¹ Bulus, una a kadura ku Ugomo Asere Yeso usuro uwuna Asere unu ubura uru, nan nu Ugomo Asere Yeso unu uge sa tibe. ² Uhana ahira Timoti, vana um ukadura uhem, ubura nan iriba ishew usuro Asere nan Ugomo Asere Yeso Ugomo Asere aru. ³ Kasi imumsa mabuka we uwu, sa indusa uhana makidoniya agi, uda tonno u Afisa uwuu aye kati wa wuzi ure ubezi sas. ⁴ Kati wa cari uganiya ahira kunna ire itente wana bassa uzatu ubinani. Agino a ezen in matara, unu guna ubenki ukatuma ka Asere, ahira unya umu cee. ⁵ Ana me nice ni inko utize ine ini uhem uni usuro iriba ilau, wanu inko iriba ishew, nan urusa ukadura. ⁶ Aye waciki una uwemi, wa gamirka uhana atize tihura. ⁷ Wa nyara wa cukuno anu dungara u inko utize tini kubu abanna me daki wa rusa imum be sa wazin nu boo me nani imum me sa a tonno ni. ⁸ Abanna me ti rusa u inko u tize u rezi inki a wuza tini una uriri ⁹ Ti kuri tirusa agine me, u inko u tize tini kubu barki daki una kadura mani ba, abanna barki anu uzati ukabsa u inko utize, anabu anu nyarsi me u tize, nan anu zati utarsa Asere, nan ana madini, nan anu zata Asere, nan anu cori utize. An nya u inko utize barki anu uhuza akacoo nan ka' ino nan anu huza anu. ¹⁰ Barki anu tarsa aneh nan ana nya vana uruma nan vana uruma, barki anu ucuzuzo anu wa haa we a nirere, barki ana macico nan anu uboo imum be sa daki iraa ba, nan vat imum besa izin in nieru nan nimum be sa izi ikadura. ¹¹ Igeme ine ini unonziko tize ta sere Asere kani unya anyo arere, age sa anyam ucanti. ¹² Inzin iriba irum inu Ugomo Asere Yeso Ugomo uru, de sa ma wum iruba ihu, abanna maa kuri ma wum anyimo a katuma me. ¹³ Mi mazi unu coro utize mani, unu yomo anu nan unu wuza u timumum ti buri. ¹⁴ Abanna vat anime amuzin ubura barki ma in anyimo utame, wanu uzatu ukadura. Abanna me uronta wa Ugomo Asere kpankom nan u hem ukadura, wan u hem Ugomo Asere Yeso. ¹⁵ Tize ti Asere ti u kaba tini, ta bari konde avi ma kabi, unu guna Ugomo Asere Yeso ma ribe unee barki ma buri anu a madini, anyimo awe me mi mani inteki inu corno me. ¹⁶ Barki ane ma kem ubura barki ahira am unu tuba, abezi iriba i neze i Yeso Ugomo Asere. Ma wuu igino imum bati in cukuno imumum ubata ahira ande sa wa kabi kadura uhana uvenke uzati umara. ¹⁷ Aname, ugomo unee usso ma yenne, unu uzati iwono, in hunzi, Asere mameni unu udang ninonzo ni cukuno nan uhana umaraa unee vat-vat. Icukuno Anime. ¹⁸ Inzinu nya uwe u inko utize, vana um, Timoti, in zin nu wuza anime barki imum be sa amu wuza ina dumo azesere awe me, barki uribe ani kono nirere. ¹⁹ Wuza imum agino barki u cukuno umu hem in kadura unu iraa ure-re. Are anu wa nyarime ukunna uhem in kadura ka we. ²⁰ Gusi an Himinayus nan Iskanderi ande sa ma wito we atari ti nu uburu bati ma hungukowe titoi a hira corso utize.