¹ Apa Jesusa amonine mbunga, ayendi pawiru yandundu. Apa uye a shungilire, varongwa vendi aya ku kwendi. ² Uye ayashura kanwa kendi nakuvatantera, nakughamba, ³ Valirago mbava vakaro naghutighona mudimushima davo morwa ghuntungi waliwiru wavo. ⁴ Valirago mbava vaguvango, morwa ngava kava shengawida. ⁵ Valirago mbava vakukuruka, morwa ngava kapinga livhu. ⁶ Valirago mbava vaferango ndjara nalinota ghuhungami, morwa ngava kava kutita. ⁷ Valirago mba va nkenda, morwa ngava kava fera nkenda navo. ⁸ Valirago mbava va karo nadimushima dakukushuka morwa ngava kamona Karunga. ⁹ Livarago mba vayititangopo mbili muvantu, morwa ngava kava kugha vana vaKarunga. ¹⁰ Valirago mbava va heperango ghuhungami, morwa, ghuntungi waliwiru wavo. ¹¹ '' Valirago anwe apa vantu ngava mushwaghura nakumuhepeka ntani kughamba navintje vininke vyavidon muvipempa-pempa tupu morwa rwande. ¹² Hafenu nakupembura, morwa mfuto yenu yinene unene muliwiru. Mundjira yino vantu kava hepekanga vaporofete vaparukiro kumeho yenu. ¹³ '' Anwe mungwa waghudjuni. Ano ngoli ntjene mungwa aghu kombanita ghutovali wagho, weni mo va ghuruwana nka ghukare nka mungwa? Kapi ngaghu kara nka uwa kukehe vino kughupako kughuvukumina pantje nakughulyatangera kuntji dampadi davantu. ¹⁴ Anwe nwe ghukenu waghudjuni. Shitata vatura pandundu kapi sha vandanga. ¹⁵ Ntani kwato vantu vakuhwameka ramba makura kuyitura munda yashikumba, ano ngoli hana ashi pantunda, nakutemena kehe uno anakaro mundjugho. ¹⁶ Renka shite shoye shiteme kumeho yavantu mundjira oyo ashi vamone virughana vyoye vyaviwa ntani kuyererepeka shenu oghu akaro muliwiru. ¹⁷ ''Mwasha ghayara ashi ame kwaya niya djonaghure veta ndi vaporofete. Ame kapi na yera niya di djonaghurepo, ano ngoli kuya ditikitamo. ¹⁸ Vyashiri nakughamba kukwenu ashi dogoro liwiru nalivhu vina dongonokapo, kwato ndanda yimwe ndi kamwe kakadidi mundjira kehe yino ngakatundo kuveta, dodgoro vininke navintje ngavi tikemo. ¹⁹ Mposhi kehe uno wakutjora kakadidi kamwe kudimuragho dino ntani kushonga vamwe varughane vino ngava mutwenya ndje adidipopo mughuntungi wamuliwiru. Ano ngoli kehe uno wa kuditikitamo ntani kudishonga ngava mutwenya wamunenepo mughuntungi wamuliwiru. ²⁰ Ame kuna kumutangtera anwe ashi nkwandi ghuhungami wenu ngahupitakane ghuhungami wavalirongi matjangwa navafalisayi, anwe kapi ngamu kangena mughuntungi waliwiru. ²¹ '' Anwe mwayuva ashi vaghamba kukwavo mushirughano shakare, ' Kapishi ghudipaghe, ' ntani, ' Kehe uno wakudipagha ngakara mughudito wampanguro'. ²² Ano ngoli ame kumutantera ashi kehe uno ana garapero mughunyendi ngakara mughudito wa mpanguro; ntani kehe uno wa kughamba kwamughunyendi, ' Ove muntu wamaghoko-ghoko tupu!' nga kara mughudito wamatimbi; ntani kehe uno wakughamba, ' Ove ligova! nga kara mughudito wamundiro walidjonaghuko. ²³ Mposhi ntjene ove kuna kutapa ghushwi kushidjambero na kuvhuruka ashi ghunyoye mpovili a kulimba nove, ²⁴ Shuva ghushwi ghoye nkoko kumeho ya shidjambero, nakuyenda mundjira yoye. Pamuhovo kughupirepo naghunyoye, kumeho yakutapa ghushwi ghoye. ²⁵ Kuyuvhe nankore yoye wangu mpapa ghuna kara naye mundjira yakuyenda kumpanguro, ndi nkore yoye