¹ Gui'chi' ra cá lá guirá' lisaa de ra zá jesucristu, xiiñi' David, xiiñi' Abraham. ² Abraham gucabe bixhoze Isaac, Isaac gucabe bixhoze Jacob, ne Jacob gucabe bixhoze Judá ne ca bi'chi', ³ Judá ne Tamar gucacabe bixhoze Fares ne Zara, Fares gucabe bixhoze Esrom, Esrom bixhoze Aram, ⁴ Aram gucabe bixhoze Aminadab, Aminadab bixhoze Naasón, Naasón bixhoze Salmón. ⁵ Salmón ne Rahab guca ca bixhoze Booz, Booz ne Rut guca cabe bixhoze Obed, Obed bixhoze Isaí, ⁶ Isaí guca bixhoze Rey David. David ne xheela' Urías que la? guca cabe bixhoze Salomón. ⁷ Salomón guca be bixhoze Roboam, Roboam bixhoze Abías, Abías bixhoze Asa, ⁸ Asa bixhoze Josafat, Josafat guca be bixhoze Jorám ne Jorám bixhoze Uzías. ⁹ Uzías bixhoze Jotam, Jotam bixhoze Acaz, Acaz bixhoze Ezequias. ¹⁰ Ezequias guca be bixhoze Manasés, Manasés bixhoze Amón, Amón bixhoze Josías. ¹¹ Josías bixhoze Jeconías ne ca bi'chi' ca dxi yené cabe laaca Babilonia. ¹² Ne yené si cabe laaca babilonia que la?, Jeconías guca be bixhoze Salatiel, Salatiel bixhoze goola Zorobabel. ¹³ Zorobabel bixhoze abiud. Abiud bixhoze Eliaquim, Eliaquim bixhoze Azor. ¹⁴ Azor guca be bixhoze Sadoc, Sadoc guca be bixhoze Aquim, Aquim bixhoze Eliud. ¹⁵ Eliud bixhoze Eleazar, Eleazar bixhoze Matán, Matán bixhoze Jacob. ¹⁶ Jacob bixhoze José xheela' Maria, ni de laa beda gale Jesús, ni lá Cristu. ¹⁷ Guirá' ca lisaa xti' Abraham dede David guca ca chii ne tapa lisaa, de David dede dxi biree cabe zé cabe babilonia chii ne tapa lisaa, ne dede dxi biree cabe zé cabe babilonia dede Cristu chii ne tapa lisaa. ¹⁸ Dxi gule Jesucristu bizaacani sicari'. Jñaa be Maria ma yenaba José laa ti guichaga nabe laa, ne caru chuu cabe tobisi, bihuinni ma nacaxiiñi be pur guendanandxo' xti' Espiritu Santu. ¹⁹ Xheelabe José guca ti hombre runi jneza, ne que niná nusitui lú be neza lú de guirá' binni. Ngue runi gucala'dxi' ñé naga'chi' ti que guichaganá' laabe. ²⁰ Laga laabe cani' ique be ca ndi la?, ti angel xti' Diuxi beda ra nuube lu ti bacaanda' ne ná: "José, xiiñi' David, cadi guidxibilu' guicoou' Maria casi xheelu', Pur ti ba'du nacaxiiñi be ca, gucaxiiñi be laa pur Espiritu Santu. ²¹ Laabe zapabe ti xiiñibe ne lii zabee lá lu' laa Jesús, ti Laabe zulá be xquidxi be de ca guendaruchee xtica'." ²² Guira ndi bizaaca para gaca ni guni' Xpixuaana nu de ruaa xa profeta que, ra na': ²³ "LAGUUYA, TI BINNI DXAAPA ZACAXIIÑI NE ZAPA TI BA'DU, NE ZABEE CABE LÁ BE EMMANUEL, NI RINÍ' NI LA? 'DIUXI NUU NE LAANU'." ²⁴ José bibani de lu xpacanda ne biini casi ángel xti Xpixuaana nu que bisenda laabe guni be ne laabe gucua be laa casi xheela be. ²⁵ Huaxa, laabe que ñasi ne be laa dede dxi gule ma gule ba'du que. Ne laabe gulee be lá Jesús.