¹ Weno Peter na John kwayendire kuwiru muntembeli pavili ya ndapero, vili yaghuntane. ² Weno mukafumu ghakaliro shirema kutunda mumukogha wavawina kwamutwalire kuheka yatembeli kavatwenyanga ghuwa. Vavo kavamuturanga mpopo kehe liyuva mposhi ghuye avure kupura ovo kavayendango muntembeli mbatero. ³ Opo uye amonine Peter na John pepi nakungena mu ntembeli, uye avapura mbatero ya maliva. ⁴ Peter, anwike mantjo ghendi papendi, na John, aghamba,''Kenga kukwetu''. ⁵ Mukafumu washirema akenge kukwawo, mukutaterera atambure vintu kukwavo. ⁶ Enengoli Peter aghamba shi,''Siliveli ntani nangorodo ame kundereko, enengoli ovyo nakara navyo, Ame kunivitapa kukoye. Mulidina lya Jesus Kristus wamu Nazareth,yenda''. ⁷ Muku mughupa nalighoko lyarulyo, Peter amuyerura, ntani shiruwo ntjosho mpadi damukafumu ntani nancungu dendi vadirughanine adikoro. ⁸ Ahunyangere, mukafumu washirema ayimanine atameke kuyenda;makura po angenine na Peter ntani John munda ya ntembeli, kuyendaghura, kuhunyangera, ntani kutangaghuka Karunga. ⁹ Navantje vantu vamonine uye kuna kunyenda ntani kuna kutangaghuka Karunga. ¹⁰ Vavo avadimburura ashi ngeghunya mukafumu ogho kapurayerango vantu mbatero paheka yayiwa yakuntembeli; ntani vavo vayulire nashitetu ntani vatetukire mukonda yavyo vyashorokiro kukwendi. ¹¹ Mukukwaterera ghuye kwaPetrus naJohannes, vantu navantje avadukili pamwe mumbaraka oyo vatwenya nga ashi yaSaromo, vatetukire unene. ¹² Petrus opo ghavimonine vino, gha limburura vantu ashi, '' ghanwe vantu vakaIsrayeli, vinke muna tetuka? Vinke munanwikiri mantjo ghenu papwetu, yira ndjeghu ashi ghatwe tuna muyendito kunkondo danaghumwetu ndi ghukarunga? ¹³ Karunga waAbrahamu, ntani waIsaka, ntani waJacobus, Karunga wavashetu, ghana yererepeke mukareli wendi Jesus. Ndjeghunya mwa tapire ntani mwa shwenine kumeho ya Pilatus, opo gha tokolire mukumumangurura ghuye. ¹⁴ Ghanwe kwashwenine muntu waMupongoki ntani Muhungami, ntani ghamupura po munarudipaghi vamu mumangwilire kukwenu. ¹⁵ ghne kwadipagha mutateki monyo, oghu ghayarambwitire Karunga kughufe- ntani ghatwe vambangi kovino. ¹⁶ Pantateko yalipuro mulidina lyendi, lidina lyendi linarenkita mukafumu ghuno, oghu muna kumona ntani mwayiva, ghapame. Lipuro lya kupitira mwa Jesus lina tapa kukwendi ghukangure wakuhungama mulikaropo lyenu namuvantje. ¹⁷ Weno vaghunyande, Ame nayiva ashi ghanwe kwarughanine mulincenuno, yira moomo varughanine navo vapangeli venu. ¹⁸ Ghano ngoli vininke a hovire Karunga kutanta mutunwa twavaporofete navantje, ashi Kristus wendi ndje tupu kuhepa, ghuye weno ghana vi tikita mo. ¹⁹ Kushighurenu, mpo ngolishi, ntani pirukenu mposhi ndjo denu divhure kudongwenena po, mposhi ngapa ye maruvede ghakutamekera ko kulimoneko lya Hompa; ²⁰ mpo nkashi ghuye ngavure kutuma Kristus oghu vamurorowera, Jesus. ²¹ Ghuye ndje Ghumwe lyakona kutambura liwiru dogoro ruvede rwaliwapukururo lyavininke navintje, kuhamena vyo aghambire Karunga kare natunwa twavaporofete vendi vakupongoka. ²² Moses ghushiri a ghambire, Hompa Karunga ngayerura muporofete yira ame wakutundilira mukatji kavaghunyenu. Anwe nga mu tegherera kwanvintje ovyo ghuye nga ghamba kukwenu. ²³ Ngavishoroka ashinkehe murwana ogho a pira ngo kutegherera kogho muporofete ngava mu djonaghura po nununu mukatji kavantu. ²⁴ Nhii, ntanivaporofete navantje vakutamekera kwaSamwere ntani novo vayiro kuruku rwendi, vavo vaghambire ntani vayuvitire mayuva ghano. ²⁵ Ghanwe muvana vavaporofete ntani naligwanekero olyo ghatulirepo Karunga nava navanyakulya venu, moomo ghuye a ghambire kwa Abrahamu, 'Mumbuto yoye navantje valiro lyapalivu ngava vatungika.' ²⁶ Kuruku yo ghayerwire Karunga mukareli wendi, gha mu tumu kukwenu pamuhovo, muku mu tungika mukumu tjindja kehe ghuno wenu akupore kughurunde wendi."