kuvhura aka kutwalitire mumpanguro, ntani mpanguro kuvhura yika kutwalitire kuvanamberewa, nakukavhura kukakuvhukumina mudorongo. ²⁶ Vya shiri nakumutantera, ove kapi ngaukarupukamo munya mudorongo dogoro ove ghuna mana kufuta maliva ghakuhulilira wa kara nagho. ²⁷ '' Anwe mwa yuvha va ghamba ashi, ' Kapishi ghu shondere.' ²⁸ Ano ngoli ame kuna kumutantera ashi kehe ghuno wa kukenga mukamali nalidogho kumushima ghuye anashondere kare naye mumushima wendi. ²⁹ Ntjene lintjo lyoye lyarulyo kuna kukurenkita likupukite, likororemo nakulivhukuma litunde koye. Hashako koye ashi ghumwe waruha roye ngaka djonaghuka kupitakana rutu roye naruntje vakaruvhukumine mulivango lyalidjonauko. ³⁰ Ntjene livoko lyoye lyarulyo kuna kukurenkita likupukite, liteteko nakulivhukima ko kukoye. Hashako ove ashi ghumwe warutu roye ngaka djonauka kupitakana rutu roye naruntje ngaru kayende mulivango lyalidjonaghuko. ³¹ Va ghamba nka ashi, ' Kehe ghuno wakutuma mukamali wendi, amupe mbapira yakukukomba! ³² Ano ngoli ame kughamba kukwenu ashi kehe ghuno wa kukomba mukamali wendi, a hana ghumbangi warushonda, kumurenkita akare munarushonda. Ano ngoli kehe ghuno wakumukwara kunyima yakumukomba ghuye rushonda a rughananga. ³³ '' Ntani nka, mwa yuvha ashi va ghamba kovo vakare, ' Kapishi kughana tupu muvipempa, ano ngoli shimba mughano ghoye kwaHompa.' ³⁴ Ano ngoli ame kuna kughamba kukwenu, kughana kapishi napantje, likare nampili ndi liwiru, morwa lyalyo shipuna shaghu Hompa waKarunga; ³⁵ Ndi livhu, morwa shilyatero sha mpadi dend; ndi Jerusalema, morwa shitata shaHompa wamunene. ³⁶ Nampiri ghughanite mutwe ghoye, morwa kapi ngauvhura kurenka huki yimwe yikare yayikenu ndi yishovagane. ³⁷ Ano ngoli renkenu vighamba vikare ' Nhii. Nhii, ndi ' Hawee, Hawee!. Kehe vino vyakupitakana pano kwa tundanga kughudona. ³⁸ '' Mwa yuvha ashi va ghamba, Lintjo vyalintjo, ntani liyegho vyaliyegho'. ³⁹ Ano ngoli ame kuna kughamba kukwenu ashi, Kapishi kudira kushana ghumwe a karo wamudona. Ntjene ashi, kehe ghuno wakukutoghona kulitama lyoye lyarulyo, pirukira kukwendi nakumwe nka. ⁴⁰ Ntjene kehe ghuno ana kushaneno nakughupa shikoverero shoye murenke ogho muntu nka a ghupe lirwakani lyoye. ⁴¹ Kehe ghuno wakukutininika ghuyende shinano shashire, yenda naye ruviri. ⁴² Tapenu kwa kehe ghuno ana kumurombo, ntani kapishi kupirukira kwapeke kwa kehe ghuno ana shano kukuromba ove. ⁴³ '' Mwa yuvha ashi vaghmba, ' Hora va kamaparambo ghoye ntani nyenga nkore doye'. ⁴⁴ Ano ngoli ame kuna kughamba kukwenu ashi, Hora nkore yoye ntani raperera ovo va kuhepekango, pongora ovo va kufingango, rughana ghuwa kovo va kunyengo. ⁴⁵ Mpo ngoli ashi ngamuvhure kukara vana vashenu a karo muliwiru. Morwa uye kurenka liyuva lyendi litemene paghudona naghuwa, ntani kutuma mvhura pavahungami navandjoni. ⁴⁶ Morwa ntjene ghu hora ovo vakuhoro, ndjapo munke ngaghu wana? nampiri kapishi mufutiti mutero vya kukufana arughananga? ⁴⁷ Ntjene ove kumorora tupu vaghunyoye, vinke wa rughananga vyavingi kupitakana vakuhupako? nampiri vahedana ka[pishi vya kukufana va rughananga? ⁴⁸ Mpo ngoli ashi muna hepa kukara va kutikiliramo, yira shenu wamuliwiru wakutikiliramo.