¹ Vakwetu, mwayiva nawa-nawa ashi ( Ame kuna kughamba kuvantuovo vayivo veta), veta kupangera muntu shirugho nashintje odho ana kuparuka. ² Mukadi kwara kumumanga veta ya nkwara na vyendi shirugho nashintje osho ana kuparuka vyendi, nkeneshi ana dohoroka mukafumu wendi, mukamali makura kumumangururamo mu veta ya nkwara. ³ Nkene ahoro mukafumu nayepeke ghuye vyendi shimpe kuna kuparuka, vakare kumwe tupu naye, ogho mukamali ngava mutwenya rukeshe. Ano ngoli nkeneshi vyendi adohoroka, kumangurukamo mu veta, kapi ngava mutwenya rukeshe nkene akwara mukafumu wa peke. ⁴ Vakwetu, anwe ngoli, Anwe mwafa kumbinga ya veta mbyo muna kara maruha gha rutu rwa Kristus. Vino kwa shoroka mposhi muhamene kukwendi, ogho, vavhumbura kughufe, nalighano lino ashi muyime viyimwa vya viruwana vya kukuyenda na nkango da Karunga. ⁵ Opo twakalire na maghukaro ghetu ghapa rutu, veta kwayitire madogho amadona ghakuyita ndjo ghayaruwane pa marutu ghetu, viruwana vyetu mbyo vyatu yitiliro mfa. ⁶ Pantantani twa mangurukamo mu veta. mbyovyoshi atwe twafa kuveta oyo yatu mangiro tukare mughupika. Vino kwashoroka mposhi atwe kapi tuna kuruwanena nka mughukaro wa kapito wapa veta oyo vatjanga, nane ngoli mughukaro wa ghupe wa pampepo. ⁷ Weni omo tuvhura kutanta? Tughambe ashi veta kuyita ndjo ndi? Hawe. Nampili kuna manga. Veta ndjo yaturongo tuyive ghundjoni. Ndi kapi nayiva lidogho ashi ghundjoni. ⁸ Veta ndjo yatapango nkondo ku ndjo, yirambwite madogho ghakukushuva-shuva murutu rwande. Ndi kapi pakara veta, ndjo ndi da fa mo. ⁹ Shirugho sha kapito ame kanu parukanga tupu liparu, ano ngoli kapi nayivire veta, ngoli opo nayivire veta, ndjo nado mbyo da shoroka, ame makura mbyo na fa kundjo. ¹⁰ Veta oyo hambara yiyite monyo mumwande makura yayo ayiyita mfa mumwande. ¹¹ Mukondashi ndjo kwa wanena nkondo mulivhango lya veta mposhi nuyive maghundjoni ghande. mukonda ya veta ame mbyo na fa. ¹² Veta yene-yene ya pongokanka, dimuragho nado kwa pongoka, kwa hungama ntani diwa. ¹³ Nane vyaviwa pone mbyo vyayito mfa mumwande ndi? Hawe, nampili kuna manga. Ndjo ndjoyaviruwano, ndjo kwaruwanita bveta yiyite mfa mumwande, ghukaro waghudona ghukushorore, veta yishorore ndjo ashi yidona ghunene. ¹⁴ Atwe twayiva ashi veta kwa kara pa mpepo, ame muntu na karo parutu rwa nyama. Ame kwa ngulita nukare numupika wa ndjo. ¹⁵ Mbyovyo shi ame nakukwatashi lighano ovyo naruwananga. Mukondasshi ovyo nahoro kuruwana, nakuviruwanashi, ano ovyo nanyenga mbyo vyakuruwana. ¹⁶ Nkene anuruwana ovyo napira kuhora, mbyo napulira nane ashi veta yiwa. ¹⁷ Ntantani nayiva ashi kapishi ame naviruwanango, nane ndodino ndjo dakaro mumwande. ¹⁸ Ame kwayiva ashi mumwande mwato ghuwa, rutu tupu rwa maghoko-ghoko mwato mutompo. Shihoro shakushana kuruwana ghuwane mposhilimo, mukuruwana asahi vitikemo ne kwato. ¹⁹ Ghuwa ogho nahora ashi ndi nughuruwane, kapi naghuruwananga, Ano ngoli ghudona ogho nanyenga po, ngo naruwananga po. ²⁰ Ano ngoli nkene ame kuruwana ovyo napira kuhora, vino kuna kutanta ashi nane kapishi ame naviruwanango, nane ngoli ndodino ndjo dakaro mumwande ndo daviruwanngo. ²¹ Mpo ngoli, ame kwa wanapo shihonena pa veta ashi: Ame kwahora kuruwana ghuwa, ano ngoli ghudona nagho kapi wa tundangapo pa pande. ²² Mumutjima wande ame kwapandura ghunene veta ya Karunga. ²³ Shimpe ame kumona nka ashi veta ya peke ya ruwanango murutu rwande. Oyo veta yayo kukurwanita naveta ya mumutjima wande. Yino veta kwantura mughupika wandjo odi dapangerango murutu rwande. ²⁴ Ame muntu wa ruhepo! Are ogho ngandjoghororomo muno murutu runo runa kuntwaro ku mfa? ²⁵ Ame kupandura Karunga kwa Jesus Kristus Hompa wetu! Mposhi, mumutjima wande kuna shana kutikitamo veta ya Karunga. Ano ngoli, rutu rwa panyama kuna shana rutikitemo veta ya ndjo.