¹ فکر نوکونم نیاز بیبه کی مؤمنینِ کمک کودَأنِ رِه شمره بینیویسم. ² چون دَأنم کی شومَأن خودتان اَ خدمتِ انجام دَئَنِ رِه اشتیاق دَأرید، و من مقدونیه ایماندارانِ ورجَه افتخارِ اَمرَه شیمی جَه تعریف بوکودم، و اوشَأنَ بوگوفتم کی اَمی ایمانداران یونانِ میَأن جی پارسال کمک کودَأنِ رِه آماده ید، و شیمی شور و حرارت خیلی از اوشَأنم مشتاق بوکوده کی کمک بوکوند. ³ من اوشَأنَ بوگوفتم کی شیمی هدایا آماده یه، هَسَه اَمی برأرأنَ شیمی ورجَه اوسه کونم تا مطمئن بوبوم، نوکونه اَن همه تعریف شیمی جَه بوکودیم پوچ بیرون بأیه. ⁴ چون اگر بعضی جی مقدونیه مسیحیان می مرَه بأید و بیدیند کی بعدِ اَن همه تعریف، هنوز شیمی هدایا آماده نییه، اونموقع هم اَمَأن شرمنده بیهیم هم شومَأن. ⁵ پس لازم بیدم کی اَمی برأرأنِ جَه خواهش بوکونم کی پیشتر جی من شیمی ورجَه بأید و هدایایی کی وعده بدَه بیدَه آمادَه کوند تا وختی من فأرسم اویَ شیمی هدایا آماده بیبه، و اَن معلوم کونه کی شیمی بخشش جی روی مِیله، نه جی رویِ اجبار. ⁶ به یاد بدأرید کی هر کی کمتر بکاره، کمترم دِرو کونه، و هر کی زیاد بکاره زیادم دِروکونه. ⁷ هر کس هو قدر فَأده کی اونِ دیلِ میَأن نَهَه، نه جی روی اجبار و بی میلی، چره کی خدا کسی یَ دوس دَأره کی شادی اَمرَه ببخشه. ⁸ و خدا قادره کی هر برکتی یَ ویشتر جی شیمی نیاز شمرَه عطا بوکونه، تا نه فقط خودتانِ احتیاجَ برآوردهَ کونید، بلکی بتَأنید سخاوتمندی اَمرَه کارایِ خیرِ میَأن بذل و بخشش بوکونید. ⁹ چنانکه بینیویشته بوبُسته:«اون بذل و بخشش کونه و فقیرانَ فأده، اونِ عدالت تا اَبد پایداره.» ¹⁰ و خدایی کی بذرَه کشاورزِ رِه و نانَ خوردَنِ رِه فراهم کونه، شمرَم بذر فراوان عطا کونه و شیمی محصولَ چن برابر زیادَ کونه، تا بتَأنید دیگرانَ کمک بوکونید، تا شیمی کارایِ خیرِ محصول فراوان بیبه. ¹¹ بله، خدا شمرَه هر چیزِ دورون بی نیاز کونه تا شومَأنم بتَأنید هر فرصتی میَأن دیگرانَ کمک بوکونید، و موقعی کی اَن کمکان نیازمندانِ دس فَأرسه، خیلیان شیمی هدایا وَسی کی بواسطۀ اَمَأن به اوشَأنِ دس فَأرسه دَأره خدایَ شکر کوند. ¹² پس اَمی خدمت فقط مؤمنین نیازَ برآورده نوکونه، بلکی باعث بِه خلیان خدایَ شُکر بوکوند. ¹³ و اَ خدمت دلیلی ایسه شیمی ایمانِ رِه و مردم خدایَ اَنِ وَسی شُکر کوند، چون نه فقط شیمی ایمانَ به مسیحِ انجیل اعتراف کونید، بلکی دیگرانم اونچی میَأن کی دَأرید سهیم کونید و ثابت کونید کی شیمی اعمالم شیمی اعتقادِ مَأنستَأن دوروسته. ¹⁴ و اوشَأن خدا اَ عظیمِ فیضِ وَسی کی شیمی اَمرَه یه، علاقه و اشتیاقِ زیادِ اَمرَه شمرِه دوعا کوند. ¹⁵ خدایَ شکر اونِ عطا وَسی کی نِشَه کلماتِ اَمرَه وصف کودَأن.