¹ Laiv lanh zeen Yê-su ayx Njâuv Zâu, woax lanh songđ ayx Tênb-Hungh nyăngz sây, laiv lanh stăngz pha, songđ stăngz cloon nănh nyăngz toonz. ² Pănh ayx laix hayh pâyz tuz pănh săngh Tênb-Hungh nyăngz toonz sab, six wâyc zuc pănh pâyz tuz Tênb-Hungh yâuc ayx âyz nănh nyăngz lanyf. ³ Pănh stăngz Tênb-Hungh six năngđ nâyx, pănh âyz tuz nănh nyăngz lanyf ayx, nănh nyăngz lanyf ayx six max numđ zâuđ. ⁴ Wâyc zuc laiv lanh seenz zâyf Tênb-Hungh nyăngz toonz sab, nănh six tuz hingh quaix nây bamh canz, wâyc pănh nyăngz seenz stymz. ⁵ Ha six laiv lanh hingh bamh canz? six zeen Yê-su ayx Tênb-Hungh nyăngz toonz woax tauh. naih pôz hungđ ayx zanyx manyf ⁶ Njâuv Zâu Yê-su taih, nănh naih womz cloon samđ ayx njih houđ, max zâyf cungb nongc womz cungv, yâuc nongc cloon samđ. Singx-lingh cănh ayx zanyx manyf coong nây six seenz nyăngz gâyf gôh, wâyc zuc singx-lingh six seenz gâyf. ⁷ Songđ naih pôz hungđ ayx zanyx manyf. ⁸ Singx-lingh, cloon womz, yâuc naih cloon samđ, nây pôz hungđ dlongh stymz dlongh âyx ayx zanyx manyf. ⁹ Bamh munh ayx zanyx manyf pănh lauf zeen, six Tênb-Hungh cănh stăngc nănh nyăngz toonz ayx zanyx manyf songđ năngx lub têx. ¹⁰ Laiv lanh zeen Tênb-Hungh nyăngz toonz, woax lanh songđ naih Tênb-Hungh yămz nănh nyăngz nyâuđ ayx zanyx manyf, six laiv lanh max zeen Tênb-Hungh, woax lanh ayx phunz Tênb-Hungh nyăngz woac max săngh njaiz. Wâyc nănh max zeen Tênb-Hungh nyăngz toonz stăngc nănh ayx zanyx manyf nyăngz woac. ¹¹ Tênb-Hungh ayx zanyx manyf six năngđ nâyx, nănh phunz pănh tuz stâyv quâyx nyăngz mengc. Nâyx hungđ mengc six yămz nănh nyăngz toonz taih. ¹² Laiv lanh naih Tênb-Hungh nyăngz toonz, woax lanh songđ naih săngh mengc, laiv lanh max naih Tênb-Hungh nyăngz toonz six max naih săngh mengc. Pănh tuz stipx stâyv quâyx nyăngz mengc ¹³ Yaz ja nâyx zây jeenx wâyc phunz nyâuh zeen Tênb-Hungh nyăngz toonz woax đomc munh, wâyc phunz nyâuh yâuf pez pâyz tuz pănh naih stâyv quâyx nyăngz mengc. ¹⁴ Pănh songđ hayh tuz pungx stymz yămz Tênb-Hungh nyăngz cah đangc, wâyc zuc pănh pâyz tuz pănh jođ laiv hungđ nănh songđ mungv pănh. ¹⁵ Six coong pănh năngđ pâyz tuz pănh cayx jođ laiv hungđ Tênb-Hungh yâuc mungv pănh, pănh six hayh tuz stipx pănh jođ Zâu toix laiv hungđ. ¹⁶ Laiv lanh năngđ phătc nănh nyăngz yâuf pez pamf stoif, six pamf stoif max zengx jic tuz zuc tayc, pănh six zuc stăngc nănh jođ Tênb-Hungh, Zâu songđ phunz nănh tuz naih mengc săngh. Nây six yaz coong tauv pamf stoif max zengx jic tuz tayc nyăngz Stoif. Six yaz max naih coong tauv êu nyâuh stăngc đoouc coouv phunz tauv pamf stoif jic tuz zuc tayc nyăngz munh. ¹⁷ Ayx max manyh pec six săngh stoif nzuf, six max zâyf pamf muif hungđ stoif bix hayh ênz munh ninyh tauv zuc tayc nyăngz tync. ¹⁸ Pănh pâyz tuz laiv lanh ayx Tênb-Hungh nyăngz toonz sab, max zâyf njynh leox ninyh pamf stoif, wâyc Tênb-Hungh nyăngz toonz căn leđ bây woax lanh munh tuz pengh oonz, manđ Hungh songđ max hayh hoiđ tauv nănh. ¹⁹ Pănh săngh Tênb-Hungh nyăngz sây. Max cun pănh hănđ yămz woa ayx huđ woax tauh puf đi, songđ lauf tuz gâyh đutb manđ Hungh. ²⁰ Pănh pâyz tuz Tênb-Hungh nyăngz toonz nzac taih lănv phunz pănh pâyz tuz yox, yâuc pâyz tuz seenz nyăngz woax tauh six Tênb-Hungh, pănh cloon woax tauh seenz gâyf songc mengc săngh. Six cloon seenz zâyf Tênb-Hungh nyăngz toonz Njâuv Zâu Yê-su, six stâyv quâyx naih săngh mengc nyăngz coonz nengx. ²¹ Stăngz nyăngz sây lex! Nyâuh zuc pyeenv paix miuc hanyh.