¹ Gaɗa nancu kwa zəgi zada gawak ravan wara na dlam gaɗa kun, na ndawa wara a Laudekiya, na ndawa gawa wara ika daga bai ikunu təka. ² Na dlam wana gaɗa gəshakshi da ɗagwaici darik cacpa iɗa gayi i kunu ntau na kunu bərəɗ kə tabbas na kə sanuta, i kunu zəgaya kə ashir jirewa kə Səku, atəne Masipu. ³ I kunu gəri mak bərəɗ kə asən na zəgaya da dəɓsa. ⁴ Na rami kun sau gaɗa nən wan da tatke gərayu bai na təlam i zamɓata kun. ⁵ Ko da naɗa gayi nakun i kunu təka bai amman naɗa gayi na kun i kunu Nunuwa Səku, na kuno lawan kun bəlan na awayu iman i kunu Masipu. ⁶ Kakə wara kwa gənu Masipu Məgənyi, a rakənina i kunu gəri. ⁷ Arɗina na awayau, a sukuni na i aɗa gəri, akkumina i kunu iman kakə wara nda gugze kun, a dlaɓina i kunu sambarkata. ⁸ Aikina nən wan da jiba kun bai da duvu papiya na alkawar papiya da rik kəlado ndawa kə duniya, na wara kə Masipu bai. ⁹ Atəro i kunu gəri ne mak jibka təka Səku. ¹⁰ Nda niyi na kun i kunu gəri. Aci ne aɗa awayau na garva tawanke. ¹¹ Ndaudu kun cam i kunu gəri na wuda wara nda dlamudarik nəngaiwa bai kə təlɗa tləwik təka, amman da kunu wuda kə Masipu. ¹² Nda dabgəna kun na aci i kunu baptisma, kuru i kunu gəri ne nda tlatla kundarik iman na kərmai Səku, wara tlatla ci da kunuk nda mutu. ¹³ Sartu wara kun gamtak i kunu aipapin kun na buka wuda kun i kunu təka, aci dlam na kun na aro iɗa gayi na aci da təptə diwa aipapin wa. ¹⁴ Aci saspə na basasin wara nda tarnu na linok mak wara ndampe təka wa aci ngwa du mak da dləgə du i təka dəm dləga. ¹⁵ Aci səltə na awayau na garvavin, da tatkəna buka awayuk shi i patata dari kənasar i aɗakshi darik dəm dləga. ¹⁶ Gaɗa kasən, nən ɗagai da kagalata kun bai i kunu ta ko i kunu sa ko gafak ngəmuri ko i kararak təra ko gafak ngəmuri kə Yahudaucin. ¹⁷ Sutku atəne gənawa bewara ani i kəma, amman jirewan Masipu. ¹⁸ Kwa bəza nən da mboti na nakwanak malekawaɗ da kagalaci kun da kunuk dləgda kun bai. Zadak nən təku a təfa i kunu be wara aci ikau da dlam arro marəm ikunu kuraram gəri təka. ¹⁹ Da təpa na aɗo ke bai. Atəro darik aɗau wara təkau ga təpak na dəzhi ga vaikak da jiba ke aɗa gayi; Atə rawa na rawa wara barən Səku. ²⁰ Inde kwa mutu iɗa gayi na Masipu nən i ndak duniya, gaɗa gəmo kwa dlaɓa iɗa gayi na kare duniya? ²¹ Kwa jiba bai, ko kwa kaktla bai ko kwa linci. ²² Jandut ku mak ayana kun mak i kunu dləməɗ dari kərəmta na gugza ndawa. ²³ Linok təku na asən nəngaiwa kə duvu ɗəga na səna aɗa na bonetak təka. Amman go paida iɗak ngənitak təkakwina.