¹ Kel-li é palavra di Nhordes ki ben pa Sofonias, fidju di Kuxi, fidju di Gedalias, fidju di Amarias, fidju di Izekias, na dia di Juzias, fidju di Amon, rei di Juda. ² N ta distrui tudu riba di tera. É si ki Nhordes fla. ³ N ta distrui ómi ku animal. N ta distrui avi di séu, pexi di mar y tudu kes ki ta sirbi di keda. N ta ranka ómi di riba di tera. É si ki Nhordes fla. ⁴ N ta stende nha mon riba Juda y tudu moradoris di Jiruzalen. N ta anikila di es lugar tudu restu di Baal y nomis di idólatras na meiu di saserdotis, ⁵ pesoas ki sta riba terasu y ki ta adora seris selestial; kes ki ta adora Nhordes y ta jura pa El, ma tanbe es ta jura pa Milkon. ⁶ Tanbe N ta anikila kes ki dexa di sigi Nhordes, ki ka ta buska-L y nen ka ta kunsulta-L. ⁷ Nhos kala na prizensa di Sinhor Nhordes, pamodi Se dia sa ta txiga. Nhordes dja pripara sakrifisiu didikadu pa ses kunbidadus. ⁸ Y ta kuntise ki, na dia di sakrifisiu di Nhordes, N ta kastiga prínsipis y fidjus di rei y tudu kes ki ta bisti di ropa di stranajeru. ⁹ Na es dia N ta kastiga tudu kes ki ta salta pa solera di porta, kes ki ta intxi kaza di se mestri ku violensia y mintira. ¹⁰ Asi ta ser na kel dia, Nhordes fla: "Ki un txoru di angústia ta ben di porta di Pexi, lamentason di Sugundu Distritu y un grandu barudju di distruison di munti. ¹¹ Lamenta, moradoris di Distritu di Merkadu, pamodi tudu merkadoris ta ser ruinadu, y tudu kes ki ta peza prata ta ser anikiladu. ¹² Y ta ben kuntise ki na kel tenpu N invistiga Jiruzalen ku lanterna y N ta kastiga ómis visiadu na se vinhu y es ta fla na ses kurason: Nhordes ka ta faze nada, nen ben y nen mal. ¹³ Ses rikezas ta ser furtadu, y ses kaza distruidu y abandonadu! Es ta kunstrui kaza, mas es ka ta mora na el, es ta planta vinha, mas es ka ta bebe di se vinhu. ¹⁴ Grandi di di Nhordes sa ta txiga, sta pertu y sa ta txiga propri. Barudju di dia di Nhordes ta ser di tal manera ki ti mesmu gereru ta grita ku amargura. ¹⁵ Kel dia ta ser di fúri, di aflison y di angústia; dia di tenpestadi y distruison, dia sukuru y sen ninhun lus, un dia di nuven y txeu sukuru. ¹⁶ Ta ser dia di trunbeta y alarmi kontra sidadis fortifikadu y toris altu. ^{17 18} Pamodi N ta traze angústia riba umanidadi, y nton, es ta anda sima ómis segu, pamodi es peka kontra Nhordes. Se sangi ta ser dispejadu sima puera, y dentu del sima bosta. Nen se prata nen se oru ta ser kapas di salva-l na dia di fúria di Nhordes. Lumi di siúmis di Nhordes ta kema tudu tera, pamodi anikilason ki E ta traze kontra moradoris di tera ta ser terível.