¹ Opo vayatutikitire mo nawa, twa kurongire ashi shirudi shapo kava shitwenya Malta. ² vantu vamo kwa tupire ndi kwa tuneyedire shiri ghunongo, ano avatu hwa mekere mundiro ntani avatutambura natuvantje mukonda ya vhura na ghutenda. ³ Ano opo apongayikire Paul shitungu sha vikuni nakugvituranga pa mundiro, liyoka alirupuka mukonda ya ghupyu na kumu kakatera ku livoko. ⁴ Opo vavi monine vantu vapa shirudi linkorama kuna kundjendjerera kulivoko lyendi, ava ghamba kuumwe naghunyendi, "Oghu murume nawa-nawa murudipayi ogho ahenino mulifuta, veta kapi yina kumupulitira mukuparuka." ⁵ Ano opo ashikuyaghumwine shikorama mumundiro ntani kapi lya vhulire kumudjonaghura. ⁶ Vavo kwamutatilire atameke kuyenya ndi po wangu-wangu awe afe. Ano ngoli muruku rwa po vamukengire shirogho shashire nakumona ashi kundereko vya vidona vya shorokiro kwendi, avapirura maghano ghavo nakughamba ashi ghuye karunga akaliro. ⁷ Pepi nalivango kwa kalire livhu olyo lyahaminino kwa lirenga washirudi sho, mukafumu kavatwenyanga Publius. Atutambura ntani vatuyumbulire naghunongo pa mayuva matatu. ⁸ Vyavyo kwashorokire ashi vashe va Publius kwa ralire kuna kuvera uvera wa kupyapyara nalira lyakurupaghuka.Opo ayendira Paul kukwendi, amuraperere, a mu kambeke mavoko, nakumu verura. ⁹ Muruku rwavishoroka vino, vaveli ovovakaliro pashirudi vayire mbyo vayaverukire. ¹⁰ Vantu vatufumadikire mumarupe ghakukushuva-shuva, opo twakuwapayikire tuyende, vatu pire ovyo twashanine. ¹¹ Muruku rwa mwedi ntatu atutumbu ruyendo mu shikepa osho shasheyiro pakufu pashirudi shaku Alexandria, shakaliro na ''vimutwe vyavi karunga vya mapange'' ¹² Muruku opo twakatikire ku shitata sha Syracuse, atukaramo mayuva matatu. ¹³ Kutunda po atushapuka na kukatika mushitata shaRhegium. Kuruku rwaliyuva limwe mpepo ayiya yaku Ucuma, liyuva lyakukwamako mpo twa katikire mu shitata sha Puteoli. ¹⁴ Atuka wana mo vaunyetu, atu kara navo mayuva ntambiri. Mpo ndjira twayire muRoma. ¹⁵ Opo vatuyuvire vaghunyetu, vayire vayatuwane kutundilire ghure wa Shitanda sha Appius ntani naVitatu Taverinus. Paul pakumona vaunyetu, vya mupire mukumo kumwe nakupandura Karunga. ¹⁶ Opo twangenine muRoma, Paul a va mupulitiri mukutunga papentjendi namuka vita ogho kamukungango. ¹⁷ Muruku rwa mayuva matatu Paul ayita vakafumu ovo vakaliro vampititi va vaJuda mukatji kavo. Opo vapongire, nko kughamba kwavo ashi " Vaunyande, mpiri ngoli ashi kwato ovyo narughana vyavidona kuvantu ndi vya mpo yashikuru shetu, ame muna dorongo vakwata muJerusalem mbyo vantapa mumaghoko gha va Roma. ¹⁸ Muruku yapanguro kasha vamangurure mbyovyoshi kapi pakalire konda ya kuntokwera kumfa. ¹⁹ Ano vaJuda va kananitire litorokoro linya, ovyo vya ntininikiro niyende kwa Ceasar. Nampiri ngoli vya kalire yira nayitire lirundiro kehe lino kushirongo shande. ²⁰ Mukonda yavino, mbyo namuyitiri mposhi nivhure kumumona nakughamba nanwe, mora yalihuguvaro lyaIsrael olyo nakarere mumango. ²¹ Ava ghamba kukwendi ashi, "Atwe kapi twa wana ntjangwatumwa yakutundilira kuJudea yakuhamena koye, ntani nka kwato ogho atundo oko aya tanto ndi aghambe kehe vino vya vidona vya kuhamena koye. ²² Ano ngoli tuna horo kuyuva kukoye kuhamena koyino veta, mukondashi vyayivika kukwetu ashi kuna kuyirwanita kehe kuno." ²³ Ava tura po liyuva lya kuyagwanekera naPaul, vantu vangi vayiro kulivango oko akalire. Mpo a fatwilire na kungampipara kuhamena kughuntungi waKarunga, nakuvatjoka ngeda kuhamena Jesus kutamekera kudimuragho daMoses navapumbi kutundilira ngura-ngura dogoro ngurova. ²⁴ Vamwe va vipulire ovyo aghambire, ngoli vamwe kapi vavipulire. ²⁵ Opo va pilire kukuyuva mukatji kavo, ava tameke kutunda po kuruku opo amanine Paul kughmba nkango dino ashi, "Mpepo Mupongoki yayaghambire nawa kuva dimu venu kupitira mwa mupumbwi Isaiah. ²⁶ Ashi 'yenda kovano vantu nakughamba ashi " Mukuyuva ngamuyuva, ngoli kapi ngamuvi kwata lighano, kumona ngamumona ngoli kapi ngamuvinongonona. ²⁷ Dimutjima da vano vantu datinta ntani matwi ghavo kapi ghayuvanga mbyo vaferera. Ntjene ngoli nga vamona namantjo ghavo, vayuva namatwi ghavo nakunongonona nadimutjima davo, vakuwapukurure Ame ngani vaverura." ²⁸ "mpo ngoli nahoro muyive ashi liyoghoko lyaKarunga kwalitumine kuva pagani ntani vavo ngava tegherera." ^{29 30} Paul kwa kalire mwaka mbiri dakuyura mundjugho oyo kafutiranga mwene ntani katamburanga ovo kava yango kwendi. ³¹ Kayuvitanga vyakuhamena kughuntungi waKarunga nakushonga vya kuhamena kwa Hompa Jesus Kristus pahana livinde lyangandi.