¹ از کلیسا شیخ، به گایوسِ عزیز، کی اونَ واقعاً جی تَه دیل دوس دَأرم. ² ای عزیز، دوعا کونم کی تی تمامِ کارانِ میَأن موفق بیبی و هوطویی کی تی روح و روان سلامته، تی بدنم سلامت بیبه. ³ وختی بعضی جی ایمانداران بأمود اَیه و مرَه خبر بدَد کی تو چقدر حقایقِ الهی یَ وفاداری، و چوطو مُطابقِ انجیلِ اَحکام رفتار کونی، خیلی خوشحالَبوستم. ⁴ مرَه هیچی ویشتر جی اَن خوشحالَ نوکونه کی بیشتَأوم می زأکأن حقیقتِ جَه پیروی کوند. ⁵ ای عزیز، تو خدایَ وفاداری مرَه خدمت کونی، چون خادمینی کی اویِ جَه دواردَ پذیرایی کونی، هر چند کی اوشَأنَ نشناسی. ⁶ اوشَأنْ اَمی کلیسا دورون تی مهربانی جَه تعریف بوکودد، اگر بتَأنی جوری کی خدا سزاواره اوشَأنَ بدرقه بوکونی تا خوشَأنَ سفرَ ایدامه بدد، کارِ خوبی بوکوده ایی. ⁷ چون اوشَأنْ خداوندِ وَسی سفر کوند تا انجیلِ پیغامَ غیرِ مسیحیانَ فأرسَأند، و اوشَأنِ جَه کمکی هم قبول نوکوند. ⁸ پس اَمَرَه واجبه که اَجور آدمانَ کمک بوکونیم تا بتَأنیم حقیقتِ انتشارِ میَأن اوشَأنِ مرَه شریک بیبیم. ⁹ من ایتَه نامه کلیسا رِه بینیویشتم، ولی «دیوتْرِفیس» کی همیشه دوس دَأره خورَه پیش تَأوَأده و اویَ مسیحیانِ رهبر جلوه بده، مرَه قبول نَئره، و می گبانَ اعتنا نوکونه. ¹⁰ وختی بأیم اویَ اونِ کارانَ رسیدگی کونم، و همۀ کلیسا رِه تعریف کونم کی چی اتهاماتی اَمرَه بزَه دَأره و چه چیزایِ زشتی دربارۀ اَمَأن بوگوفته دَأره. و اَ کارانِ مرَه هم قانع نوبوسته، بلکی ایماندارانی کی سفرِ میَأن ایسَه دَه پذیرایی نوکونه، و کسانی کی خَأید اوشَأنَ پذیرایی بوکوندِ جولویَ گیره و اوشَأنَ کلیسا جَه بیرون تَأوَأده. ¹¹ ای عزیزِ برأر، وَأنأل اونِ رفتار تی رو تأثیر بنه، بلکی تو خوبی بوکون. آدمِ نیکوکار خدا زأیه، آدمِ بدکارْ هیچ موقع خدای نیده دَأره. ¹² ولی همه دربارۀ «دیمیتریوس» گوید کی آدمِ خوبی ایسه، حتی خودِ راستی هم شهادت دِهه، و اَمَأنم شهادت دهیم کی اون آدمِ خوبی ایسه و دَأنی کی راس گوئیم. ¹³ چیزایِ زیادی دَأشتم کی تِرِه بینیویسم، ولی نخَأیم کاغذ قلمِ مرَه بیبه، ¹⁴ ولی اُمیدوارم زودتر ترَه بیدینم و حضوری گب بزنیم. ¹⁵ سلامت بیبی، دوستان همه تَه تِرِه سلام رسَأند، می سلامَ تک تکِ دوستانَ برسَأن.