¹ Karenu na shihoro navaghunyenu va mwa Kristusa. ² Kapishi ngamu vhurame kutambura vagenda mumandi ghenu. Mukondashi vamwe ovo kava ruwanenango weno, kuva tamburanga va Engeli vavo vahana kuviyiva. ³ Kehepano vhurukenu vakadorango yira kumwe tupu navo muna kara. Vhurukenu ovov vana karo muruhepo yira kumwe tupu navo munakara. ⁴ Nkwara vana hepa kudifumadeka navantje, ntani ghuro wankwara ghukare ghuna pongoka, Mukonda Karunga ngaka pangura vantu varushonda navo vakutjora nkwara. ⁵ Kapishi mukare nalidogho lyavi maliva. Ovyo muna kara navyo vina gwaneke, mukondashi Karunga mwene kwatanta ashi, "Ame kapi nganimushuva ndi nganitunde papenu." ⁶ Vino tuna karo navyo vina gwaneke makura tukare nalihuguvaro ashi, "Hompa ndje mukwafi wande; Vinke ovyo natjira. Muntu atompore vinke kukwande?" ⁷ Vhurukenu vampititi venu, ovo vamuyuvitire nkango da Karunga ntani mughuyare ukaro wavo. Upenu shihonena sha lipuro lyavo. ⁸ Yesusa Kristusa ndje kakaropo yona, namuntji naruntje na naruntje. ⁹ Kapishi ghamupukite marongo nagho peke. Ghuwa unene nkene ashi dimutjima denu adiwana nkondo kunkenda ya Karunga, kapishi kundya dapa veta odo dapiro kukwafa ovov kava dilyango. ¹⁰ Atwe kwa kara nashidjambero osho vashweneka ashi nakuvhurashi kulyeramo va pristeli ovo varuwanango mo mu ntembeli. ¹¹ Honde ya vikorama ovyo vana dipagha va djanbere kundjo kuyita kwa mupresteli wa munene ayi tware minkonda ya kupongokerera yikare ndjmbo ya ndjo, ntani vilyo navintje kuvishwakerera pandje ya kamba. ¹² Yesusa naye kwa monine ruhepo pandje ya livero, opo afire apongore muhoko na honde ya mwene. ¹³ Weno turupukenumo ngoli mukamba, tuyende ku kwendi tuka shimbe ntjoni dendi. ¹⁴ Mukonda ashi atwe kapi twakara na shitata shakukarerapo pano. Ano ngoli atwe kuna tamba shitata oshi shinakaro kumeho. ¹⁵ Atwe ndjambo yetune ya kutungauka Karunga kehe pano kupitura mulidina lya Yesusa. ¹⁶ Kapishi muvurame kuruwana uwa ntani kuvatera-vaterenu mukondashi ndjambo da weno da yenda Karunga kumutjima. ¹⁷ Nkene mulimburukwa kuva mpititi venu vavo ngava muruwanenena naruhafo kapishi namutjima koka, ndi kapi ngava mukwafa. ¹⁸ Tuturenu mundapero, mukondashi atwe twayiva nawa-nawa ashi twa kara na liywi lya Karunga lya liwa lya mumutjima mukondashi atwe kwahora kutungika navintje. ¹⁹ Ame kuna kumukorangeda mukanderere unene nganikavyuke kukwenu wangu. ²⁰ Karunga wa mbili ogho avhumbuko kughufe Hompa wetu Yesusa ogho anakaro mushita wa munene wa ndjwi, mukondashi honde yendi kwayita likukwa takano lya naruntje ²¹ amupeko vininke navintje vyaviwa ovyo muna hepa mutikitemo vipango vyendi, ghuye aruwane mumwetu ovyo vyamuyendo kumutjima mwa Yesusa Kristusa, ghuye vamufamedeke naruntje na naruntje. Amen. ²² Vaunyande, ame kuna kumukorangeda, tamburenu na lididimiko nkango da makorangedo, ame kuna dimutjangere pa ufupi. ²³ Kuna kumupukurura ashi unyetu Timoteghusi va mughupamo mudorongo, nkene ngani kuvinduka kuya ndi kumwe naye ngatuya tuyamudingure. ²⁴ Mororenupo vampititi venu navantje na vapongoki navantje. Vaghunyenu va Italiya navo vana mukunditiripo. ²⁵ Nkenda ya Karunga yikare papenu namuvantje.