1 ' Makura ghuntungi waliwiru ngaghu kara yira vakadona murongo ava va ghupiro ramba davo na kuyenda vakakugwanekere namukwali. 2 Vatano vavo magova ntani vatano vava kotoki. 3 Apa vakadona vavagova vaghupire ramba davo, vavo vahana kupiturako maholi. 4 Ano ngoli vakadona vava kotoki ava shimbi vyuma vyamaholi kumwe naramba davo. 5 Weno apa mukwali aku rangarangire, vavo navantje ava porokere muturo nakurara. 6 Ano ngoli pakatji kamatiku apa yiyiri, ' Kengenu, mukwali'. Rupukenu muyende nakukugwanekera naye.' 7 Makura navantje vakadona ava rambuka nakutweda ramba davo. 8 Magova aghamba kuvakotoki, ' Tupenuko maholi ghamba mukondashi ramba detu kuna kuyenda di dime.' 9 '' Ano ngoli vakotoki ava limburura nakughamba, ' Hawee nakuvhurashi kugwaneka natwe nanwe, vya viwa yendenu kovo vaghulitango makura mukaghure ghamwe naghumwenu.' 10 Vavo apa va yendire vakaghure, mukwali aya, ntani ovo vakuwapayikiliro ava yendi kumwe naye mushipito shankwara, ntani livero ava lighara. 11 Kunyima vakadona vamwe navo nka avaya nakughamba, ' Hompa, Hompa, tu gharure atwe. 12 Ano ngoli ghuye alimburura nakughamba, ' Vya shiri nakughamba kukwenu, Ame kapi namuyiva nwe.' 13 Kengenu ashi, anwe kapi mwayiva liyuva ndi viri. 14 '' Yira mpopo mukafumu a shanino kuyenda mushirongo shimwe. Ghuye akughu vakareli vendi nakukatapa limona lyendi kukwavo. 15 Ghumwe wavo ghuye akamupire mafere matano, ghumwe ghuye kwamupure mbiri, ntani nka ghumwe ghuye nka kwamupire lifere limwe. Kehe ghumwe kwa wanine vyakutika kuhamena kughuyivi wendi, ntani mukafumu ghunya ayendire mundjira yendi. 16 Ghunya a wanino mafere matano ayendi mpopo nakukavitura muvirughana ntani kukawanako mafere matano ghamwenka. 17 Mundjira yakukufana, ghumwe oghu a wanino mafere maviri aka wanenapo nka maviri ghamwe. 18 Ano ngoli mukareli oghu a wanino lifere limwe ayendi, kutima likwina mulivhu, nakuhoroeka maliva a muhona wendi. 19 Weno kunyima yashirugho shahire muhona wavakareli akaya nakuyakenga maliva kumwe navo. 20 Mukareli oghu a wanino mafere matano aya nakuyita mafere matano ghamwe nka. A ghamba, muhona, ove kwampire me mafere matano gha randa. Kenga, ame nakawanako mafere matano gha randa ghamangi.' 21 '' Muhona wendi a ghamba kukwendi, ' ghuna ruwana nawa, ghuwa ntani mukareli walipuro! Ove kwa kalire nalipuro muvininke vyavisheshu. Ame ngani tura ve mulipangero lyavininke vyavingi. Ngena muruhafo rwamuhona ghoye.' 22 '' Mukareli oghu a wanino mafere maviri a randa aya nakughamba, ' Muhona, ove kwampire me mafere maviri gha randa. Kenga, Ame nawanenepo nka mafere maviri gha randa.' 23 '' Muhona wendi aghamba kukwendi, '' Ghuna ruwana nawa, ghuwa ntani mukareli walipuro! Ove kwakalire nalipuro muvininke vyavishehsu. Ame ngani tura ve mulipangero lya vininke vyavingi. Ngena muruhafo rwmuhona ghoye.' 24 '' Makura mukareli oghu a wanino lifere limwe lyaranda aya, Muhona, Ame nayiva ashi ove mukafumu wamudito. Ove kuyangura oku wa dira kukuna ntani kutjora oku wadira kumwagha. 25 Ame kwatjilire, ame mpo nayendire nakukahoreka maliva ghoye mulivhu. kenga, Ove ghuno evi vyahameno kukoye.' 