¹ Apa papitire mayuva ntayimwe Jesusa a ghupu Peturusa, Jakopo, ntani Johanesa mughunyendi, ntani avayita kuwiru kundundu yayire panaghumwavo. ² Aku shintunuka kumeho yavo. Shipara shendi ashi teme yira liyuva, ntani vyuma vyendi avi kene ghunene yira shite. ³ Ava kenge, ava moneke kwavo Mosesa ntani Elia kuna kughamba naye. ⁴ Peturusa a limburura ntani na kughamba kwa Jesusa, '' Hompa, ghuwa shiri ghunene kwetu mukukara pano. Ntjene ghuna shana, Ame kuni rughuna pano ndunda ntatu - yimwe yoye, ntani yimwe yaMosesa, ntani yimwe yaElia.'' ⁵ Ghuye shimpe kuna kughamba, ava kenge, liremo lya kupayima lina vafiki, kenga, liywi ali tundu mu liremo, na kughamba, '' ghuno monande wakuhora wamumati, ogho a ndjendo kumutjima. Muteghererenu.'' ⁶ Apa vaviyuvire varongwa, avawu vanyongeke dimutwe ntani vakalire naghoma waghunene. ⁷ Makura Jesusa aya ntani avakwata na kughamba, Shapukenu ntani kapishi mukare naghoma.'' ⁸ Makura ava kankuka vakenge ano ngoli naghumweshi vamonine kughupako Jesusa tupu. ⁹ Pa kudumpuka kwavo kundundu, Jesusa ava rondora, nakughamba, '' Kapishi muka tante ovyo muna mono kwa kehe ghuno dogoro opo Mona Muntu ngav murambwita mumfa.'' ¹⁰ Varongwa vendi ava mupura, nakughamba, '' Morwa nke valirongi va matjangwa vaghamberanga ashi Elia ngahove tanko kuya?'' ¹¹ Jesusa ava limbura na kughamba, '' Elia vyaushili ngaya aya wapeke vininke navintje. ¹² Ano ngoli kuna kumutantera ashi, Elia aya kare, ano ngoli vavo kapi vamu dimburura. Vavo varughana kehe vino vashana kwendi. Mundjira yakukufana, Mona Muntu naye mo nga hepa mumaghoko ghavo.'' ¹³ Makura varongwa vendi ava vikwata lighano ashi ghuye kwaghambire kwavo kuhamena Johanesa muyoghi. ¹⁴ Apa vayire kumbunga, mukafumu ayire kwendi, atongamene kumeho yendi, ntani a ghamba, '' ¹⁵ Hompa yuvira nkenda monande wamumati, ghuye kwavera shinyonywa ntani kwa hepanga kehe pano. Ghuye kehe pano kuwera pa mundiro ndi mumema. ¹⁶ Namuyita kuvarongwa voye, ano ngoli kapi vana kumuverura.''' ¹⁷ Jesusa a limburura nakughamba, '' Vakupira lipuro ntani vali puka, shirugho shakutika kuni nivhura kukara nanwe? Shirugho shakutika kuni ngani mudidimikira? Muyitenu kuno kwande.'' ¹⁸ Jesusa makura a tughumukiri mpepo yayidona, ayi tundumo mwendi, ntani mumati vamuverwire muvili yinya. ¹⁹ Makura varongwa vayire kwaJesusa mukaholya - holya ntani nakughamba, '' Morwa nke tuna dili kuyitjidamo atwe?'' ²⁰ Jesusa a ghamba kwavo, '' Mukonda ya lipuro lyenu lya lisheshu. GHushili naku mutantera, ntjene wakara nalipuro lyalididi lyakuhura pambuto yaghuhoro, kughu ghamba kundundu yino, Yenda kutunda pano dogoro panya; yayo kuyenda, navimweshi ngavi kutjindiro nka.'' ²¹ Ano ngoli mpepo dadidona da kufana weno kwato kutundamo ntjene ashi pato ndapero na lidiliro. ²² Vavo opo shimpe muGalilea vana kara, Jesusa a ghamba kuvarongwa vendi, '' Mona Muntu ngava mutapa mumahoko gha vantu, ²³ ntani vavo ngava mudipagha, ntani liyuva lya ghutatu ngakavhumbuka.'' Varongwa ava guvu shiri ghunene. ²⁴ Apa vayire kuCapernaum, vakafumu ovo vafutitiro mutero wa ntembili avaya kwa Peturursa ntani nakughamba, '' Mushongi wenu naye kwa futanga mutero wa ntembi ndi?'' ²⁵ Ghuye aghamba ashi, Nhii.'' Peturusa apa ayire mundjugho, Jesusa a hovo kughamba naye, Vinke ghuna kughayara Simoni? Kware va Hompa vapalivhu vaghupanga mutero? Kuvana vavo ndi kuvantu peke?'' ²⁶ '' Kuvantu peke,'' a limburura Peturusa. ''Makura vana vavo mughumanguruki,'' Jesusa a ghamba. ²⁷ Ano ngoli kapi tuna renkita vafutiti mutero vadjone, yenda kulifuta, kavhukuminemo lirogho, ntani katampure ntjwi oyo yikahovo kulyako. Apa ghuka yashameka kanwa kayo, kughu kawana shiringa. Kayighupe ntani naku yitapa kuvafutiti mutero yetu name nove.