilwe.'' Izi zili vunuvu ukuti nawumo uwimwe ayimwamishe ukulonjela woka ukuvushila uwamwavo. ⁷ She wuwenu we akwenya impambano pakasi piwe navanji? Shoni she ulinasho she utaposhele? Inga ushioshele ishene, shoni she ukuyitutumula ngati utahashiposhela ishene? ⁸ Muli navyo hali vyonti vye muhanzaga! Mwe vadumbwe hali! Mwanzite ukulajila- iswe teshe tuli! Mwemumo, nanzaga ge muhalajilaga, ukuti tungalajila poka nimwe. ⁹ She nkusiva uMulungu atuvishiye iswe umupositili pavuzelu ukuva vavumalilo pamuzele, umwakujendelela havili ngati vantu vevali vakufwa vulo. Tuyipezile shakwenyezya kunsi- kuvahavizya, na kuvantu. ¹⁰ Twe vakaleza shifukwa sha Chilisiti, loli mwevanjele mwa Chilisiti. Twe vayeyevazu, loli mwe vamaha. Mwe vimishilwa, loli iswe twe vasulwa. ¹¹ Ukufiha pahavalilizyo iha tuli ninzala ni shinyoto, twe vapina munzwalo, tukuhomwa havili tutali ninkaya. ¹² Tukuvomba nkani, tukuvomba inyove zyitu. Lwe vakutuliga, tukuvalota. Lwe vakutuvwima, tukujimbilila. ¹³ Lwe vakutuyanga uvuvivi, tukuyanga umwa vwololo. Tuyipezile ukuva twe vakuhanwa nava munsi havili twe nswaswa ivya vumalilo vwa vintu vyonti. ¹⁴ Ntakusimpa ivintu vinivi ukuvasamula imwe, loli ukuvasoha imwe ngati mwe vana vane avankundwa. ¹⁵ She pope inga ungava na vakukwenyelezya 10,000 mwa Chilisiti, mutali na vababa avinji. She nkima nebaba winyu mwa Chilisiti uYesu kujendela mwipangwi ilyinza. ¹⁶ Pe nkuvalava imwe muve mwe vakwejelela izyane. ¹⁷ She shovene nkuvatumila imwe uTimoti, unkundwa wane nu mwana umusuvaliwa mwa Mwene. Alivakumbusya imwe izya madala gane mwa Chilisiti, inza she nkuvamanyisya avene ponti pala havili namuvivanza vyonti. ¹⁸ Ilelo vamu avimwe vakuyikwezya, vakuva ngati pe ntahinzaga kukwinyu. ¹⁹ Loli ine nkwinza kukwinyu shinishi, inga uMwene akasime. Pe ndimanya tekwe kumazwi geka aga vala ve vakuyikwezya, nkandi ndiyenya amaha gavo. ²⁰ She ishinamwene sha Mulungu shitali mumazwi nkandi mumaha. ²¹ Mukwanza ishoni? Nkinze kukwinyu nulusanzu pamu nushikunzi nu mupepo umutehamu?