¹ Vizon di Obadias. É si ki Nhordes fla di Edon: Nu sa ta obi un relatóriu di Nhordes, y un nbaxador mandadu pa meiu di povus, pa fla: Nhos labanta! Nu labanta kontra el pa batalha! ² N faze-u pikinoti na meiu di povus y N sabi ma abo é txeu disprezadu. ³ Bu sa ta ser nganadu pa orgulhu di bu kurason, bo ki ta mora na radjadura di rotxas, na bu morada riba la, y dentu bu korason bu ta fla: Kenha ki pode dá ku mi na txon? ⁴ Sikre bu faze bu tori altu sima di ágia, y si kre bu faze bu ninhu na meiu di strela, di la N ta dá ku bu na txon. Ami Nhordes ki sa ta fla-u. ⁵ Si ladron o asaltanti txiga na bo di noti (moki bu sta distruídu!) es ka ta robaba so kel ki es meste? Si kes ki ta kodje uva txiga na bo, es ka ta dexaba algun katxu di uva? ⁶ Izau tradu y ses tizoru sukundidu, lebadu moku! ⁷ Tudu kes ómis ki faze aliansa ku bo leba-u pa lonji di bu tiritóriu. Ómis ki sta na pas ku bo ngana-bu y es rabela kontra bo. Kes ki ta kume di bu mon, arma un armadilha bu baxu. Es ka ten ntendimentu. ⁸ Nhordes fla: Nakel dia, N ta kaba ku spertus di Edon, y N ta tra ntendimentu di munti di Izau? ⁹ Bus ómis puderozus ta ser distruídu, Teman; nton tudu ómi ta ser istirminadu di munti di Izau. ¹⁰ Trokadu di violensia ki fazedu kontra bu irmon Jako, es ta kubri-u di burgonha y bu ta ser isterminadu pa senpri. ¹¹ Na dia ki bu staba lonji, na dia ki stranhu leba bu rikeza y stranjeru entra pa bus porta y lansa sorti riba Jiruzalen, abo me era un di es. ¹² Ma bu ka dibia odjaba ku prazer pa dia bu irmon, dia di se kasabi y nen pa bu fika ta trosa di povu di Juda na dia di se distruison. Bu ka dibia mostra atrivimentu na dia di se sufrimentu. ¹³ Ka bu entra pa porta di Nha povu na dia di se kalamidadi; ka bu odja pa se kasabi na dia di se dizastri y nen ka bu panha ses kuzas na dia di se ruína. ¹⁴ Ka bu fika na skina pa bu mata kes ki sa ta tenta skapa. Ka bu pu-i bu mon riba kes ki sa ta tenta subrivivi na dia di angústia. ¹⁵ Dia di Nhordes sa ta txiga riba di tudu povus. Sima bu sa ta faze, bu ta fazedu tanbe. Kuzas ki bu sa ta faze ta volta kontra bu propri kabesa. ¹⁶ Sima bu bebe na Nha Santu Munti, tanbe tudu povus ta bebe pa senpri. es ta bebe, es ta nguli y es ta fika sima ki es ka izistiba antis. ¹⁷ Ma na Munti Sion ta sta kes ki skapa, y e ta ser santu. Y kaza di Jako ta toma di volta ses eransa. ¹⁸ Kaza di Jako ta ser lumi, kaza di Djuze un labareda y kaza di Izau sima padja seku, y es ta kema-l ti ki kaba. Ka ta izisti subreviventi di kaza di Izau, ami Nhordes ki sa ta fla. ¹⁹ Kes ki é di Negebi ta toma posi di montanha di izau y kes ki é di planisi di Sepela ta toma posi di teras di filisteus. E es ta toma posi di ter di Ifrain, y tera si Samaria. Y Benjamin ta toma posi di Giliadi. ²⁰ Iziladus di izérsitu di povu di Israel ta toma posi di tera di Kanaan ti txiga Sarepita. Iziladus di Jiruzalen, ki sta na Sefarade, ta toma posi di sidadis di Negebi. ²¹ Libertadoris ta subi pa munti Sion pa julga munti di Izau, nton reinu ta ser di Nhordes [Nota: Inves di libertadoris, txeu verson muderna ta sigi antigus intérpretis, i es ta traze: Kes ki ta ser libertus].