¹ Tamburenu vantu valipuro lya lisheshu, kapishi muva tangulite vya kuhamena maghayaro ghavo. ² Vantu vamwe kwa pura ashi kulya tupu navintje, vamwe kwa kara nalipuro lyali sheshu vavo kulya tupu vikwa lividi. ³ Kehe ghuno wa kulya navintje kapishi adine wa kupira kulya navintje; ntani nagho wa kupira kulya nyama. Mbyovyoshi Karunga ngakatambura navantje. ⁴ Ove ne ove re, wa kupangura mukareli wa ghunyoye? Ghuye ngakatika kushipara sha Hompa wendi ndje nga katokoro ashi ngaka yimana ndi ngavakamuganda. Ano ngoli ghuye ngaka vhura kuyima, mbyovoshi Hompa kwa kara nankondo da kuvhura kumuyimika. ⁵ Ghumwe kwapongora mo tupu liyuva limwetupu mumayuva naghantje. Ano ghuno ghumwe ghuye kwapongora mayuva naghantje ashetakana. Kehe ghuno ana hepa kutokora kutwara mumaghano ghendi. ⁶ Kehe ghuno wa kutoghora mayuva, akona kugha toghororera Hompa; kehe ghuno wa kulya navintje, akona kulyera mwa Hompa, mukondashi ghuye kudi tapa adi kandayike Karunga. Kehe ghuno wa kupira kulya navintje, akona kukupongorera mukupira kulya navintje mwa Karunga, ana hepa kutapa mpandu kwa Karunga. ⁷ Naghumweshi wa kuparuka pamwene, ntani kwato wa kufera mwa mwene. ⁸ Mbyovyoshi nkeneshi tuna kara namonyo, tuna hepa kughukarera mwa Hompa, ntani nkeneshi atufu, tuna hepa kufera mwa Hompa. Tukare na monyo ndi tufe, atwe kwa hamena kwa Hompa. ⁹ Shino ntjo shitambo afera Kristus ntani mbyo akavhumbuka nka kughufe akare na monyo nka shimpe, ¹⁰ Ove, mukonda munke ghupangulira vaghunyoye? ntani ove, mukonda munke ghushwaghulira vaghunyoye? Mbyovyoshi natuvantje ngatu kayima kushipundi sha kupungulira sha Karunga. ¹¹ Yira momu vatjanga ashi, ''Yira momu nakara me na monyo,'' mongoli ana kutanta Hompa, ''Vantu na vantje ngava tongamena ngoro kukwande, ntani kehe lino liraka ngalifumadeka Karunga.'' ¹² Mpo ngoli ashi, kehe ghuno mukatji ketu ngaka tanta viruwana vyendi kwa Karunga. ¹³ Mpongolishi, kapishi mukupangure-pangure na ghumwenu, shashiwapo ntjoshino ashi, kapishi ghuture liwe mundjira vaputundukemo, ndipo ghuteye shiraha shikwate vaghunyoye. ¹⁴ Ame navintje ntani ame mbyo nakoneka mwa Hompa wetu Jesus ashi kwato shakuvhura shinyate pashene. Nkwandi ndjegho ana shimono ashi shanyata, ndje wakushimona ashi shanyata. ¹⁵ Ano ngoli nkeneshi aghu yuvita kukora vaghunyoye mukonda ya ndya doye, nkwandi kapi ghuna kara nashihoro. Kapishi ghupulitire makurulya ghoye ashi ghudjonaghurepo ghunyoye ogho afera Kristus. ¹⁶ Kapi kukengererera ghuwa ogho mwapura mbyo mwa ghutambura ashi vaghughambe nka mwamudona. ¹⁷ Mbyovyoshi ghuntungi wa Karunga kapishi kulya na ku nwa, nane ngoli waghone wa ghuhungami, mpora na ruhafo rwa mumpepo ya kupongoka. ¹⁸ Kehe ghuno wa kuruwanena Kristus murupe rwa weno ndje wa kuyenda kutjima na Karunga ntani vantu ngava mupandura. ¹⁹ Mpongolishi, tukondjerenu vya kuyita mpora ntani nakutunga mbunga Kriste. ²⁰ Nakuvhurashi ghudjonaurepa viruwana vya Karunga mukonda ya ndya. Ndya ko dene nadintje kwahungama, ano ngoli kapi shahungama ashi muntu alye ndya nadintje mposhi apukite vaghunyendi. ²¹ Ghuwa ghunene nkene kapi ghuna kulya nyama ndi ghunwe vikorwita, ndi ghuruwane kehe vino vya kupukita vaghunyoye. ²² Lipuro lyoye, lina hepa kukara tupu pakatji koye nove na Karunga ghuye. Walirago ndjegho wa kupira kukupangura muvininke ovyo apulira ashi vyavyo vya hungama. ²³ Kehe ghuno wakushinganyeka kulya ndya kukupangura mwene, mukondashi ghuye kapi anakara nalipuro. Kehe vino vya karo ashi kapishi vya lipuro, vina hepa kukara ndjo.