¹ Ana me abanga uganiya, nihenu, daki ya cukuno se a nyettike shi ni vat ba. ² Isa rusa ni vat, uwui ugomo Asere u eze gusi ukari in niye. ³ Uganiya sa anu wadi gu tizin, ''iriba irum nan ticukum ti huma'' abini me iwono idi tu we. Idi zi pazaza gusi uneh ahira uyoo. Wada suburka me ba. ⁴ Shi nihenu, ida zo me shi anyimo amariu ba, uguna uwui me udi mukurka shi gusi ukari. ⁵ Vat ushi ahana amasa wani nan ahana uwui. Tida zon duru ahana ani ye, nani amariu ba. ⁶ Kati ti wuzi moro gusi ukasu wa anu ba, ca ti cukuno unu hira ahira nan unu inko iriba ahira a'indw. ⁷ An desa wa wuza moro wa wuza in niye nini, andesa ubere uhuza, uhuza in niye nini. ⁸ Sa ya cukuno haru anu uwui wani, ya cukuno duru ti inki iriba ahira a'inde, ti inki iriba nan hem ucukuno gusi imum i kurzo uru, ti inso iriba ti kem ubura anyimo ugomo Asere. ⁹ Daki Ugomo Asere maa inki uguna ti iri iriba i iburi ime me ba, bati ti kem ubura uni usuro uYeso vana Asere. ¹⁰ Me mani maa wi barki haru, bati nani ti hira ahira nani ti zin moro, ti di cukuno nigoo me nan me. ¹¹ Barki anime, i nya acece nikara niriba, in benki acece, gusi imum sa isa zina nu wuza me. ¹² Ti zinu tira ushi tari nya ni ande sa wa zin katuma anyimo ashime ti nanu, wa kuri wa dungura shi anyimo ugomo Asere. ¹³ Ta gunna shi canti ni we memerum anyimo uhem, barki katuma kawe me, cukuno ni ahuma acece ashi. ¹⁴ Ti zini utira ushi tari, nihenu; gbarika ni anu zatu ace, benki ni anu zatu akara, cukuno ni riba isheu acece ashi vat. ¹⁵ Kati i garza imum buri ini imum iburi, ca icukuno i wuzi acece imum i huma. ¹⁶ Wuza ni iriba irum konu maya. ¹⁷ Wuza ni biringara sarki umarsa. ¹⁸ Bezi ni iriba irom ahira atimum vat. Imum sa ugomo Asere ma nyara anyimo vana umeme Yeso uru. ¹⁹ Kati i hunze tize ti bibe ta sere. ²⁰ Kati i uzi u'inko ababga. ²¹ Mansa ni vat timumum. Inta ni imum besa irizi. ²² Wuna ni pit ahira atimumum ti buri. ²³ Ca ugomo Asere ulau ma kuro icukuno lau, ca bibe bi shi, wan uvengize, nan nipum a inta we memeru sarki imum iburi barki u aye Yeso vana ugomo Asere. ²⁴ Desa ma tisa shi ugino me, unu iriba ishew mani, de besa madi wuzi anime. ²⁵ Nihenu, wuza ni haru biringara cangi. ²⁶ Iso ni nihenu vat in nu gbindirko uriri ubibe bi lau. ²⁷ Ma pata shi nan Asere basa ni unyettike ugeme aje ani henu vat. ²⁸ Timumum tiriri acoo aru ugomo Asere ti cukuno nan shi.