26 '' Ano ngoli muhona wendi alimburura nakughamba kukwendi, Ove mudona ntani mukareli waghudwa, ove wayiva ashi ame kuyangura oku nadira kukuna ntani kutjora oku nadira kumwagha. 27 Vinke ngoli wa dilire kutapa maliva ghande kumbunga, ntani pakuya kwande ame kuna kuya wana nka maliva ghanaghumwande. 28 Ghupenu maliva atunde kukwendi ntani mughape kumukareli oghu ana karo naranda mafere matano. 29 Morwa kehe ghuno ana karo nevi vyavingi ngani vi mupa, ntani ghuye ngavimu vyukilira. Ano ngoli kwa kehe ghuno adiro kukara nakehe vino, nampiri kehe vi arughana ngava vi mughupa. 30 Vhukumenu mukareli wakudira mulyo mumundema, kunya nko ngaka lira nakukukwetja mayegho.' 31 '' Apa mona muntu ngakaya mughuyerere wendi ntani vaEngeli navantje kumwe naye, makura ghuye ngaka shungira pashipuna shaghu Hompa shaghuyerere wendi. 32 Kumeho yendi ngaku ponga dimuhoko nadintje, ntani ghuye ngahangura vantu ghumwe kuvaghunyendi, yira moomu mushita a hanguranga ndjwi kuvimpendje. 33 Ghuye ngatura ndjwi kulihoko lyendi lyarulyo, ano ngoli vimpendje kurumontjo rwendi. 34 Makura hompa nga ghamba kovo vakulihoko lyendi lyarulyo, ' Yenu, anwe vashwera vavava, pingenu ghuntungi va muwapayikira kutunda kulitameko lyaghudjuni. 35 Ame apa ya nkwatire ndjara makura anwe amumpa ndya; Ame apa lya nkwatire linota makura anwe amumpa vinwa; Ame apa nakalire mugenda anwe amu nkaveda; 36 Ame apa nakalire muherehere makura anwe amu ndwateke; Ame apa navelire makura anwe amu mpakere mbili; Ame apa na kalire mudorongo makura anwe amu ya kukwande.' 37 '' Makura vahungami ngava limburura ntani nakughamba, Hompa, liyuva munke twa kumonine ove ndjara ntani atu kupa ghulye? ndi linota makura atukupa ghu nwe? 38 Liyuva munke twa kumonine ghumugenda makura atu kukuaveda? Ndi muherehere makura atu kudwateke? 39 Liyuva munke twa kumonine ove kuna kuvera ndi mudorongo nakuya kukoye? 40 Makura Hompa a limburura nakughamba kukwavo, ' Vyashiri nakughamba kukwenu, evi mwa rughnine ko ghumwe wamudidi pavano vaghuni vande, anwe mwavirughaninine.' 41 Makura ghuye nga ghamba kovo vakulihoko lyendi lyarumontjo, '' Tundenupo pano pande, anwe vafingilira , mumundiro wanaruntje ashi vamuwapayikira mudjonaghuli ntani vaEngeli vendi, 42 Mukondashi ame apa ya nkwatire ndjara, ano ngoli anwe kapi mwa ,mpire ndya, Ame apa nafire linota, ano ngoli anwe kapi mwampire ni nwe; 43 Ame apa nakalire nimugenda, ano ngoli anwe kapi mwa nkavidire; nakalire muherehere, ano ngoli anwe kapi mwa ndwatikire; Kuvera ntani mudorongo, ano ngoli anwe kapi mwa mpakilire mbiri.'' 44 '' Makura vavo ava limburura nakughamba, liyuva munke twa kumonine ove ndjara, ndi linota, ndi mugenda, ndi muherehere, ndi kuvera, ndi mudorongo , ntani tu dire kukuvatera ove?' 45 Makura ghuye ngava limburura nakughamba, ' Vyashiri nakughamba kukwenu, evi mwa dilire kurughana kughumwenu wavano vavadidi, anwe ame mwa dilire kuvirughanena.' 46 Vavo ngava yenda mulitengekero lyanaruntje, ano ngoli vahungami muliparu lyanaruntje.''