¹ Ọnẹ nẹnẹ wo ọtọtọmẹ ṣa na-nẹ gba na aka ne ta anyẹn abẹ gba na, ne ti diya balẹ na aka nẹ tu uba dẹye na-yẹrẹ ẹrọ ẹẹga. ² Bi la mo bẹ sẹ ẹga ayẹ ṣin odidin, tẹ gba ẹ kẹ, ti diya no owo nẹ ya. Ta a kpọ ẹro otutumotutun ẹpẹpan nẹ nọ, nẹ wo ẹdẹda ẹfa na, aka nẹnẹ bẹ sẹ ṣina odidin nẹ tọ na ³ Ọnẹnẹ te wọ aka ne te gba na aye tiya nyen nọ ka ni di su osiyebile aka atọ. Ti su Ededa osiyebile aka yo ogben, Ijisọs Ẹkraist. ⁴ Bilamo, tà a wọrẹ ẹpẹn ẹnanẹ nẹ no kadakada ka tẹ ẹbẹbẹn e di gule. ⁵ Ọnẹ a wa utun nẹ tẹ wọ i yẹ ẹfa ayẹ ti diya à á kpọ yẹ ẹpẹpan à á nẹ nọ nẹ: Osibina wa ọsọ aka ka i yi iwu e me kọrọore. ⁶ Tà a ga ka ti su osiyebile aka ayẹ, tiye jejen esiri, tà a siṣoma ti me diye siye ikuwa tima fi kwa siyu tun siye. ⁷ Amá è é gbe ka tẹ ma wo ọsọ akọ e siye wo ọsọ na, ti su osiyebile aka abẹn na, Ijisọs Ekraist yo ogben puwa tọ fura ti iluwe fẹnyan. ⁸ Tà a ga ka ti me su iluwe, tà a wọrẹ ti iwu, ikuwa e me diye wo ti iwo. ⁹ Àmá tà a na ti iluwe owo, ikuwaro akà ọṣẹrẹro a wa ka a fọ ti iluwe abẹ ẹẹ̀pan e diya puwa tọ fura tọ ọṣeriyuru fẹnyan. ¹⁰ Tà a ga ka ti me juwe gba, te sẹ ya ṣina iṣomaro, yẹ ẹga e me diya wo ti ibe.