¹ Paulo, umufungwa wa kwa Kristu Yesu, na Timote munyina, kuli Filemoni, utemwikwa cibusa wesu kabili umubomfi munensu, ² na kuli Afia nkanshi yesu, na kuli Arkipi icita umushilika munensu, na ku lukuta ulukumanina mu ng'anda yobe. ³ Ukusenamina kube kuli mwebo no mutende ukufuma kuli Lesa Shifwe na Shikulu Yesu Kristu. ⁴ Nebo ndatotela Lesa wandi lyonse ulo nebo nkulumbula webo mu mapepo yandi, ⁵ pantu nebo nalyumfwa palwa citetekelo ico webo wakwatila Shikulu Yesu kabili no kutemwa webo wakwata pa bantu bonse abakushila. ⁶ Nebo nkopepa ukwebati isenge lya citetekelo cobe libe ilya kufikapo, ukwebati webo ukwate umwisulo wa mucetekanya wa fintu fyabune bonse ifyo fwebo twa kwata muli Kristu. ⁷ Pantu nebo ndikwete nsansa sana ne cisansamushi pamulandu wa kutemwa kobe. Pantu imitima yaba mushilo bakwa Lesa ilipuputwilwe ukupitila muli webo, munyinane. ⁸ Eco, nangu cingaba ukwebati nebo ndikwete ukupama konse muli Kristu ukukukambisha webo ukucita ifyo ufwile ukucita, ⁹ lelo pamulandu wa kutemwa, lelo nkokulomba - Nebo, ne Paulo, umuntu mukote, kabili nomba umufungwa wa kwa Kristu Yesu. ¹⁰ Nkokupapata webo palwa mwana wandi Onesmu, uo nebo nakwatile mu minyololo. ¹¹ Ico panshita imo ena tali na mulimo kuli webo, lelo nomba ali no mulimo kuli webo na kuli nebo. ¹² Nebo ndimutumine ena ukubwelela kuli webo, ena uuli mutima wandi. ¹³ Nebo nalikufwaya asungwe kuli nebo ukwebati ena apyungile nebo mwi punda lyobe panshita nebo ndi mu minyololo pa mulandu wa mbila nsuma. ¹⁴ Lelo nebo nshalikufwaya ukucita icintu ukwabula insambu shobe. Nebo nshalikufwaya imilimo yobe iyabune ukufuma mukukabila lelo mu bufwayo bobe ubwabune. ¹⁵ Limbi eco napali ici apatukile ukufuma kuli webo pa nshita imo, pakwebati wingaba nankwe nomba umuyayaya. ¹⁶ Te kuba umusha iyo, lelo ukucila pa musha, munyinane uwatemwika. Ena untu watemwikwa maka maka kuli nebo, no kucilisha kuli webo, muli fyonse ku mubili na muli Shikulu. ¹⁷ Kanshi umfwa webo ulikwete nebo ngo mwampani, umupokelele kubati ninebo. ¹⁸ Umfwa ena alikubifya webo nangu alikukwatile inkongole mucili conse, ushipendele pali nebo. ¹⁹ Nebo, ne Paulo, nkolemba if ku kuboko kwandi. Nebo wine nkakubwesesha - nshikolumbula ukwebati webo we mwine uli musha kuli nebo! ²⁰ Ee, we munyinane, leka nkwate icibwesha ukufuma kuli webo muli Shikulu; puputula umutima wandi muli Kristu. ²¹ Ntakotwishika palwa cumfwila cobe, eco nebo nkolembela kuli webo. Nebo ndishibile ukwebati webo ukacita ukucila na pafyo nkokulomba. ²² Panshita imo ine, upekanye umuputule wa beni uwandi, ico nebo ndisubile ukwebati mu mapepo yenu nebo nkapelwa ukubwekeshiwa kuli mwebo. ²³ Epafra, umufungwa munandi muli Kristu Yesu, akokuposha webo. ²⁴ Pamo na Marko, Aristarki, Dema, na Luka, ababomfi banandi. ²⁵ Ukusenaminwa kwa kwa Shikulu Yesu Kristu kube no mupashi obe. Ameni.