¹ Tung karanu valung pbuta va jema, Neng oli Bernabas e Titus pbana nala topuni ning Yerusalem anga gadang jema. ² Nang jema anga ga gomi mi il anu ba ning ututuk jema ga gomi mi anga bola injil ga vaviag anga mia giala tutuk mang vede nang ubagang mia nama ka Yahudi banaga giala hama mi. Ibase, nang ukarajang ae nama ananu gala, oli mia ging ba biasa tutuk se nama-nama geg u galuali oli mia meneng nang ukarajang malekang ba jadi oli mang vede nang ukarajang malekang ba jadi oli nang ukarajang rasa sasuma banaga. ³ Oli, Titus, nala topuni, geng adi Yunani ga manusia ka bola geng sunat bana. ⁴ Il adi ae anga ga gomi anga ga kaku gonong leko tutuk di ae oli takimang-takimang maso oli ging leta-leta uling Yesus Kristus ba ga il nua ping u, ging pi jali piohi ake ugaluali ganang angahise bola ping pbana bola mia nama ga gahing gene. ⁵ Ang ga gelang, ning ka bola gio toku oras oledeng ning niaga anga hise injil ga nua hama tetap ae iyabung jia. ⁶ Ibase, nama ba tutuk se nama ugaluali anga ging ba il anu mi miha anga gang ka mia nala hama banaga, ga gomi anga Lahatala ka nama u olu banaga, ging ka iljoa ka mia tang mia meneng banaga. ⁷ Ga tang mate mida anga, ging geli se bola neng adi ba surat hamolang ga nua ga hama pbana nama ba sunat bado anga di giala tutuk giala hupba, emang hula Petrus gang ga nua ga hama pbana ututuk ubagang miama nama ba sunat jema anga gidang. ⁸ Ang ga gelang, Geng anga ba ga karajang anga miama Petrus gohi ukarajang miama Rasul gene miama nama sunat jema anga gadang, Geng anga ba oli na diri mi karajang neng miama Rasul gene nama ka nama ba ka Yahudi ga manusia bana. ⁹ Ga umate Yakobus, Petrus oli Yohanis, ging anga ba udung hamolang gene miama jemaat gadang anga hise ging giavak urasa miama Lahatala ga nua ga hama gang miama meneng anga ging giatang tani anga miama teng migamugu miama Bernabas oli miama nadang, ani hi se nama ba Yahudi ga manusia ba anga ning gola jema, seng hi se ging angami mate nama ba sunat anga gadang jema. ¹⁰ Ging nibagang ni sasenang se bola niohi masiking anga gonong gi uling, karajang ba ga rupa agani anga ba nang suka ukarajang. PAULUS PETRUS GA GAHALANG MIA TUBING ¹¹ Agani ibase, oras anu gomi mi Kefas Antiokhia ga bendar mi adu, nang tarang-tarang nomi miama gi kalila, anga ga gahalang gilang. ¹² Ging ba Yakobus ga goang gomi ka adu bado, Kefas gang bisa Yahudi ga manusia banaga anga ba gang gala il kede. Agani ibase, oras ging adu muse gang gavak u holong gavak miama gi leta, gang nama sunat anga gonong upbaliling. ¹³ Yahudi ga manusia ga ebeng anga ging leko-leko galuali gala topuni, Bernabas oli gavak miama nama ba suka leko akal mi gau misavaka. ¹⁴ Nang ga uling se gi tadili gi betur gomi anga ka jema injil ga viag ga asal u galuali banaga, anga muse nang Kefas gala tutuk nama tohing rae ga hahama mi, "Ing anga Yahudi ga manusia anga se ing malekang apbetal Yahudi ga manusia ga joang, getabani ba yahudi ga manusia banaga ibase ing geng paksa gohi apbetal Yahudi ga manusia molo?'' ¹⁵ Ping adi ba nama piogajali Yahudi ga abang gomi mi oli ping adi nama hamolang Yahudi ga abang ga lelang banaga. ¹⁶ Agani ibase, ning geli se bola nama ba apbetal molo-molo anga ka ga taurat u galuali gelang bana ani ibase ajimi anga ga iman parasaja Tuhan Yesus gomi mi. Oli ping geli se bola ping geng parasaja anga hi pi iman gomi gang ping gene molo e Kristus gomi mi ajimi anga ka pi taurat gelang banaga. Anga gelang, nama joa ka nua miama hukung taurat u gene banaga! ¹⁷ Agani ibase, ning di gie nidiri niavak pahi usaha anga hise ning di apbetal Kristus gomi, ning oli nidiri adi parisa se ning di nama dosa, agani se Kristus anga dosa u balenta ga manusia? Ibase naga! ¹⁸ Il ba nang garikil jema anga nang oli bale bakung mate, anga mia tubing se bola neng adi ba suka Lahatala ga parenta lavang. ¹⁹ Anga gelang, hukung taurat gomi mi, nang amina jema anga agani ibase nang apbetal Lahatala gadang. ²⁰ Nama neng miama Kristus gala leut jema. Anga gelang apbetal adi ka neng ba apbetal banaga agani ibase Kristus ba gie nomi mi apbetal. Adi nang apbetal-apbetal na iman parasaja miama Lahatala ga Val Amu gadang, geng anga ba gomi miama najahi, gang oli gadiri gavak pahi miama tilal. ²¹ Nang kalu Lahatala ga nua ga hama anga gatomba kalo nua hama anga taurat mi adu se, Kristus amina anga parasuma!