¹ Yeso vəru da kunu susu magita, se gayi da kunu pakuraucin gəri da rami ci maa, "Mallum aiki zada guguyayin tuku na ləmamin tuku!" ² se Yeso da ramici maa, "Kaikana marmamin ləmamin tuku? Go guguyak wara nda bəzau iiɗa kammancu wara nda dlǝrgədo bai." ³ Aci da mbasu aaɗa guguyak Zaitun wara a lawan susu magita, se Bitrus, na Yakubu, na Yahai na, Andarawus da jaya ci ii baka da ramma, ⁴ "A ramija, bitku a wakata fatawan? Zada gənawa tawan nda lawangu sartu mi aye wakata nǝn? ⁵ Se Yeso da ɓanji dlamǝk shi rama ma, "A dlamina ankal gaɗa nǝn wan da ɗaya kun bai ⁶ Ndawa gawa aye ni ii kunu dləgunga da ramma, Masipu nən iyu, harr da ɗayina ndiwa gawa. ⁷ Kwa kəma labarr zha dama dama na gəɗgəɗ shi nən, ankal kun da tla bai; katanas bitku mak se wakatu, amman dadəgəru dəgo de bai ⁸ lardi a tlayi iiɗak lardi, garva ke da tli iiɗak garva. Nda dlamak rǝb gagai iiri dama dama, na maya. Amman jandu mak dəgo ɓanda bone. ⁹ Amman a dlamina ankal na aɗa kun. Akshi a yana kun ii kəma nda garva, da dadgə kun ii kun susu magita: Kwaye ərɗi ii kəma gwamnanin na dəgamcin gaɗa dləgun ganai, gaɗa kwa bari saida ii kəmakshi. ¹⁰ Amman jibən gara se nda ɓandu dlama wazik labarr herr ii ndawa mak wara zəga Səku bai. ¹¹ Lakwtu mi akshi jibu kun da ɗəvari na kun ii amik nda hagata, kwa jikta bai iiɗa be mi kwaye ramau. Amman bari tawanke mi nda bari kun bari kun iiɗak be mi kwa ramau kwa rama gara gaɗa kawa rama nən kun bai amman aa ramo nən Nənwa Səku. ¹² Yagana aa bari na yagana gǝri nda təkədu, afək a bari na wun gǝri, mamau a tlatlə ankal ma'yawawin shi, harr nda təki na akshi. ¹³ Tike a kuri na kun gaɗa tləgun ga. Amman nǝn tawanke wara ərɗin gǝri harr dadəgəri nǝn aa bina rra. ¹⁴ Sartu mi kwaika be gaɓshu a wakata iiri kalkal binən (baci kəratu da yakintadu) ndiwa wara a Judiya da rawa nakshi ii kunu gugwuyak, ¹⁵ nǝn wara a dǝsku soro da fuwina bai ii kunu wunduwa gaɗa dami be ɗagai, ¹⁶ nǝn wara aa kunu kam gəri nǝn, da katina ii ma gwadam gǝri bai. ¹⁷ Waddare nda madau na nda gudaf ii lakwtu! ¹⁸ A dlamina magita bitku da wakata ii kunu dəman bai. ¹⁹ Ndaye dlama zada gaɓshu bone ɗagai wara galte nda dlambai tən mpik duniya mi Səku dlamatu, harr gusku yaye fak nda dlamo wambai harr dəmmaro. ²⁰ Gaɗa Sǝku pulutəna yuwan tuku bibən, na nǝngaiwa wara aabi rra bai. Amman gaɗa ndiwa wara ga cikɗak wara aci cikɗu, se aci da pulucina yuwangu. ²¹ Zam nǝn wara rami kun maa, 'aikina, sotai Masipu!' ko siitai aci kwa kasakta bai. ²² Gaɗa Masipu papiya na nabaucin papiya aa jiba vərayi, da tatki gənawa na bik ajab gaɗa aa dalaman gara nən akshi da ɗayina ndiwa wara nda chikɗu. ²³ Ammam a dlamina ankal! Na ramdikun bitku tən kaɗe. ²⁴ Amman daku kabine kə yuwan təngu; nda ɗawana afa da dlamən gara aaiwa, təra ke a bari ɓyan gara bai, ²⁵ gəshiwawin aapayi nakshi da dǝsku, kərma gawa mi a dǝsku a jiba rəɓ. ²⁶ Dari tunu nda lawanna Wun Gənən aani da kunu kǝrabak na marǝm kǝrmai. ²⁷ Dari tənu aci aaye wanayi malaikaucin gǝri da cacpə na ndawa wara aci chikɗu iiɗa gayi da dəkəma na caɗ na zəgar na aaɗau, harr ii nye dadəgəri dəɗa na dadəgǝri dǝsku. ²⁸ A gugzina dari waka ayawu. Lakwtu mi gapta gara ɓandə na parya na ɗuwayu nən, azigina du dǝman den gara ii damtau. ²⁹ Kasǝn ke, lakwtu kwaika bitku mak a wakata nən, a ziginadu aci den gəri ii dantau, damtu na mavgi. ³⁰ Na rame kun, jirewa, zaman tuku a nuta bai se bitku mak wakatu. ³¹ Dǝsku na dəɗa aa bǝnta nakshi, amman tilam ga ngalte aa bənta bai. ³² Amman gafau ko lakwtu tənu,na nən wara zəga bai, ko malaikaucin wara a kunu dǝsku, ko wungu, se Afək gu. ³³ A dlamina ankal kwa launyi bəlan, gaɗa kwa zəga lakwtu bai. ³⁴ Kakə nən baci buwa - aci iivəna wuduwa gǝri da ɗawudu ii aikwak zədaucin gǝri da ankalci wuduwau, tike na wana gǝri, se aci da rami baci ɗəri mavgə ma da dlama yuwan bai. ³⁵ Gaɗa ka sǝn a tlaɓina ga sapratak, gaɗa kwa zəga lakwtu mi baci wunduwau a katayi bai; aa dlaɓangara ii aduwau, ko ii gadava dǝvid, ko ii lakwtu kwaryak gaskam, ko ii miya tlanək ɗa. ³⁶ Aci de go tasəna nən, kwaiva da tase kun kwa yuwan bai. ³⁷ Be mi naa rame kun na ramo ii tike. A launina bəlan!